រាជធានីភ្នំពេញ ៖ ក្រសួងសុខាភិបាលបានអោយដឹងនៅថ្ងៃនេះថា អ្នកជំងឺកូវីដ១៩ចំនួនជិតពាក់កណ្តាលក្នុងចំណោមអ្នកជំងឺ១១៤នាក់បានជាសះស្បើយគិតត្រឹមថ្ងៃទី៤ ខែមេសា បន្ទាប់ពីមានអ្នកជាសះស្បើយម្នាក់ទៀត។
ក្រសួងបានអោយដឹងថា ពុំមានករណីថ្មីត្រូវបានរកឃើញឡើយ ប៉ុន្តែមានអ្នកជាសះស្បើយម្នាក់ ដោយធ្វើអោយចំនួនអ្នកជាសះស្បើយឡើងដល់៥០នាក់ ខណៈដែល៦៤នាក់ទៀត កំពុងតែទទួលការព្យាបាល។
ការជាសះស្បើយកាន់តែច្រើន ការរកឃើញថ្មីប្រចាំថ្ងៃមានតិចតួចឬគ្មានសោះ និងគ្មានអ្នកស្លាប់ដោយ សារកូវីដ១៩ ជាសញ្ញាដំបូងនៃជោគជ័យរបស់កម្ពុជាក្នុងការប្រឆាំងនឹងមេរោគកូវីដ១៩។
ប៉ុន្តែសម្តេចតេជោបានព្រមានថាយើងត្រូវតែប្រយ័ត្នដើម្បីកុំអោយប្រជាជនកម្ពុជាណាម្នាក់ស្លាប់ដោយសារជំងឺនេះ។
សម្តេចតេជោក៏បានប្រកាសការត្រៀមកាន់តែខ្លាំងសម្រាប់ករណីអាក្រក់ដែលអាចកើតមានដោយបានណែនាំអោយមានការស្តុកម៉ាសមុខដល់១០លានម៉ាស អាល់កុលមួយលានលីត្រ ការយកចិត្តទុក ដាក់កាន់តែខ្លាំងដល់គ្រូពេទ្យ និង វិធានាការស្តុកស្បៀងកាន់តែច្រើន៕
ចែករំលែកព័តមាននេះ