រាជធានីភ្នំពេញ ៖ សហជីពបានសម្តែងនូវការព្រួយបារម្ភយ៉ាងខ្លាំងក្នុងពេលដែលរោងចក្រ ចំនួន ១៣០ បានដាក់ពាក្យព្យួរការងារធ្វើឱ្យប៉ះពាល់ដល់កម្មករ ១០ ម៉ឺននាក់ហើយជា ពិសេសបើនៅក្នុងរយៈពេល ២ ខែទៀតអត់មានការបញ្ជាទិញថ្មីទេ គឺចំនួនរោងចក្រព្យួរ ការងារនឹងកើនឡើង ស្របពេលជាមួយគ្នានេះចំនួននៃការបិទរោងចក្រក៏កាន់តែកើនឡើង ផងដែរ ដែលធ្វើឱ្យទំហំនៃការបាត់បង់ការងារកាន់តែខ្ពស់ពិបាកក្នុងការស្តារឡើងវិញ ។
ការព្រួយបារម្ភនេះបានកើតឡើងបន្ទាប់ពីមន្ត្រីជាន់ខ្ពស់ក្រសួងការងារ និងបណ្តុះបណ្តាល វិជ្ជាជីវៈ បានប្រកាសថា គិតមកដល់សព្វថ្ងៃនេះមានរោងចក្រប្រមាណ ១៣០ បានដាក់ ពាក្យព្យួរការងារ ហើយបានវាយតម្លៃថាការនាំចេញនៅក្នុងត្រីមាសទី ២ ខាងមុខអាច រងផលប៉ះពាល់ប្រមាណ ៦០% ព្រោះមិនទាន់ទទួលបានតួលេខនៃការបញ្ជាទិញថ្មីសម្រា ប់ខែឧសភា និង មិថុនា ។
លោក ហេង សួរ មន្ត្រីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានលើក ឡើងក្នុងសន្និសីទស្តីពី បច្ចុប្បន្នភាពនៃការធ្វើចត្តាឡីស័កចំពោះកម្មកររោងចក្របន្ទាប់ ពីឈប់សម្រាកកំឡុងពេលបុណ្យចូលឆ្នាំខ្មែរ ហើយត្រឡប់ចូលបម្រើការងារវិញកាលពី ថ្ងៃទី ២៧ខែមេសាថា សម្រាប់ប្រទេសកម្ពុជាដែលផលិតនូវសម្លៀកបំពាក់នាំចេញក៏ដូច ទៅនិងប្រទេសដទៃទៀតផលិតសម្លៀកបំពាក់ ស្បែកជើងរួមនិងផលិតផលធ្វើដំណើរនេះ នៅពេលប្រទេសនៅអាមេរិក ឬ អឺរ៉ុប រងផលប៉ះពាល់ដោយសារជំងឺកូវីដ គេបិទទីផ្សារ គេ បិទចរាចរណ៍ធ្វើឱ្យតម្រូវការសម្លៀកបំពាក់ ស្បែកជើង ឬក៏កាបូបរួមនិងផលិតផលផ្សេង ទៀតត្រូវបានកាត់បន្ថយជាកំហុក ។
លោកបានឱ្យដឹងទៀតថា «តាមរយៈនៃការធ្លាក់ចុះនៃតម្រូវការទីផ្សាររបស់យើងនេះធ្វើឱ្យ រោងចក្រសម្លៀកបំពាក់ និងស្បែកជើងមួយចំនួនធំបានដាក់ពាក្យស្នើសុំព្យួរដែលគិតមក ដល់ពេលនេះមានរោងចក្រជាង ១៣០ និងមានកម្មករជាង ១០ ម៉ឺននាក់រងផលប៉ះពាល់ ពីការព្យួរនេះ» ។ លោកបន្តថា នៅត្រីមាសទី ១ ឆ្នាំ ២០២០ ការនាំចេញមានកម្រិតមួយ អាចថាប្រមាណ ៨០% នៃឆ្នាំ ២០១៩ ។ ពីព្រោះនៅខែមករា ស្ថានភាពមិនទាន់អាក្រក់ ណាស់ណាទេ នៅអឺរ៉ុប និងអាមេរិក នៅចុងខែកុម្ភៈ គឺមានការចាប់ផ្តើមសញ្ញាប៉ះពាល់ ជំងឺកូវីដនេះនៅអឺរ៉ុប ហើយដល់ខែបីទើបមានការបិទនៃការនាំចេញ ។
ទោះបីជារោងចក្រ មានការផលិតនៅផលិតផលរួចហើយក៏ដោយ ក៏ម្ចាស់ម៉ាក ឬអ្នកបញ្ជាទិញទាំងអស់នោះ បានស្នើសុំមករោងចក្រកុំអាលដឹកផលិតផលទាំងនោះចេញ ដោយសារគ្មានអ្នកត្រូវទិញ អ៊ីចឹងហើយបានជាម្ចាស់ម៉ាកទាំងនោះរក្សាវាទុកសិន ។
លោក ហេង សួរ ឱ្យដឹងបន្ថែមទៀតថា តាមរយៈការសម្របសម្រួលរបស់ក្រសួងជាមួយ ស្ថាប័នពាក់ព័ន្ធ ឃើញថាអ្នកបញ្ជាទិញខ្លះគាត់សុខចិត្តបន្តបង់ទៅលើផលិតផលដែល បានដេររួចហើយ ។ ប៉ុន្តែគាត់មិនដាក់ការបញ្ជាទិញបន្ថែមទេ អ៊ីចឹងហើយបានជាធ្វើឱ្យនៅ ខែ ៤ ខែ ៥ និងខែ ៦ នេះ តាមការទំនាក់ទំនងជាមួយអ្នកបញ្ជាទិញ គឺថាគាត់មិនទាន់ ហ៊ានកំណត់ ឬដាក់តួលេខនៅការបញ្ជាទិញណាមួយនោះទេគិតមកត្រឹមថ្ងៃនេះសម្រាប់ នៅខែ ៥ និងខែ ៦ យើងមិនទាន់ទទួលបានតួលេខថ្មីនៃការបញ្ជាទិញនៅឡើយ ។
លោកសង្កត់ធ្ងន់ថា «មកដល់ម៉ោងនេះយើងទទួលស្គាល់ថា ការនាំចេញរបស់យើងពិតជា មានផលប៉ះពាល់ពិសេសនៅក្នុងត្រីមាសទី ២ នៃឆ្នាំ ២០២០ នេះ ដែលយើងគិតថាមាន ប្រហែលពី ៥០% ទៅ ៦០% នៃតួលេខឆ្នាំមុន» ។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ឱ្យដឹងថា «យើងរំពឹងលើការនាំចេញឥវ៉ាន់ទៅខាងក្រៅ អ៊ីចឹងបើអឺរ៉ុប និងសហរដ្ឋអាមេរិកបិទទីផ្សារ មិនទិញទេ គឺពិតជាមានការពិបាកមែនទែនក្នុងស្ថានភាពបែបនេះ ។ សម្រាប់ខ្ញុំផ្ទាល់គិត ថាជាស្ថានភាពមួយលំបាកទាំងអស់គ្នា ទាំងរាជរដ្ឋាភិបាល កម្មករ សហជីព និងរោងចក្រ ។ ប៉ុន្តែយើងត្រូវយកឱកាសនៃបញ្ហាទៅជាសក្តានុពលវិញសម្រាប់រយៈពេលវែង ។
សម្រាប់រាជរដ្ឋាភិបាលគួរតែបញ្ចេញថវិកាសង្គ្រោះដល់កម្មករទោះបីមិនបានដល់ ១២០ ឬ ១១៤ ដុល្លារអាមេរិក យ៉ាងហោចបាន ៧០ ដុល្លារអាមេរិកដូចដែលរាជរដ្ឋាភិបាលបាន សន្យាក៏បានដែរ ។ ម្យ៉ាងទៀតអ្នកបញ្ជាទិញពួកគេធ្លាប់ទទួលផលចំណេញពីវិស័យនេះ គួរមានការចូលរួមចំណែកជួយដល់កម្មករ ។ ដូចនេះបើជំងឺនេះមិនរីករាលដាលខ្លាំង បើ ផុតរយៈពេល ៣ ខែកម្លាំងពលកម្មនៅមានដដែល ដូចនេះស្ថានភាពសេដ្ឋកិច្ច និងស្ថាន ភាពនៃការធ្វើជំនួញរបស់ពួកគាត់នៅដំណើរទៅមុខ» ។
លោកបានលើកឡើងថា បើនៅពីរខែទៀតអត់មានការបញ្ជាទិញថ្មីទេ មានន័យថាចំនួន រោងចក្រព្យួរនឹងកើនធំទៅៗហើយចំនួននៃការបិទរោងចក្រក៏ធំដូចគ្នា ។ អ៊ីចឹងសក្តានុពល នៃការស្តារឡើងវិញក៏មានការលំបាកទៅៗ ព្រោះទំហំនៃការបាត់បង់ការងារខ្ពស់ ហើយ ទំហំអត់មានប្រាក់ចំណូលចិញ្ចឹមគ្រួសារក៏ខ្ពស់វាធ្វើឱ្យពិបាកក្នុងការស្តារឡើងវិញ ៕
ចែករំលែកព័តមាននេះ