រាជធានីភ្នំពេញ ៖ ព្រៃត្រឹបនិងកំប្លោកងាប់ៗក្នុងប្រឡាយអូវែង ត្រូវបានអគ្គីភ័យឆាបឆេះយ៉ាងសន្ធោសន្ធៅអស់រយៈពេលប្រមាណជិត៤ម៉ោង បង្កឱ្យប្រជាពលរដ្ឋមានការភ្ញាក់ផ្អើល និងភ័យខ្លាចឆេះរាលដាលទៅលំនៅឋានដែលនៅជាប់មាត់ប្រឡាយ។ ហេតុកាណ៍អគ្គីភ័យខាងលើនេះបង្កអោយមានការភ្ញាក់ផ្អើលកាលពីវេលាម៉ោងប្រមាណ៥និង៣០នាទីល្ងាចថ្ងៃទី២៨ ខែមីនា ឆ្នាំ ២០២០…
រាជធានីភ្នំពេញ ៖ ព្រៃត្រឹបនិងកំប្លោកងាប់ៗក្នុងប្រឡាយអូវែង ត្រូវបានអគ្គីភ័យឆាបឆេះយ៉ាងសន្ធោសន្ធៅអស់រយៈពេលប្រមាណជិត៤ម៉ោង បង្កឱ្យប្រជាពលរដ្ឋមានការភ្ញាក់ផ្អើល និងភ័យខ្លាចឆេះរាលដាលទៅលំនៅឋានដែលនៅជាប់មាត់ប្រឡាយ។
ហេតុកាណ៍អគ្គីភ័យខាងលើនេះបង្កអោយមានការភ្ញាក់ផ្អើលកាលពីវេលាម៉ោងប្រមាណ៥និង៣០នាទីល្ងាចថ្ងៃទី២៨ ខែមីនា ឆ្នាំ ២០២០ នៅចំណុចប្រឡាយអូរវែង ស្ថិតក្នុងក្រុមទី១៣ ភូមិក្រោលគោ សង្កាត់គីឡូម៉ែត្រ៦ ខណ្ឌឬស្សីកែវ រាជធានីភ្នំពេញ ។
តាមប្រភពព័ត៌មានឱ្យដឹងថា នៅមុនពេលកើត គេឃើញអ្នកភូមិម្នាក់បានប្រមូលសំរាមក្បែរផ្ទះដុត ជាហេតុធ្វើអោយភ្លើងឆេះរាលដាលទៅដល់ព្រៃក្នុងប្រឡាយបង្កអោយមានការភ្ញាក់ផ្អើលយ៉ាងខ្លាំង ។ ដោយសារតែប្រឡាយអូរវែងពោរពេញទៅដោយព្រៃត្រឹប, កូនឈើ និងកំប្លោកងាប់ៗជាហេតុធ្វើអោយ ភ្លើងឆាបឆេះយ៉ាងសន្ធោសន្ធៅរាលដាលស្ទើរពេញផ្ទៃប្រឡាយទាំងមូល។ ភ្លាមៗ អាជ្ញាធរ និងកំលាំងនគរបាលប៉ុស្តិ៍ និងខណ្ឌក៏បានចុះដល់កន្លែងកើតហេតុ ហើយបានបំផុសចលនាកំលាំងប្រជាការពារ ព្រមទាំងប្រជាពលរដ្ឋ និងបានហៅរថយន្តពន្លត់អគ្គីភ័យទៅអន្តរាគមន៍បាញ់ពន្លត់។
តាមប្រភពពីនគរបាលអោយដឹងថា នៅក្នុងការឆាបឆេះនេះ រថយន្តពន្លត់អគ្គីភ័យនៅអន្តរាគមន៍បាញ់ពន្លត់ចំនួន៧គ្រឿង ក្នុងនោះរថយន្តរបស់ការិយាល័យនគរបាលបង្ការពន្លត់អគ្គីភ័យនិងសង្គ្រោះចំនួន៤គ្រឿង, រថយន្តពន្លត់អគ្គីភ័យរបស់ក្រុមហ៊ុនស្រាបៀរចំនួន២គ្រឿង និងរថយន្តពន្លត់អគ្គីភ័យរបស់សាលាខណ្ឌឬស្សីកែវចំនួន១គ្រឿង បានប្រើទឹកអស់ចំនួន២៩គ្រឿង ហើយភ្លើងបានរលត់ជាស្ថាពរនៅវេលាម៉ោង៩យប់ ដែលការឆាបឆេះនេះអស់រយៈពេលប្រមាណជិត៤ម៉ោង ។
តាមនគរបាលមូលដ្ឋានអោយដឹងថា អគ្គីភ័យនេះពុំបណ្តាលអោយឆេះរាលដាលដល់លំនៅឋាន និងមិនមានមនុស្សណាម្នាក់រងគ្រោះថ្នាក់ឡើយ ។ ជុំវិញការកើតមានអគ្គីភ័យខាងលើនេះដែរ ត្រូវនគរបាលបានអោយដឹងថា បណ្តាលមកពីដុតសំរាម ហើយភ្លើងបានឆេះរាលដាលទៅព្រៃយ៉ាងសន្ធោសន្ធៅតែម្តង ៕ (កែសម្រួលដោយ ៖ ធីតា)
ចែករំលែកព័តមាននេះ