រាជធានីភ្នំពេញ ៖ ចាប់ពីថ្ងៃទី២២ ដល់២៨ ខែមេសា ឆ្នាំ២០២០ខាងមុខនេះ កម្ពុជានឹងចុះត្រជាក់ដល់២៣អង្សាសេ ព្រមទាំងមានភ្លៀងធ្លាក់រាយប៉ាយលើផ្ទៃប្រទេស ហើយមានបាតុភូត ផ្គរ រន្ទះ និងខ្យល់កន្ត្រាក់ ។ នេះ បើតាមក្រសួងធនធានទឹក និងឧតុនិយម ។
សេចក្តីជូនដំណឹងចេញផ្សាយនៅថ្ងៃទី២១ ខែមេសានេះ ស្តីពីស្ថានភាពធាតុអាកាសចាប់ពីថ្ងៃទី២២ ដល់២៨ ខែមេសា ឆ្នាំ២០២០ ក្រសួងធនធានទឹកបានឲ្យដឹងថា តាមរយៈការតាមដានស្ថានភាពអាកាសធាតុជាប់ជាបន្ត សង្កេតឃើញថា ជ្រលងសម្ភាធទាបអូសបន្លាយលើកម្ពុជាជាមួយនឹងខ្យល់បក់មកពីសមុទ្រចិនខាងត្បូង ។
ក្រសួងបន្តថា ស្ថានភាពបែបនេះធ្វើឲ្យចាប់ពីថ្ងៃទី២៣ ដល់២៨ ខែមេសា ភ្លៀងនឹងបង្កើនធ្លាក់រាយប៉ាយជាលំដាប់ នៅក្នុងក្របខណ្ឌលើកផ្ទៃប្រទេស ខណៈធាតុអាកាសក្តី និងអាចថមថយមួយកម្រិត ។
ក្រសួងបានបន្ថែមថា ស្ថានភាពបែបនេះ បណ្តាខេត្តនៅតំបន់វាលទំនាបកណ្តាល មានសីតុណ្ហភាពអប្បរមាពី២៥ ដល់២៧អង្សាសេ និងសីតុណ្ហភាពអតិបរមា មានពី៣២ ដល់៣៥អង្សាសេ នឹងអាចមានភ្លៀងធ្លាក់រាយប៉ាយនៅក្នុងកម្រិតពីតិចទៅច្រើន ។
ចំណែកបណ្តាខេត្តនៅតំបន់ជួនភ្នំដងរែក និងខ្ពស់រាបឦសាន មានសីតុណ្ហភាពអប្បរមា ពី២៣ ដល់២៦អង្សាសេ និងសីតុណ្ហភាពអតិរមាមានពី៣១ ដល់៣៤អង្សាសេ នឹងអាចមានធ្លៀងធ្លាក់រាយប៉ាយនៅក្នុងកម្រិតពីតិចទៅច្រើន។ និងតំបន់បណ្តាខេត្តនៅតំបន់មាត់សមុទ្រ មានសីតុណ្ហភាពអប្បរមា ពី២៥ ដល់២៧អង្សាសេ និងសីតុណ្ហភាពអតិរមាពី៣១ ដល់៣៣ អង្សាសេ នឹងអាចមានភ្លៀងធ្លាក់រាយប៉ាយនៅក្នុងកម្រិតពីតិចនទៅច្រើន ។
ជាមួយគ្នានោះដែរ ក្រសួងក៏បានអំពាវនាវដល់ប្រជាពលរដ្ឋនៅទូទាំងប្រទេសមានការប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់ដែលអាចកើតមាន ជាពិសេសនៅបណ្តាខេត្តនៅតំបន់រាលទំនាបកណ្តាល និងជួរភ្នំដងរែក ចាប់ពីថ្ងៃទី២៣ ដល់២៥ ខែមេសា ឆ្នាំ២០២០៕
ចែករំលែកព័តមាននេះ