ប្រទេសបារាំង-អាមេរិក ៖ មន្ត្រីបារាំងមួយរូប បានថ្លែងប្រាប់សារព័ត៌មាន RT ថា អាមេរិកបានស្ទាត់ទិញម៉ាស ប្រមាណ៦០លានម៉ាស នៅក្នុងអាកាសយានដ្ឋាន ក្នុងពេលដែលយន្តហោះត្រៀមហោះហើរដឹកម៉ាស់ទាំងនោះ ទៅកាន់ប្រទេសបារាំង ។
ដោយសារការឆ្លងរាលដាលខ្លាំងនៃវីរុស COVID-19 លើពិភពលោក ម៉ាសកំពុងមានការខ្វះខាត និងត្រូវការខ្លាំងបំផុតគ្រប់ទីកន្លែងទាំងអស់ ហើយម៉ាសជាច្រើនត្រូវបានគេពង្វាងយកទៅ ជាពិសេសនៅលើទីលាននៃព្រលានយន្កហោះតែម្ដង ។
លោក RENAUD MUSELIER ប្រធាន តំបន់ PROVENCES ALPES COTE D’AZUR បារាំងអះអាងថា ទំនិញជាម៉ាសដែលតំបន់របស់លោកបានបញ្ជាទិញ ត្រូវបានពង្វាងឆ្ពោះទៅកាន់សហរដ្ឋអាមេរិក នៅទីលាននៃព្រលានយន្តហោះចិនមួយ។ ប្រទេសជាច្រើនមានការខ្វះខាតម៉ាស សម្រាប់បំពាក់ឲ្យបុគ្គលិកពេទ្យ និងប្រជាជនពួកគេ ហើយប្រទេសមួយចំនួនពុំរារែកឡើយក្នុងការអនុវត្តវីធីស្មោកគ្រោក ដោយដណ្ដើមកាក់យកទំនិញនោះពីអ្នកដទៃ។
លោក RENAUD MUSELIER បានលាតត្រដាងថា លោកបញ្ជាទិញម៉ាសជាច្រើនលាន ពីអ្នកផ្គត់ផ្គង់ចិនមួយ សម្រាប់ផ្ដល់ឲ្យបណ្ដាគ្រឹះស្ថានសុខាភិបាលរបស់តំបន់ តែទំនិញពុំបានបញ្ជូនមកកាន់គោលដៅដែលបានគ្រោងទុកឡើយ ។
កាលពីព្រឹកថ្ងៃទី៣១ មីនា ២០២០ នៅព្រលានយន្តហោះចិនមួយ ការបញ្ជាទិញម៉ាសរបស់បារាំង ត្រូវបានស្ទាក់ទិញយកដោយពួកអាមេរិក ដែលឲ្យប្រាក់ផ្ទាល់ដៃតែម្តង ហើយយន្តហោះដែលដឹកម៉ាសដែលត្រូវមកកាន់បារាំង បែរជាហោះចេញត្រង់ឆ្ពោះទៅកាន់សហរដ្ឋអាមេរិកវិញ ។ ហើយទំនិញដែលដឹកទៅកាន់បារាំង ត្រូវចាំជើងក្រោយ ។
ប្រឈមមុខនឹងបញ្ហាបែបនេះ លោកអះអាងថា កំពុងតែឲ្យមានកិច្ចការពារទំនិញ នៅព្រលានយន្តហោះតែម្ដង ដើម្បីកុំឲ្យមានការរំលោភបំពានបែបនោះទៀត ។
ប្រធានតំបន់ឯទៀតៗរបស់បារាំង ក៏អះអាងប្រាប់កាសែត LIBERATION ដោយមិនបញ្ចេញឈ្មោះដែរថា ពួកអាមេរិក ត្រៀមធ្វើយ៉ាងណា ក៏ដោយឲ្យតែបានម៉ាស ហើយពួកអាមេរិក ហ៊ានឲ្យថៃ្លខ្ពស់ ដល់ទៅទ្វេដង ក៏មានដែរ។
សហរដ្ឋអាមេរិក គឺជាប្រទេសដែលរងការរាតត្បាតខ្ពស់បំផុត នៅលើពិភពលោក ខណៈពេលដែលចំនួនអ្នកឆ្លងវីរុសនេះមានចំនួនជាង ២១០.០០០ នាក់ហើយ និងចំនួនអ្នកស្លាប់បានកើនឡើងដល់ជាង ៥.០០០ នាក់។ ប្រទេសបារាំងក៏ទទួលរងការវាយប្រហារយ៉ាងធ្ងន់ធ្ងរផងដែរ លំដាប់លេខ៦ លើពិភពលោក ដោយមានឆ្លងជាង ៥,៦០០ករណី និងមានមនុស្សប្រមាណ ៤.០០០ នាក់បានស្លាប់ (តួលេខនេះ គិតត្រឹមម៉ោង៥ល្ងាចថ្ងៃទី២ មេសា ២០២០) ៕
ចែករំលែកព័តមាននេះ