លោក ប្រេន ហ្វ្លូវវើ (Brent Flower) ដែលមានឈ្មោះក្រៅថា ហេមមើ (Hammer) បាននិយាយថាលោកមានអារម្មណ៍ថាខ្លួនដូចចេះហោះហើរបន្ទាប់ពីបោះបង់អ្វីគ្រប់យ៉ាងដែលជាកម្មសិទ្ធិរបស់ខ្លួន ។
លោកបានប្រាប់សារព័ត៌មាន ABC ថាលោកមិនបានស្តាយក្រោយសោះឡើយដែលបានដើរចេញពីអាជីវកម្មដែលធ្វើឲ្យលោកក្លាយជាសេដ្ឋីមួយរូបដើម្បីមករស់នៅក្រោមដើមឈើលើកោះមួយរបស់ប្រទេសអូស្ត្រាលី ។លោកបាននិយាយថា មនុស្សជាច្រើនគិតថាមនុស្សត្រូវការរបស់ច្រើនដើម្បីមានសុភមង្គល ប៉ុន្តែលោកមិនយល់ស្របនឹងគំនិតនេះទេ ។
លោក ហេមើ ធំដឹងក្តីលើកោះ North Island នៃប្រទេសនូវែលសេឡង់ និងបានក្លាយជាអាជីវករមួយរូបដែលធ្វើដំណើរជំវុញពិភពលោកដើម្បីកាត់រោមជៀមដែលធ្វើឲ្យលោកក្លាយជាសេដ្ឋី ។ប៉ុន្តែសម្រាប់លោក ទ្រព្យសម្បត្តិ និងសម្ភារៈមិនបាននាំយកនូវសុភមង្គលជូនលោកទេ ។ ផ្ទុយមកវិញលោកគិតថាវាគ្រាន់តែចាំធូលីកាន់ប៉ុណ្ណោះ។ មិនយូរប៉ុន្មានលោកចាប់ផ្តើមសួរខ្លួនឯងឡើងវិញពីគោលដៅពិតប្រាកដក្នុងជីវិតរបស់លោកដែលធ្វើឲ្យលោកសម្រេចចិត្តផ្ទេរទ្រព្យសម្បត្តិទាំងអស់ឲ្យទៅគូស្នេហ៍មុននឹងរត់ចេញពីផ្ទះដោយមានតែវ៉ាលីមួយជាប់ខ្លួនប៉ុណ្ណោះ ។
ពេលនោះគឺជាពេលដែលលោកបានរៀនសូត្រជាច្រើនទាំងពីការអប់រំខ្លួនឯង និងពីបណ្ណាល័យសាធារណៈ និងព្រមទាំងបទពិសោធន៍ផងដែរ ។ពេលដែលលោកបានធ្វើដំណើរមកកាន់កោះមួយក្នុងប្រទេសអូស្ត្រាលីដែលមានឈ្មោះថាTasmania លោកបានសម្រេចចិត្តទៅរកអ្នកជំនាញឲ្យជួយលោក ហើយអាជ្ញាធរដែលជាប់ពាក់ព័ន្ធបានផ្តល់ជំនួយដល់លោកផងដែរ ។ បន្ទាប់មកលោកបានសម្រេចចិត្តចូលរួមដល់សង្គមវិញដូចជាជួយដល់សហគមន៍តូចៗ និងថែមទាំងចូលរួមក្រុមការពារបរិស្ថានដែលមិនរកប្រាក់ចំណូលផងដែរ ។ព្រោះតែលោកជាជនជាតិនូវែលសេឡង់ លោកមិនអាចទទួលបានជំនួយច្រើនពីរដ្ឋាភិបាលអូស្ត្រាលីឡើយ ប៉ុន្តែលោកគិតថាវាជារឿងល្អវិញព្រោះលោកមិនចឹងពឹងផ្អែកលើនរណាទេព្រោះវាប្រៀបបានជាអន្ទាក់មួយ ។
លោកមានតែដើមឈើមួយប៉ុណ្ណោះ ដែលលោកសម្រាកនៅក្រោមជារៀងរាល់យប់អស់រយៈពេល២ឆ្នាំមកហើយ ។ លោកបានសម្រេចចិត្តចាកចេញពីកោះខាងលើ និងធ្វើដំណើរទៅកាន់កោះ Kangaroo នៅអូស្ត្រាលីខាងត្បូងវិញដើម្បីធ្វើការស្ម័គ្រចិត្តជួយកសិដ្ឋានដែលទទួលរងការប៉ះពាល់ពីភ្លើងឆេះព្រៃក្នុងពេលថ្មីៗនេះ ៕
ចែករំលែកព័តមាននេះ