រាជធានីភ្នំពេញ៖ ការឆ្លងរីករាលដាលជាសកលនៃជំងឺកូវីដ១៩ នាពេលបច្ចុប្បន្នបានធ្វើឱ្យមានភាពចលាចលដល់ជីវិតរស់នៅនិងអាជីវកម្មរបស់យើង។ ដើម្បីជម្នះស្ថានភាពដ៏លំបាកនេះ សមាគមរោងចក្រកាត់ដេរនៅកម្ពុជា GMAC សូមអំពាវនាវដល់ភាគីពាក់ព័ន្ធទាំងអស់រួមដៃគ្នាដើម្បីយើងទាំងអស់គ្នា អាចបន្តរស់បាន។ ពិសេសអ្នកបញ្ជាទិញសូមកុំបោះបង់កម្ពុជាហើយសូមឱ្យអ្នកបញ្ជាទិញបំពេញកាតព្វកិច្ចរបស់ខ្លួនតាមកិច្ចសន្យាលើការដឹកជញ្ជូនទំនិញនិងទូទាត់ប្រាក់តាមលក្ខខណ្ឌ។ នេះយោងតាមសមាគមរោងចក្រកាត់ដេរនៅកម្ពុជា ហៅកាត់ថា GMAC ។
ក្នុងនោះផងដែរទាំងខាង GMAC និងប្រធានសហជីពតំណាងកម្មករ-កម្មការិនីធ្វើការនៅរោងច្រកកាត់ដេរសម្លៀកបំពាក់និងស្បែកជើង ស្នើដល់អ្នកបញ្ជារទិញអនុវត្តនូវកិច្ចសន្យា ដោយត្រូវបង់លុយសម្រាប់ឥវ៉ាន់ដែលបានកម្មង់ និងកុំយកលេសរឿងសហភាពអឺរ៉ុប និងអាមេរិកមិនឱ្យនាំផលិតផលចូល នោះបញ្ហាប្រឈមនឹងកើតមានលើការបើកប្រាក់ខែដល់កម្មករ-កម្មការិនី ប្រសិនបើឥវ៉ាន់កម្ម៉ង់ហើយ និងបានកាត់ដេររួច តែមិនអាចនាំចេញនោះ ។
យោងតាមសេចក្តីអំពាវនាវរបស់ GMAC កាលពីថ្ងៃទី២៤ ខែមីនាបានបង្ហាញថា
«ចំពោះអ្នកបញ្ជាទិញទាំងអស់ សូមកុំបោះបង់កម្ពុជា។ សមាគមសូមជំរុញអ្នកបញ្ជាទិញបំពេញកាតព្វកិច្ចរបស់ខ្លួនតាមកិច្ចសន្យាដែលបានចុះរួចហើយដោយទទួលយកការដឹកទំនិញដែលបានផលិតរួចហើយ និងទំនិញដែលបច្ចុប្បន្នកំពុងផលិតនិងទូទាត់ប្រាក់តាមលក្ខខណ្ឌធម្មតា។ការធ្វើបែបនេះនឹងអាចឱ្យរោងចក្រមានលទ្ធភាពបើកប្រាក់ឈ្នួលជូនកម្មករនិងបន្តការងារសម្រាប់ពួកគេ»។
ទន្ទឹមនឹងការអំពាវនាវដល់អ្នកបញ្ជាទិញឱ្យគោរពឬបំពេញកាតព្វកិច្ចរបស់ខ្លួន GMAC ក៏ជំរុញឱ្យរោងចក្រនិងកម្មករ រួមនិងសហជីពក្នុងស្រុកចូលរួមទប់ស្កាត់ការរីករាលដាលនៃជំងឺកូវីដ១៩ដោយអនុវត្តាមគោលការណ៍ណែនាំនិងបទប្បញ្ញត្តិផ្សេងៗដែលដាក់ចេញដោយរាជរដ្ឋាភិបាលកម្ពុជា។
បើតាម GMAC ចំពោះរោងចក្រទាំងអស់ សូមរក្សាការយកចិត្តទុកដាក់និងអនាម័យកម្រិត ខ្ពស់ជាវិធានការការពារនៅកន្លែងការងារដើម្បីការពារកម្មកររបស់យើងនិងជួយបង្ការការឆ្លងរីករាលដាលនៃវីរុសនេះ។សូមឱ្យប្រាកដថាកម្មកររបស់យើងយល់ដឹងនិងអនុវត្តតាមគោលការណ៍ណែនាំនិងបទប្បញ្ញត្តិផ្សេងៗដែលដាក់ចេញដោយរាជរដ្ឋាភិបាលកម្ពុជា។ចំពោះកម្មករនិងសហជីពទាំងអស់ សូមមានទំនុកចិត្តលើវិធានការការពារលក្ខណៈវិទ្យាសាស្ត្រដែលកំពុងអនុវត្តនៅកន្លែងការងារ។សូមធ្វើជាផ្នែកមួយនៃដំណោះស្រាយ ជាពិសេសបន្តការនៅឆ្ងាយនិងកាត់បន្ថយជាអតិបរមាចំពោះពិធីជួបជុំផ្សេងៗ។
លោក សោម អូន ប្រធានសភាសម្ព័ន្ធសហជីពជាតិកម្ពុជា បានមានប្រសាសន៍ថា «កន្លងមកការបើកប្រាក់ខែជូនកម្មករយើងមិនទាន់មានភាពរអាក់រអួលនោះទេ ។ ប៉ុន្តែចាប់ពីពេលនេះទៅ ឬនៅមុនថ្ងៃចូលឆ្នាំខាងមុខអាចនឹងជួបនៅបញ្ហាលំបាក ដោយសារអ្នកបញ្ជាទិញប្រកាសថាសហភាពអឺរ៉ុប និងអាមេរិកមិនឱ្យនាំផលិតផលចូល ។ បញ្ហាសំខាន់អ្នកបញ្ជាទិញគាត់ឱ្យលុយទៅរោងចក្រឬអត់ ព្រោះគាត់បានកម្ម៉ង់គេរួចហើយ បើគាត់មិនឱ្យលុយទៅឱ្យរោងចក្រដែលគេដេរហើយ ធ្វើម៉េចគេបានបើកលុយជូនកម្មករហើយនេះជាបញ្ហាដែលយើងរងចាំមើលនៅចុងខែនេះឬនៅដើមខែមេសា»។ លោកបានបន្តថា បើសិនអ្នកបញ្ជាទិញមិនបានគោរពទៅតាមកិច្ចសន្យាដែលបានធ្វើជាមួយក្រុមហ៊ុន ខ្ញុំយល់ថាកម្មករយើងនឹងមានផលប៉ះពាល់ទៅដល់ប្រាក់ខែពួកគាត់ ព្រោះរោងចក្រជាធម្មតានៅពេលគាត់បញ្ចេញនូវផលិតផលទើបមានលុយបើកឱ្យកម្មករយើង។តែបើសិនអ្នកបញ្ជាទិញមិនឱ្យលុយវានឹងក្លាយជាបញ្ហាប្រឈមថ្មីមួយទៀតធ្វើឱ្យរោងចក្រមានការលំបាកក្នុងការបើកប្រាក់ទៅដល់កម្មករ។ ទន្ទឹមនឹងការបើកប្រាក់ខែជូនកម្មររោងចក្រអាចជាបង្ហាកង្វល់របស់ម្ចាស់រោងចក្រនិងអាចកើតមានឡើងហើយដើម្បីដោះស្រាយបាននូវបញ្ហានេះបើតាមប្រធានសហជីពខាងលើជម្រើសគឺមានតែរាជរដ្ឋាភិបាលផ្តល់ជាកម្ចីទៅដល់រោងចក្រសហគ្រាសទាំងឡាយណាដែលជួបបញ្ហា។
លោក សោម អូន បានលើកឡើងថា «សូមឱ្យអ្នកបញ្ជាទិញគោរពទៅតាម (ខ) នៃកិច្ចសន្យារបស់គាត់ជាមួយរោងចក្រដែលបានធ្វើការបញ្ជាទិញ។ គាត់ត្រូវឱ្យលុយទៅតាមបរិមាណផលិតផលដែលដេរឱ្យគាត់ទៅម្ចាស់រោងចក្រសហគ្រាស។ អ្នកបញ្ជាទិញមិនអាចយកលេសដែលថាសហគមអឺរ៉ុបផ្អាកបណ្តោះអាសន្នមិនផ្តល់ប្រាក់ឱ្យរោងចក្រទេ បើធ្វើបែបនេះខ្ញុំគិតថាគាត់រំលោភលើកិច្ចសន្យារបស់គាត់ជាមួយនិងភាគីរោងចក្រ។ ជម្រើសចុងក្រោយខ្ញុំគិតថាបើសិនជាបញ្ហានេះនៅតែកង្វល់មានតែរាជរដ្ឋាភិបាលជួយជាថវិកាជាបុរេប្បទានផ្តល់ជាកម្ចីទៅដល់រោងចក្រសហគ្រាសទាំងឡាយណាជួបបញ្ហានេះដើម្បីឱ្យគាត់មានលទ្ធភាពបើកប្រាក់ជូនកម្មករ»។
បើតាមប្រធានសភាសម្ព័ន្ធសហជីពជាតិកម្ពុជារូបនេះថាការផ្សព្វផ្សាយអំពីការណែនាំឱ្យកម្មករយល់ដឹងពីជំងឺកូវីដ១៩ ខាងសហជីពបានធ្វើតាំងពីកូវីដ១៩មានដំបូងនៅកម្ពុជា បន្ទាប់ពីក្រសួងសុខាភិបាលក៏ដូចជាស្ថាប័នពាក់ព័ន្ធគាត់ចេញសេចក្តីណែនាំ សហជីពក៏បានផ្សព្វផ្សាយជាច្រើនលើកច្រើនសារតាមរយៈការប្រជុំជាមួយក្រុមសហជីព។ជាមួយគ្នានេះយើងឃើញនៅតាមរោងចក្រនីមួយៗសុទ្ធតែមានការពិនិត្យកំដៅជាមុនពេលចូលធ្វើការបើឃើញកម្មករណាមានកំដៅលើសឱ្យគាត់ទៅពិនិត្យសុខភាពនៅតាមមន្ទីពេទ្យ ។ វិធានការមួយទៀតនៅតាមរោងចក្រមានការចាក់ជាសំលេងអប់រំអំពីវិធានការចូលរួមការពារនិងប្រយុទ្ធទៅនិងជំងឺកូវីដ១៩ ហើយឃើញថាកម្មករមានការយល់ដឹងបានច្រើននិងកម្មករមានការពាក់ម៉ាស់ស៊ឹងតែគ្រប់គ្នាពេលគាត់ចូលធ្វើការ»៕ កែសម្រួលដោយ ៖ សុឃាក់
ចែករំលែកព័តមាននេះ