រាជធានីភ្នំពេញ៖ ចំណូលពីការលក់សំបុត្រជូនភ្ញៀវទេសចរអន្តរជាតិចូលទស្សនារមណីយដ្ឋានអង្គរ បានធ្លាក់ចុះគួរអោយកត់សម្គាល់ នៅដើមឆ្នាំ ២០២០ ជាក់ស្ដែង បីខែនេះ គិតចាប់ពីខែមករា ដល់ខែមីនា ២០២០…
រាជធានីភ្នំពេញ៖ ចំណូលពីការលក់សំបុត្រជូនភ្ញៀវទេសចរអន្តរជាតិចូលទស្សនារមណីយដ្ឋានអង្គរ បានធ្លាក់ចុះគួរអោយកត់សម្គាល់ នៅដើមឆ្នាំ ២០២០ ជាក់ស្ដែង បីខែនេះ គិតចាប់ពីខែមករា ដល់ខែមីនា ២០២០ ចំណូលពីវិស័យនេះ បានតែជាង ១៧ លានដុល្លារអាមេរិកប៉ុណ្ណោះ ខណៈរាល់ឆ្នាំចំណូលជាមធ្យមប្រមាណជិត១០លានដុល្លារអាមេរិក ក្នុងមួយខែ ឬប្រមាណជិត ១០០លានដុល្លារអាមេរិកក្នុងមួយឆ្នាំ ។
យោងតាមស្ថិតិរបាយការណ៍របស់គ្រឹះស្ថានអង្គរ ដែលជាអ្នកលក់សំបុត្រទៅភ្ញៀវបរទេសចូលទស្សនារមណីយដ្ឋានអង្គរបានបង្ហាញថាក្នុងរយៈពេលបីខែ ភ្ញៀវទេសចរបរទេសដែលទិញប័ណ្ណ ទស្សនារមណីយដ្ឋានអង្គរ មានចំនួនជាង៣៨ម៉ឺន៣ពាន់នាក់ បើធៀបនឹងរយៈពេលដូចគ្នា កាលពីឆ្នាំ ២០១៩ ថយចុះដល់ទៅជាងពាក់កណ្ដាល ពោលគឺប្រមាណ៥១,៣១ភាគរយ ។ ចំណែកឯទឹកប្រាក់ដែលទទួលបានពីការលក់សំបុត្រនេះបានប្រមាណ១៧លាន ៩១ម៉ឺន៩ពាន់ដុល្លារអាមេរិកប៉ុណ្ណោះ ពោលគឺបានធ្លាក់ចុះប្រមាណជាងពាក់កណ្ដាលដូចគ្នា ពោលគឺជាង ៥០,១៦ភាគរយ ។
របាយការណ៍នេះ ក៏បានបង្ហាញពីស្ថិតិនៅក្នុងខែ មីនា ២០២០នេះដែរ ជាខែដែលពេញស៊ុប ឬវាយលុកយ៉ាងខ្លាំងដោយជំងឺកូវីដ ១៩ មិនថាតែកម្ពុជានោះទេ ពោលគឺនៅទូទាំងសកលលោកទាំងមូល ។ ក្នុងខែមីនានេះតែម្តង ចំនួនភ្ញៀវទេសចរបរទេសដែលទិញប័ណ្ណទស្សនារមណីយដ្ឋានអង្គរ មានចំនួន៤ម៉ឺន២ពាន់ ១៦៩នាក់ បើធៀបនឹងខែមីនា ឆ្នាំមុនធ្លាក់ចុះដល់៨២,៦៩ភាគរយ ។ ចំណែកចំណូលវិញបានតែជាង១លាន៧០ម៉ឺន ៦ពាន់ដុល្លារអាមេរិកប៉ុណ្ណោះ គឺធ្លាក់ដល់ទៅ ៨៤,៣១ភាគរយធៀបនឹងឆ្នាំ ខែមីនា ឆ្នាំ ២០១៩ ។
ការធ្លាក់ចុះភ្ញៀវទេសចរបរទេសទស្សនាតំបន់អង្គរ គឺចាប់ផ្ដើមតាំងពីឆ្នាំ ២០១៩មកម្ល៉េះ ដោយមតិខ្លះថា មកពីការកែប្រែតម្លៃសំបុត្រ និងមតិខ្លះថា មកពីប្រតិបត្តិករទេសចរ ជាអ្នកធ្វើអោយភ្ញៀវបរទេសមិនចង់មកទស្សនាម្ដងទៀត ។ ក៏ប៉ុន្តែសម្រាប់ឆ្នាំ ២០២០ ឃើញថា ទាំងរដ្ឋាភិបាល និងឯកជន បានផ្ដួចផ្ដើម និងរៀបចំគម្រោងរួចរាល់ក្នុងការទាក់ទាញភ្ញៀវទេសចរបរទេសមកទស្សនាតំបន់អង្គរក្នុងខេត្តសៀមរាបឡើងវិញ តែជាអកុសល នៅចុងឆ្នាំ ២០១៩ និងឆ្នាំ ២០២០ នេះ ពិភពលោកទាំងមូលបានជួបវិបត្តិធំមួយគឺ ជំងឺកូវីដ ១៩ ដែលប្រទេសនានាលើពិភពលោ បានហាមប្រាមពលរដ្ឋខ្លួន ក្នុងការធ្វើដំណើរកម្សាន្ត ព្រមទាំងបានបិទជើងហោះហើរទៅកាន់គោលដៅមួយចំនួនផងដែរ ។
ការធ្លាក់ចុះនៃភ្ញៀវទេសចរទាំងនេះ បានជំរុញអោយប្រតិបត្តិករទេសចរជាច្រើន កំពុងជួបវិបត្តិធ្ងន់ធ្ងរ ដូចជាក្រុមហ៊ុនភ្នាក់ងារទេសចរណ៍ អាជីវកម្មសណ្ឋាគារ ផ្ទះសំណាក់ និងសេវាកម្មទេសចរណ៍ផ្សេងទៀត ក៏ត្រូវបានបិទនិងផ្អាកផងដែរ ។
បើយោងតាមរបាយការណ៍របស់សមាគមន៍សណ្ឋាគារបានឲ្យដឹងថាយ៉ាងហោចណាស់មានសណ្ឋាគារសរុប ៣៧ សណ្ឋាគារបានបិទទ្វារនៅភ្នំពេញ សៀមរាប ខេត្តព្រះសីហនុ ខេត្តកែប រតនគីរី ក្រចេះ កំពង់ធំ និងកំពង់ឆ្នាំ គិតត្រឹមបំណាច់ខែមីនា ឆ្នាំ២០២០ នេះ ៕
ចែករំលែកព័តមាននេះ