អ្នកប្រហែលជាស្គាល់មនុស្សម្នាក់ ឬពីរនាក់ហើយដែលចូលចិត្តអួតអាងពីខ្លួនឯង ឬអ្វីដែលខ្លួនមាន ។ ភាគច្រើនមនុស្សទាំងនេះមិនជំរុញទឹកចិត្តដល់មនុស្សជុំវិញខ្លួនទេ តែមានតែទាក់ទាញការស្អប់ទៅវិញ ។ ប៉ុន្តែការចង្អុលបង្ហាញពីសមត្ថភាពខ្លួន ឬអ្វីដែលខ្លួនបានសម្រេចកន្លងមកអាចជាឱកាសមួយក្នុងការរកលុយបន្ថែម ។
តើអ្នកគួរធ្វើយ៉ាងណាដើម្បីលើកកម្ពស់ខ្លួនឯងចៀសវាងការបង្ហាញអំនួតលើខ្លួនឯងដែលធ្វើឲ្យអ្នកដទៃមិនចូលចិត្ត?
១. ពិនិត្យមើលគោលបំណងរបស់អ្នក
តើអ្នកកំពុងតែចង់លើកកម្ពស់អ្វី?នរណានឹងទទួលបានអត្ថប្រយោជន៍ពីការលើកកម្ពស់នេះ? បើអ្នកចង់ចែករំលែកពីគំនិតមួយដែលអ្នកមានដែលអាចជួយដល់ក្រុមមនុស្សច្រើននោះ អ្នកគួរតែផ្តោតស្មារតីលើគោលដៅនេះ។ ប្រសិនបើអ្នកចង់លើកកម្ពស់ខ្លួន និងបទពិសោធន៍របស់ខ្លួននោះអ្នកគួរតែផ្តោតស្មារតីលើជំនាញ និងការលូតលាស់របស់អ្នក ។
២. ចៀសវាងប្រើពាក្យដែលបំបិទអ្នកដទៃ
មនុស្សដែលចូលចិត្តអួតអាងជាមនុស្សដែលប្រើភាសាដែលធ្វើឲ្យអ្នកស្តាប់ឮតែពីពួកគេ ។ ដូចជាការនិយាយពីការជោគជ័យរបស់ខ្លួនដោយមិនលើកឡើងពីមនុស្សជុំវិញខ្លួនដែលបានជួយដល់ពួកគេជាដើម ។ ដើម្បីចៀសវាងធ្វើជាមនុស្សបែបនេះ អ្នកគួរតែគិតពីកិច្ចការដែលអ្នកបានសម្រេចឡើងវិញថាតើមាននរណាខ្លះដែលបានចូលរួមជួយដល់អ្នក ។ បន្ទាប់មកព្យាយាមចៀសវាងប្រើពាក្យថា «ខ្ញុំ» និងជំនួសវាដោយ «ពួកយើង» ។
៣. រៀបរាប់ដូចរឿងនិទាន
ការបកស្រាយពីការសម្រេចរបស់អ្នកក្នុងទម្រង់ជារឿងនិទានអាចជួយឲ្យអ្នករៀបរាប់វាបានដ៏គួរឲ្យទាក់ទាញ ។ វាអាចបង្ហាញពីឧបសគ្គដែលអ្នកបានជួបប្រទះ និងអ្វីដែលអ្នកបានធ្វើដើម្បីសម្រេចបានជោគជ័យជាដើម ។ កត្តាសំខាន់ដែលអ្នកត្រូវចងចាំ គឺការដាក់ខ្លួន ។ អ្នកមិនគួរកុហកទេ ប៉ុន្តែអ្នកត្រូវបង្ហាញពីសមត្ថភាព និងតម្លៃខ្លួនពិតប្រាកដ ។ បើសិនជាអាច អ្នកគួររៀបចំជាភស្តុតាងបង្ហាញកាន់តែល្អ ៕
ចែករំលែកព័តមាននេះ