ខេត្តប៉ៃលិន ៖ កាលពីព្រឹកថ្ងៃទី៩ ខែមេសា ឆ្នាំ២០២០ ដើម្បីលើកកំពស់សោភ័ណ្ឌភាព សម្រាប់ភ្ញៀវទេសចរណ៍ជាតិ និងអន្តរជាតិមកកម្សាន្តនៅរមណីយដ្ឋានទឹកធ្លាក់អូរតាវ៉ៅ លោក ផាន់ ចាន់ធុល អភិបាលខេត្តប៉ៃលិន អមដំណើរដោយលោក ស៊ុន យី អភិបាលក្រុងប៉ៃលិន ព្រមទាំងមន្ត្រីជំនាញពាក់ព័ន្ធបានចុះពិនិត្យមើល និងសម្របសម្រួល ការរុះរើសំណង់នៅលើដីចំណីផ្លូវ ដែលកំពុងស្ថាបនាប្រវែង៧គីឡូម៉ែត្រ ជាប្រភេទកៅស៊ូ DBST ទៅកាន់រមណីយដ្ឋានធម្មជាតិទឹកធ្លាក់អូរតាវ៉ៅ ។
លោក ផាន់ ចាន់ធុល អភិបាលខេត្តមានប្រសាសន៍ថា រាជរដ្ឋាភិបាលកម្ពុជាបានខិតខំប្រឹងប្រែងដោះស្រាយនូវរាល់ការលំបាក និងសំណូមពររបស់ប្រជាពលរដ្ឋ ព្រមទាំងបានខិតខំកសាងអភិវឌ្ឍន៍ប្រទេសជាតិឱ្យមានការរីកចម្រើនលើគ្រប់វិស័យ ជាពិសេសការកសាងហេដ្ឋារចនាសម័ន្ធរូបវ័ន្តនានាដូចជា ផ្លូវ ស្ពាន សាលារៀន និងមន្ទីរពេទ្យជាដើម ។ ខណៈបច្ចុប្បន្ននេះ រដ្ឋបាលខេត្តប៉ៃលិនបានកែលម្អហេដ្ឋារចនាសម្ព័ន្ធសាធារណៈនានា ជាពិសេសអភិវឌ្ឍតំបន់រមណីយដ្ឋានទេសចរណ៍នៅក្នុងខេត្តឱ្យបានកាន់តែល្អឡើង ដើម្បីទាក់ទាញភ្ញៀវជាតិ អន្តរជាតិមកកំសាន្តក្នុងខេត្តប៉ៃលិនឱ្យកាន់តែច្រើន ដែលជាកត្តាមួយចូលរួមចំណែកក្នុងការជំរុញកំណើនសេដ្ឋកិច្ចជីវភាពរបស់ប្រជាពលរដ្ឋឱ្យប្រសើរឡើង ។
ក្នុងឱកាសនោះដែរ លោក ផាន់ ចាន់ធុល ក៏បានផ្តាំផ្ញើដល់ប្រជាពលរដ្ឋ ដែលប្រើប្រាស់ផ្លូវ និងរស់នៅសងខាងផ្លូវទាំងអស់ មេត្តាផ្តល់កិច្ចសហការ និងសម្របសម្រួលនូវផលប៉ះពាល់ ជាពិសេសសំណង់ ដែលរំលោភលើដីចំណីផ្លូវ ធ្វើយ៉ាងណាឱ្យការស្ថាបនាផ្លូវនេះ បានឆាប់រហ័សទៅតាមផែនការគ្រោងទុក និងសោភ័ណភាព ព្រមទាំងចូលរួមជួយថែរក្សាទាំងអស់គ្នា ដើម្បីធានាឱ្យការប្រើប្រាស់បានយូរអង្វែង ។
សូមបញ្ជាក់ថា រមណីយដ្ឋានធម្មជាតិទឹកធ្លាក់អូរតាវ៉ៅ ជារមណីយដ្ឋានធម្មជាតិល្បីជាងគេនៅក្នុងខេត្ត ដែលមានទឹកធ្លាក់រហូតដល់៧ជាន់ ហើយមានចម្ងាយចេញពីផ្លូវជាតិលេខ៥៧ ប្រមាណជាង៧គីឡូម៉ែត្រ ស្ថិតនៅក្នុងភូមិកូនខ្លុង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ៕ (កែសម្រួលដោយ ៖ ធីតា)
ចែករំលែកព័តមាននេះ