រាជធានីភ្នំពេញ ៖ ជំងឺរលាកដង្ហើមប្រភេទថ្មីបង្កឡើងដោយវីរុសកូវីដ១៩ បាននិងកំពុងវាយប្រហារកាន់តែខ្លាំងនៅលើពិភពលោក ដែលបានធ្វើឲ្យវិស័យសំខាន់ៗជាច្រើននៅលើពិភព លោកសល់តែដង្ហើមចង្រិត ។ ងាកមកប្រទេសកម្ពុជាវិញក៏កំពុងរងផលប៉ះពាល់ពីវីរុសឆ្លងមួយនេះយ៉ាងក្តៅគគុកផងដែរ ជាក់ស្ដែងគិតត្រឹមព្រឹកថ្ងៃទី១៧ ខែមីនា…
រាជធានីភ្នំពេញ ៖ ជំងឺរលាកដង្ហើមប្រភេទថ្មីបង្កឡើងដោយវីរុសកូវីដ១៩ បាននិងកំពុងវាយប្រហារកាន់តែខ្លាំងនៅលើពិភពលោក ដែលបានធ្វើឲ្យវិស័យសំខាន់ៗជាច្រើននៅលើពិភព លោកសល់តែដង្ហើមចង្រិត ។ ងាកមកប្រទេសកម្ពុជាវិញក៏កំពុងរងផលប៉ះពាល់ពីវីរុសឆ្លងមួយនេះយ៉ាងក្តៅគគុកផងដែរ ជាក់ស្ដែងគិតត្រឹមព្រឹកថ្ងៃទី១៧ ខែមីនា ឆ្នាំ ២០២០ ម្សិលមិញនេះ កម្ពុជាបានរកឃើញអ្នកផ្ទុកវីរុសនេះយ៉ាងហោចណាស់ ២៤នាក់ ដែលបានបង្កអោយមានការព្រួយបារម្ភពីសំណាក់ពលរដ្ឋខ្មែរភ័យខ្លាចនូវការឆ្លង ហើយក៏ធ្វើអោយផលប៉ះពាល់ទៅលើសេដ្ឋកិច្ចកាន់តែធំផងដែរ ។
បច្ចុប្បន្ននេះផលប៉ះពាល់ពីជំងឺ Covid-19 នេះមិនត្រឹមធ្វើឲ្យប៉ះពាល់ខ្លាំងក្លាលើវិស័យទេសចរណ៍ ដែលបានធ្វើឲ្យសណ្ឋាគារនិងផ្ទះសំណាក់ជាច្រើនត្រូវបិទទ្វារ នោះពេលនេះវីរុសឆ្លងមួយនេះបានសាយភាយនូវឥទ្ធិពលអវិជ្ជមានទៅលើវិស័យម្ហូបអាហារភោជនីយដ្ឋាននិងហាងកាហ្វេមួយចំនួននៅរាជធានីភ្នំពេញ ព្រោះបណ្តាហាងកាហ្វេ និងភោជនីយដ្ឋានដែលធ្លាប់តែមានភ្ញៀវចូលណែនពេញៗពេលនេះ បានប្រែជាស្ងាត់និងបាត់ភ្ញៀវមួយចំនួនធំ ខណៈម្ចាស់ភោជនីយដ្ឋានខ្លះលើកឡើងថាបានបាត់បង់ភ្ញៀវដល់ទៅជាង ៦០ ភាគរយទៅហើយ ។
បើតាមលោកហេង សេងលី នាយកគ្រប់គ្រងភោជនីយដ្ឋានផាកកាហ្វេ បានអោយដឹងថា ពេលនេះភ្ញៀវចូលក្នុងផាកកាហ្វេបានធ្លាក់ចុះបន្តិចធៀបនឹងរយៈពេលមុន គឺមុនពេលផ្ទុះជំងឺកូវីដ១៩ ។ ការធ្លាក់ចុះនេះ បានចាប់ផ្ដើមនៅពេលកម្ពុជារកឃើញអ្នកផ្ទុកដំបូង និងបន្តបន្ទាប់មកទៀត ។ លោកបានបន្តថា « ចាប់តាំងពីមុនកម្ពុជារកឃើញករណីអ្នកផ្ទុកកូវីដ១៩ម្ល៉េះហាងផាកកាហ្វេបានបង្កើនការយកចិត្តទុកដាក់ និងអនាម័យបន្ថែមទៀត ដោយអោយបុគ្គលិកទាំងអស់ ត្រូវលាងដៃអោយបានញឹកញាប់ជាងមុន ដាក់អាល់កុលលាងដៃ សម្រាប់ភ្ញៀវដែលចូលក្នុងហាង ហើយជំហ៊ានបន្ទាប់ នឹងត្រូវមានដាក់ឧបករណ៍វាស់កំដៅភ្ញៀវមុនចូលក្នុងហាងផងដែរ » ។
លោកបានបន្តថា «ទោះបីជាពេលនេះ ផាកកាហ្វេមានការធ្លាក់ចុះភ្ញៀវក៏ពិតមែន តែមិនមែនមានន័យថាវាខ្សត់រហូតដល់ថ្នាក់អត់ភ្ញៀវនោះទេ គឺមានធម្មតា ហើយប៉ះពាល់សម្រាប់ពេលនេះ គឺអាចទប់ទាល់បាន តែសម្រាប់នៅពេលខាងមុខទៀតក៏មិនទាន់អាចព្យាករណ៍បានដឹងថាវានឹងក្លាយទៅជាយ៉ាងណានោះទេ» ។
លោកហេង សេងលី បានបន្តថា « បើទោះបីជាបច្ចុប្បន្ននេះ មានការថមថយភ្ញៀវក្ដីក៏ភោជនីយដ្ឋានផាកកាហ្វេ មិនមានគម្រោងក្នុងកាត់បន្ថយបុគ្គលិក ឬកាត់ប្រាក់បៀវត្សរ៍ពួកគេដែរ គឺពួកគេនៅតែរក្សាបរិមាណដដែលនិងបៀវត្សរ៍នៅដដែល » ។ នាយកគ្រប់គ្រងភោជនីយដ្ឋានផាកកាហ្វេ បានបន្តថា ក្រៅពីភោជនីយដ្ឋានមួយនេះ ក៏នៅមានហាងកាហ្វេដទៃទៀតដែរដែលរងផលប៉ះពាល់ ជាក់ស្ដែងហាងកាហ្វេប្រោណ (Brown) ដែលជាហាងកាហ្វេធំលំដាប់ក្នុងស្រុកមួយក៏កំពុងរងផលនិងបាត់បង់ភ្ញៀវដូចនឹងភោជ
នីយដ្ឋានផាកកាហ្វេដែរ ។
លោកចាង ប៊ុនលាង សហស្ថាបនិកហាងកាហ្វេ Brown បានមានប្រសាសន៍ថា នៅពេលដែលបញ្ហានេះ កើតឡើង ចង់មិនចង់គឺត្រូវប៉ះពាល់ជាក់ស្ដែងពេលនេះ Brown ក៏ជួបបញ្ហានូវការបាត់បង់ភ្ញៀវមួយចំនួនដែរ ក៏ប៉ុន្តែមិនទាន់ដឹងតួលេខជាក់លាក់ណាមួយនៅឡើយ ។ លោកបានបន្តថា ហាងកាហ្វេ Brown បានដាក់វិធានការមួយចំនួន ដើម្បីទប់ស្កាត់ការរាលដាលនេះដែរ ដោយបានអោយបុគ្គលិកត្រូវបង្កើនអនាម័យផ្ទាល់ខ្លួន មុនចូលធ្វើការ ត្រូវវាស់កម្ដៅពួកគាត់សិន និងត្រូវអោយលាងដៃជាមួយសាប៊ូ ឬអាល់កុលអោយបានញឹកញាប់ ។ នៅក្នុងហាងក៏ដូចគ្នា អ្នកអនាម័យ ត្រូវជូតបង្កាន់ដៃទ្វារអោយបានញឹកញាប់ កន្លែងភ្ញៀវអង្គុយ ក៏ត្រូវទឹកអាល់កាល់ នៅពេលភ្ញៀវចាកចេញ ដើម្បីការពារអោយបានខ្ពស់ ។ លោកចាង ប៊ុនលាង បានបន្ថែមថា ក្នុងពេលដែលបញ្ហាកំពុងកើតឡើងនិងអាចជួបវិបត្តិដូចនេះ រដ្ឋាភិបាលគួរជួយដល់វិស័យនេះផងដែរព្រោះវាបានផ្ដល់ការងារជាច្រើនដល់បុគ្គលិក ជាពិសេសនិស្សិតកំពុងសិក្សា ដោយបន្ធូបន្ថយនូវពន្ធ និងការផ្ដល់ឥណទានហិរញ្ញវត្ថុដែលមានការប្រាក់ពិសេស ដូចដែលផ្ដល់ទៅសហគ្រាសខ្នាតតូចនិងមធ្យដែលជាផលិតផងដែរ ។ លោកបានបញ្ជាក់បន្ថែមថា ក្រុមហ៊ុនមិនមានគោលការណ៍កាត់បន្ថយបុគ្គលិក ឬកាត់ប្រាក់ខែគាត់ឡើយ ព្រោះវាមិនអាចធ្វើទៅរួច ដោយសុខៗត្រូវបញ្ឈប់ពួកគេ ឬកាត់ប្រាក់ខែពួកគេ ដូច្នេះ ទោះបីជាយ៉ាងណា ក៏ត្រូវតែបន្តដំណើរទៅមុខ ដើម្បីជំនះនូវបញ្ហាកូវីដ១៩នេះ ។
ចំណែកអ្នកស្រីលាង សួរ ម្ចាស់ភោជនីយដ្ឋានដែលមានហាងបាយកម្ម៉ង់ចំនួន ២ ទីទាំងនៅខាងត្បូងផ្សារទួលទំពួងបានឲ្យដឹងថា ពេលមានបញ្ហារកឃើញវិជ្ជមានករណីកូវីដ១៩ មួយករណីលើជនជាតិចិននៅខេត្តព្រះសីហនុ ដូចជាមិនមានផលប៉ះពាល់នៅឡើយទេ ។អ្នកស្រីបានបន្តថា «ភ្ញៀវនៅហាងបាយទាំងពេលព្រឹក និងថ្ងៃត្រង់បានធ្លាក់ចុះច្រើន គឺប្រមាណ ៦០ ភាគរយ ហើយការធ្លាក់ចុះនេះគឺចាប់ពីចុងសប្តាហ៍នេះតែម្តង ក្រោយពីការរកឃើញករណីវីជ្ជមានលើជនជាតិបារាំងនិងកូនប្រុសគាត់ថាស្នាក់នៅជិតទួលទំពូងនេះតែម្តង» ។ អ្នកស្រីលាង សួរ ដែលបានដើរហុចដបទឹកអាកុលលាងដៃឲ្យភ្ញៀវនៅតុបាយក្នុងហាងរបស់គាត់បានបន្តថា «ជាក់ស្តែងថ្ងៃទី ១៧ នេះ ភ្ញៀវធ្លាប់តែមកទទួលបានទានបាយថ្ងៃត្រង់ជិត ១០០ នាក់ ឥឡូវមានប្រមាណតែ ២០ ឬ ៣០ នាក់តែប៉ុណ្ណោះ» ។ ក្រៅពីវិស័យភោជនីយដ្ឋាននិងហាងកាហ្វេធំតូចកំពុងរងផលប៉ះពាល់ដោយសារតែការធ្លាក់ចុះនៃភ្ញៀវមកទទួលទាននោះ រាជរដ្ឋាភិបាលកម្ពុជាក៏បានដាក់ចេញនូវវិធានការណ៍ចាំបាច់មួយចំនួនធំក្នុងការទប់ស្កាត់នូវការឆ្លងវីរុសកូវីដ ១៩ ក្នុងសហគមន៍ រហូតឈានដល់ការបិទកន្លែងកំសាន្តផងដែរ ។
យោងតាមសេចក្ដីជូនដំណឹងរបស់ក្រសួងសុខាភិបាលកម្ពុជាចេញផ្សាយនៅរសៀលថ្ងៃទី១៧ ខែមីនានេះបានប្រកាសអោយបិទអាជីវកម្មកម្សាន្តសប្បាយដូចជា KTV រោងភាពយន្តនៅទូទាំងប្រទេស ពីព្រោះកន្លែងទាំងនេះ គឺជាកន្លែងងាយនឹងចម្លងកូវីដ១៩ទៅកាន់អ្នកផ្សេងទៀត ក្នុងករណីអ្នកណាម្នាក់ក្នុងចំណោមអ្នកទាំងនោះមានផ្ទុកមេរោគនេះ ។ ការបិទកន្លែងទាំងនេះ ក៏នឹងធ្វើអោយបាត់បង់ការងារមួយចំនែកទៀតសម្រាប់អ្នកបម្រើការងារខារ៉ាអូខេ និងរោងភាពយន្ត ដែលទាំងនេះ សុទ្ធតែជាផលប៉ះពាល់ដោយសារតែជំងឺដ៏សាហាវមួយនេះ ៕
ចែករំលែកព័តមាននេះ