ខេត្តប៉ៃលិន ៖ កាលពីវេលាម៉ោង១០ និង៣០នាទីព្រឹក ថ្ងៃទី២៨ មីនា បុគ្គលិកពិការជើងទាំងសងខាងម្នាក់របស់ក្រុមហ៊ុនអគ្គិសនីឯកជនមួយបានរៀបរាប់ប្រាប់ក្នុងការិយាល័យអគ្គិសនីថា រូបគេត្រូវបានមន្ត្រីយោធាស្រវឹងស្រា១ក្រុម មានគ្នាប្រហែល១០នាក់ បានបើករថយន្តចំនួន២គ្រឿង…
ខេត្តប៉ៃលិន ៖ កាលពីវេលាម៉ោង១០ និង៣០នាទីព្រឹក ថ្ងៃទី២៨ មីនា បុគ្គលិកពិការជើងទាំងសងខាងម្នាក់របស់ក្រុមហ៊ុនអគ្គិសនីឯកជនមួយបានរៀបរាប់ប្រាប់ក្នុងការិយាល័យអគ្គិសនីថា រូបគេត្រូវបានមន្ត្រីយោធាស្រវឹងស្រា១ក្រុម មានគ្នាប្រហែល១០នាក់ បានបើករថយន្តចំនួន២គ្រឿង ចូលទៅអុកឡុកពេញក្នុងការិយាល័យ និងវាយដំលើរូបគេ ព្រមទាំងជេរប្រមាថគ្រប់បែបយ៉ាង ក្រោយក្រុមហ៊ុនអគ្គិសនីបានផ្តាច់ប្រព័ន្ធភ្លើងប្រើប្រាស់ ដោយសារអត់បង់ប្រាក់ឱ្យក្រុមហ៊ុនអស់រយ:ពេល៦ខែមកហើយ ។
សូមបញ្ជាក់ថា ហេតុការណ៍ដែលក្រុមមន្ត្រីយោធាបើករថយន្តទៅវាយជនរងគ្រោះពិការដល់ក្នុងបន្ទប់ធ្វើការនេះ បានកើតឡើងកាលពីវេលាម៉ោង៤ និង៥០នាទីរសៀលថ្ងៃទី២៥ មីនា ២០២០ ស្ថិតក្នុងភូមិស្ទឹងត្រង់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។ ជនរងគ្រោះ មានឈ្មោះ សុខ ទិត្យា ភេទប្រុស អាយុ៣៦ឆ្នាំ ជាជនពិការជើងទាំងពីរ មានស្រុកកំណើតនៅភូមិទួលតាឯង សង្កាត់ទួលតាឯក ក្រុងបាត់ដំបង ខេត្តបាត់ដំបង បច្ចុប្បន្នស្នាក់នៅក្នុងភូមិឃុំកើតហេតុខាងលើ ។
បើតាមប្រភពព័ត៌មានពីលោក សុខ ទិត្យា ជាបុគ្គលិកពិការរបស់ក្រុមហ៊ុនអគ្គិសនីខាងលើ បានរៀបរាប់ឱ្យដឹងថា មូលហេតុដែលបង្កឱ្យមានរឿងរ៉ាវបែបនេះ គឺម្ចាស់ក្រុមហ៊ុនអគ្គិសនីខាងលើ បានចេញច្បាប់មួយ ឱ្យបុគ្គលិកដើរស្រង់បញ្ជីឈ្មោះអតិថិជន ដែលជំពាក់បំណុលថ្លៃភ្លើងអគ្គិសនីយូរខែ ។ ក្រោយមក ខាងក្រុមហ៊ុនអគ្គិសនីបានពិនិត្យឃើញបន្ទាយយោធាវរ:សេនាតូចការពារព្រំដែនលេខ៥០៤ ជំពាក់ថ្លៃភ្លើងរហូតដល់៦ខែសរុបចំនួន៣១៦៣១០០រៀល ក៏បញ្ជាឱ្យបុគ្គលិកចុះទៅបិទភ្លើង មិនឱ្យបន្តប្រើប្រាស់ទៀត ។
លុះបិទនៅពេលព្រឹកថ្ងៃទី២៤ មីនា ដល់ពេលយប់ជ្រៅ ស្រាប់តែគេលួចតភ្ជាប់ប្រើប្រាស់វិញ ដោយព្រឹកឡើងថ្ងៃទី២៥ មីនា គេសន្យាថា ដល់រសៀលថ្ងៃកើតហេតុ នឹងធ្វើការបង់ប្រាក់ថ្លៃភ្លើង ។ តែខាងមន្ត្រីយោធានោះអត់ធ្វើតាមការសន្យារបស់ខ្លួននោះទេ ទើបខាងក្រុមហ៊ុនបញ្ជាឱ្យបុគ្គលិកទៅបិទភ្លើងម្តងទៀត ។ លុះផ្តាច់បានត្រឹមតែប្រហែល២ម៉ោងប៉ុណ្ណោះ រហូតដល់វេលាម៉ោង៤ និង៥០នាទីរសៀល ស្រាប់តែមានមន្ត្រីយោធាប្រហែល១០នាក់បានចុះពីលើរថយន្ត ចូលទៅក្នុងបន្ទប់ការិយាល័យ ស្រែកជេរបញ្ចោរ និងមើលងាយខាងលោកសព្វគ្រប់បែបយ៉ាង ថែមទាំងប្រមាថជីវិតលោកទៀតផង ។
ហើយចោទថា លោកបញ្ជាបុគ្គលិកឱ្យចុះទៅបិទភ្លើងអគ្គិសនី តាមពិតគឺក្រុមហ៊ុនតម្រូវឱ្យបិទ ព្រោះលោកគ្មានសិទ្ធិនោះទេ ។ លោកបញ្ជាក់ទៀតថា ក្រុមមន្ត្រីយោធាទាំងនោះ មានអ្នកខ្លះយកកុងទ័រភ្លើងទៅអុកក្បាលលោកម្តងហើយម្តងទៀត ខ្លះទះកំផ្លៀង និងអុសរទេះរុញលោកពីក្នុងបន្ទប់ចេញក្រៅ រួចធាក់២ជើងស្ទើរតែធ្លាក់ពីលើរទេះរុញផងដែរ ។
លោកបន្ថែមទៀតថា លោកបានដាក់ពាក្យបណ្តឹងទៅខាងអាវុធហត្ថស្រុកសាលាក្រៅហើយ ដោយសុំប្តឹងចំពោះលោកវរ:សេនីយឯក យ៉យ ស៊ីដូ មេបញ្ជាការកងការពារព្រំដែនគោកលេខ៥០៤ ដែលបានដឹកនាំកម្លាំងមន្ត្រីយោធាចំនួន៨ទៅ១០នាក់ ចូលទៅធ្វើសកម្មភាពវាយ និងប្រើអំពើហិង្សាលើរូបលោក ដែលជាជនពិការ ខណ:កំពុងធ្វើការក្នុងក្រុមហ៊ុនអគ្គិនី គ្មានអ្វីតតាំងនឹងគេវិញឡើយ ។
លោកក៏បានសំពះសុំឱ្យសម្តេចតេជោ ហ៊ុន សែន និងសម្តេច ទៀ បាញ់ ព្រមទាំងលោកមេបញ្ជាការអគ្គមេបញ្ជាការនៃកងយោធពលខេរភូមិន្ទ លោកមេបញ្ជាការកងទ័ពជើងគោក និងលោកមេបញ្ជាការ កងរាជអាវុធហត្ថលើផ្ទៃប្រទេស តុលាការ និងក្រសួងយុត្តិធម៌ ព្រមទាំងអង្គការសិទ្ធិមនុស្ស ជួយរកយុត្តិធម៌ជូនលោកផងដែរ ។
ពាក់ព័ន្ធនឹងបញ្ហានេះ លោក យ៉យ ស៊ីដូ មេបញ្ជាការកងការពារព្រំដែនជើងគោកលេខ៥០៤ បានឱ្យដឹងកាលពីវេលាម៉ោង១២ និង០១ នាទីថ្ងៃត្រង់ទី២៨ មីនា នេះថា ខាងលោកអត់បានដឹកនាំកម្លាំងមន្ត្រីទៅវាយធ្វើបាបបុគ្គលិកអគ្គិសនីខាងលើនោះឡើយ គឺលោកចូលទៅបង់ប្រាក់ថ្លៃជំពាក់បំណុល ជូនក្រុមហ៊ុនប៉ុណ្ណោះ ។
រីឯអ្នកផ្សេងទៀត លោកមិនដឹងឡើយ គឺគេប្រព្រឹត្តខ្លួនឯងប៉ុណ្ណោះ ដោយសារខឹងនឹងបុគ្គលិកអគ្គិសនីដោះយកកុងទ័រភ្លើងចេញមិនឱ្យប្រើប្រាស់ ។ ចំណែកអ្នកដែលវាយទៅលើជនរងគ្រោះមានចំនួន២នាក់ ទី១-ឈិន ណុប ភេទប្រុស ទី២-ឈ្មោះ អ៊ិន ខ្លឹង ភេទប្រុស ត្រូវបានខាងកងរាជអាវុធហត្ថឃាត់ខ្លួន បញ្ជូនទៅតុលាការ ។ ចំពោះការដែលលោកចូលទៅកន្លែងការិយាល័យអគ្គិសនីទាំងស្រវឹងស្រា លោកបញ្ជាក់ថា ពេលរសៀលខាងលោកតែងតែមានការផឹកស្រាតិចតួចហើយ។
ចែករំលែកព័តមាននេះ