ខេត្ដពោធិ៍សាត់ ៖ ព្រៃឈើសហគមន៍ចំនួន៥២១ហិកតានៅឃុំអន្លង់វិល ស្រុកកណ្ដៀង និងឃុំកំពង់ពោរ ស្រុកក្រគរ ត្រូវបានអង្គការអភិវឌ្ឍន៍ និងការពារបរិស្ថានធ្វើ ការឧបត្ថម្ភគាំទ្រឱ្យនៅគង់វង្ស និងលូតលាស់តាមលក្ខណៈធម្មជាតិ។ ដើម្បីឱ្យព្រៃឈើមានគុណភាពល្អ (ឈើមិនស្អុយ កោងវៀច) ព្រមទាំងធ្វើឱ្យវាមានការលូតលាស់បានឆាប់រហ័សទៅតាមលក្ខណៈបច្ចេកទេសនោះ អង្គការនេះបានបើកវគ្គបណ្ដុះបណ្ដាលមួយស្ដីពីសុវុឌ្ឍិកម្មព្រៃឈើដល់គណៈកម្មការគ្រប់គ្រងសហគមន៍ព្រៃឈើនៅឃុំកំពង់ពោរ ស្រុកក្រគរ ដោយមានការឧបត្ថម្ភថវិកាពីអង្គការបំរើគ្រួសារអភិវឌ្ឍន៍កម្ពុជា(CFDS) និងមានការសំរបសំរួលបច្ចេកទេសពីមន្ដ្រី ព្រៃឈើខេត្ដ ។
វគ្គសិក្សាបានផ្ដោតសំខាន់ទៅលើការធ្វើអាជីវកម្ម និងសុវុឌ្ឍិកម្មព្រៃឈើ ដោយធ្វើយ៉ាងណាឱ្យអ្នកភូមិមានការយល់ដឹងទាំងផ្នែកទ្រឹស្ដី និងការអនុវត្ដជាក់ស្ដែង ពិសេស គឺបច្ចេកទេសនៃការធ្វើឱ្យស្រឡះ ការធ្វើឱ្យរហាល និងការក្រីមែកឈើ ។
លោកអ៊ឹង សងកាំង មន្ដ្រីព្រៃឈើខេត្ដ និងជាគ្រូបង្ហាត់បានប្រាប់ឱ្យដឹងថា វគ្គសិក្សានោះមិនមែនមានប្រយោជន៍ត្រឹមតែព្រៃសហគមន៍ប៉ុណ្ណោះទេ សូម្បីអ្នកធ្វើចំការ ឈើហូបផ្លែក៏ត្រូវមានចំណេះដឹងនេះដែរ ។ ដូច្នេះការអនុវត្ដផ្ទាល់របស់សិក្ខាកាមស្ដីពីសុវុឌ្ឍិកម្មព្រៃឈើប្រមាណមួយហិកតានេះ គឺសំរាប់សាកល្បងប្រៀបធៀបទៅនឹងព្រៃឈើដែលមិនបានធ្វើសុវុឌ្ឍិកម្មដើម្បីឱ្យពួកគាត់បានឃើញច្បាស់អំពីការលូតលាស់ខុសប្លែកគ្នារវាងដើមឈើទាំងពីរកន្លែង ។ ជាក់ស្ដែងការអនុវត្ដឱ្យស្រឡះនេះ គឺជាការកាប់មែក ឬដើមឈើធំៗមិនសំខាន់ចេញដើម្បីឱ្យពន្លឺថ្ងៃ និងខ្យល់អាកាសចេញចូលបានគ្រប់គ្រាន់ (ធ្វើឱ្យឈើឆាប់លូតលាស់ និងឆាប់ធំ )។ រីឯការក្រីមែកឈើវិញ គឺការកាត់ ឬអារមែកឈើឱ្យបានស្អាតកុំឱ្យមានស្នាមមុខរណារ ឬកាំបិតរឆិញរឆុញដែលធ្វើឱ្យមានទឹកដក់ស្អុយរលួយ និងខូចដល់សាច់ឈើ។
លោកគឹម ចន្ថា នាយខណ្ឌរដ្ឋបាលព្រៃឈើខេត្ដស្ដីទីមានប្រសាសន៍ថា បច្ចុប្បន្នសហ គមន៍ព្រៃឈើនៅខេត្ដពោធិ៍សាត់ទើបតែមានចំនួន៣៥សហគមន៍ប៉ុណ្ណោះ ម្ល៉ោះហើយការគ្រប់គ្រង និងថែរក្សាសម្បត្ដិធម្មជាតិទាំងនេះពុំទាន់គ្រប់គ្រាន់ និងមានប្រសិទ្ធភាពនៅឡើយទេ។ ដូច្នេះវគ្គបណ្ដុះបណ្ដាល និងការអនុវត្ដជាក់ស្ដែងរបស់សហគមន៍ឃុំកំពង់ពោរស្ដីពីសុវុឌ្ឍិកម្មព្រៃឈើនេះ គឺជាសកម្មភាពមួយយ៉ាងល្អ និងជាគំរូដល់សហគមន៍ដទៃទៀតដែលពុំទាន់បានអនុវត្ដបច្ចេកទេសដូចខាងលើ ។
លោកសុទ្ធ តារា អភិបាលរងស្រុកក្រគរ បានសំណូមពរឱ្យក្រុមសហគមន៍ខិតខំថែរក្សាព្រៃឈើដោយលៃយ៉ាងណារៀបចំបង្កើតឱ្យមានប្លង់ច្បាស់លាស់ដើម្បីចៀសវាងការរំលោភវាតទីយកដីធ្លីពីសំណាក់ប្រជាពលរដ្ឋមួយចំនួនតូច ៕
ចែករំលែកព័តមាននេះ