ខេត្តបន្ទាយមានជ័យ ៖ បន្ទាប់ពីទទួលបានការសាកសួររួច បច្ចុប្បន្ន ស្ត្រីជាប្រពន្ធដៃដល់រូបនេះ ត្រូវបានកម្លាំងនគរបាលជំនាញកសាងសំណុំរឿងបញ្ជូនទៅស្នងការដ្ឋាននគរបាលខេត្តបន្ទាយមានជ័យ ដើម្បីចាត់ ការបន្តតាមនិតិវិធីច្បាប់ ។ ក្រោយពីប្រមូលបានចម្លើយសារភាពថា មូលហេតុដែលខ្លួនយកផ្លែឡាមទៅ អារ.កប្តីនោះ ក៏ព្រោះតែខ្លួនស្រវឹងស្រា ហើយប្រច័ណ្ឌប្តី រួមទាំងចូលឆ្នាំខ្មែរ គ្មានលុយគ្មានកាក់ផងនោះ ក៏មានក្តីក្រហាយបែបនេះតែម្តង ។
សូមបញ្ជាក់ថា បុរសជាប្តីបានហូរឈាមជោកពេញខ្លួន ក្រោយត្រូវស្ត្រីជាប្រពន្ធ បានចាប់ទាញស្លឹកត្រចៀកនិងចាប់អារ.កបង្កឲ្យមានការភ្ញាក់ផ្អើលយ៉ាងខ្លាំង ។ ហេតុការណ៍កើតឡើងនៅវេលាម៉ោង៨ និង៤៥នាទីយប់ថ្ងៃទី១៦ មសា ស្ថិតនៅចំណុចភូមិបន្ទាយថ្មី ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ប៉ុន្តែបុរសជាប្តីត្រូវបានសង្គ្រោះជីវិតទាន់ពេល ។
លោកវរសេនីយ៍ទោសែស វិបុល អធិការនគរបាលស្រុកអូរជ្រៅបានឲ្យដឹងថា បុរសរងគ្រោះជាប្តីឈ្មោះ គុជ អាយុ៤១ឆ្នាំ និងប្រពន្ធជនដៃដល់ ឈ្មោះទឹម ម៉ៅ អាយុ៣២ឆ្នាំ ទាំង២នាក់មានទីលំនៅក្នុងភូមិបន្ទាយថ្មី ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
លោកអធិការបានបញ្ជាក់ថា៖ នៅយប់កើតហេតុបុរសជាប្តីកំពុងផឹកស្រា រាំលេងសប្បាយជាមួយអ្នកភូមិ នៅពេលកំពុងអង្គុយផឹកសប្បាយនោះ ស្ត្រីជាប្រពន្ធបានដើរទៅជិតប្តី ហើយចាប់ទាញស្លឹកត្រចៀក ពេលនោះ ប្តីស្មានតែចាប់ទាញស្លឹកត្រចៀក ក្នុងន័យខ្នាញ់ចង់ថើបក៏អោនក្បាល ស្រាប់តែប្រពន្ធអារ.កនិងផ្លែឡាម បណ្តាលឈាមជោករហូតដួលសន្លប់នៅនឹងកន្លែង ។ ភ្លាមនោះ ត្រូវបាននាំបញ្ជូនទៅមណ្ឌលសុខភាពអូរបីជាន់ជួយព្យាបាលនិងសង្គ្រោះ តែដោយឈាមហូរខ្លាំងពេក បុគ្គលិកមណ្ឌលបានបញ្ជូនទៅមន្ទីរពេទ្យបង្អែកក្រុងប៉ោយប៉ែតវិញ ។
ចែករំលែកព័តមាននេះ