ខេត្តព្រះវិហារ ៖ បើតាមសេចក្តីរាយការណ៍បានឱ្យដឹងថា ស្ត្រីម្នាក់ត្រូវរន្ទះបាញ់បណ្តាលឱ្យបាត់បង់ជីវិតនៅនឹងកន្លែងកើតហេតុ ខណៈស្ត្រីរងគ្រោះកំពុងធ្វើចម្ការនៅក្បែរផ្ទះ កាលពីម៉ោង៤រសៀលថ្ងៃទី០៧ ខែមេសា ឆ្នាំ២០២០ ត្រង់ចំណុចទំនប់សីម៉ា ស្ថិតក្នុងភូមិស្វាយ ឃុំជាំក្សាន្ត ស្រុកជាំក្សាន្ត ខេត្តព្រះវិហារ។
សេចក្តីរាយការណ៍បន្តថា ស្ត្រីរងគ្រោះខាងលើឈ្មោះ សួស ណាំ អាយុ៣៧ឆ្នាំ រស់នៅភូមិស្វាយ ឃុំជាំក្សាន្ត ស្រុកជាំក្សាន្ត ខេត្តព្រះវិហារ។
បើតាមលោកនាយសេនាធិការដ្ឋាន នៃស្នងការដ្ឋាននគរបាលខេត្ត បានឱ្យដឹងថា កាលពីវេលាម៉ោង៤រសៀលថ្ងៃទី០៧ មេសា ម្សិលមិញនេះ មានករណីគ្រោះធម្មជាតិរន្ទះបាញ់ ស្ត្រីម្នាក់បណ្តាលឱ្យបាត់បង់ជីវិតនៅនឹងកន្លែងតែម្តង ខណៈពេលដែលស្ត្រីរងគ្រោះកំពុងតែធ្វើចម្ការនៅក្បែរផ្ទះ ត្រង់ចំណុចទំនប់សីម៉ាក្នុងភូមិស្វាយ ។
លោកបន្តថា ក្រៅពីករណីខាងលើនេះ ក៏នៅមានខ្យល់កន្ត្រាក់ ធ្វើឱ្យរបើកដំបូលផ្ទះប្រជាពលរដ្ឋ១គ្រួសារអស់មួយចំហៀងផងដែរ ។
សូមបញ្ជាក់ផងដែរថា គ្រោះធម្មជាតិរន្ទះបាញ់ និងខ្យល់កន្ត្រាក់ កាលពីម្សិលមិញនេះ រងប៉ះពាល់ចំពោះតែស្រុកជាំក្សាន្តប៉ុណ្ណោះនៅខេត្តព្រះវិហារ ។ (កែសម្រួលដោយ ៖ បុប្ផា)
ចែករំលែកព័តមាននេះ