រាជធានីភ្នំពេញ ៖ ជំងឺរលាកសួតថ្មីដែលបង្កឡើងដោយវីរុសកូវីដ-១៩ បាននិងកំពុងសាយភាយនៅលើពិភពលោក ក្នុងនោះ កម្ពុជាក៏រកឃើញករណីអ្នកឆ្លងចំនួន៥នាក់ផងដែរ គិតត្រឹមថ្ងៃទី ១៣ ខែមីនា ម្សិលមិញនេះដោយក្នុងនោះមានជនជាតិខ្មែរម្នាក់ផងដែរ…
រាជធានីភ្នំពេញ ៖ ជំងឺរលាកសួតថ្មីដែលបង្កឡើងដោយវីរុសកូវីដ-១៩ បាននិងកំពុងសាយភាយនៅលើពិភពលោក ក្នុងនោះ កម្ពុជាក៏រកឃើញករណីអ្នកឆ្លងចំនួន៥នាក់ផងដែរ គិតត្រឹមថ្ងៃទី ១៣ ខែមីនា ម្សិលមិញនេះដោយក្នុងនោះមានជនជាតិខ្មែរម្នាក់ផងដែរ ។ ដោយសារតែជំងឺនេះវាឆាប់ឆ្លងលឿនរហ័ស និងគ្រប់វត្ថុទាំងអស់ដែលប៉ះពាល់ ក្នុងនោះក្រដាសប្រាក់ក៏ជាកត្តាប្រឈមខ្ពស់ផងដែរ ព្រោះក្រដាសប្រាក់នឹងចរាចរណ៍ពីមនុស្សម្នាក់ទៅម្នាក់ជាច្រើនក្នុងមួយថ្ងៃៗ ។
ខណៈមនុស្សជាច្រើនកំពុងព្រួយបារម្ភខ្លាំងនៃការឆ្លងវីរុសកូរ៉ូណានេះ ទាំងនៅប្រទេសកម្ពុជាផងដែរនោះ អ្នកជំនាញខាងវិស័យធនាគារនិងអចលទ្រព្យបង្ហាញការយល់ឃើញថានាយុគ្គសម័យកូវីដ-១៩ ក៏ជាការបង្កើតនូវឱកាសថ្មីសម្រាប់មុខជំនួញនិងអាជីវកម្មផងដែរ ។ បើតាមលោកបណ្ឌិតអ៊ិន ចាន់នី ប្រធានសមាគមធនាគារកម្ពុជា បានមានប្រសាសន៍ថា ជំងឺកូវីដ១៩ នឹងមិនប៉ះពាល់ធ្ងន់ធ្ងរណាស់ណាស់ទេដល់វិស័យហិរញ្ញវត្ថុនិងធនាគារ ព្រោះមនុស្សម្នាក់ៗ ត្រូវការធ្វើការចិញ្ចឹមជីវិត ត្រូវរកប្រាក់ចិញ្ចឹមគ្រួសារ ក៏ប៉ុន្តែបើសិនជាពលរដ្ឋភ័យខ្លាចក្នុងការទូទាត់តាមក្រដាសប្រាក់ ពួកគេមានជម្រើសមួយទៀត គឺទូទាត់តាមបច្ចេកវិទ្យា ដែលក្នុងប្រទេសកម្ពុជាក៏មានរួចហើយ ដូចជាការទូទាត់តាម QR Code ឬក៏តាម Apps ផ្សេងៗផងដែរ ។
លោកបានបន្ថែមទៀតថា « វាអាចជាឱកាសមួយក្នុងការពង្រីកនូវអាជីវកម្មថ្មីៗ ក្នុងពេលជំងឺនេះកំពុងវាយលុកបែបនេះ ជាក់ស្ដែងក្នុងពេលប្រទេសចិនបានផ្ទុះជំងឺសារ បច្ចេកវិទ្យាទូទាត់តាមវីឆាតរបស់ចិនក៏បានផ្ដើមពេញនិយម ហើយពេលនេះ ក៏ដូចគ្នាដែរ ជំងឺកូវីដនេះ វាក៏អាចឆ្លងតាមក្រដាសប្រាក់ដែរ ដូច្នេះនៅពេលដែលមានកាន់ក្រដាសប្រាក់ពីមនុស្សម្នាក់ទៅមនុស្សម្នាក់ទៀតសុទ្ធតែមានការប្រឈម ចុះបើសិនជាមនុស្សម្នាក់ៗចាប់ផ្ដើមទូទាត់តាមបច្ចេកវិទ្យាដែលមានស្រាប់ដូចជា QR ឬតាម App វាក៏អាចកាត់បន្ថយនិងជាវិធានការណ៍ក្នុងការចម្លងជំងឺនេះតាមរយៈក្រដាសប្រាក់ផងដែរ» ។ លោកបណ្ឌិតបានបន្តថា បច្ចុប្បន្ននេះ កម្ពុជាមានប្រព័ន្ធទូទាត់តាមទូរសព្ទដៃនេះរួចហើយសម្រាប់អោយអតិថិជន ប្រជាពលរដ្ឋកម្ពុជាទាំងអស់ប្រើប្រាស់ ជាក់ស្ដែងធនាគារអេស៊ីលីដាមានប្រព័ន្ធទូទាត់តាមអេស៊ីលីដាយូនីធីទាន់ចិត្តរួចស្រេច ហើយក៏ជាឱកាសក្នុងការពង្រីកសេវាកម្មនេះអោយកាន់តែទូលាយផងដែរ ។
បើតាមលោកហ៊ឹម សីហា អ្នកវាយតម្លៃអចលនទ្រព្យកម្ពុជាមួយរូបបានអោយដឹងថា ក្នុងពេលនេះ វាក៏ជាឱកាសមួយផងដែរសម្រាប់អ្នកវិនិយោគជាក់ស្ដែង អ្នកវិនិយោគអាចមានឱកាសក្នុងការចរចាទិញអចលនទ្រព្យដែលខ្លួនចង់បាន ។ ខណៈនេះ បើសិនជាក្រុមហ៊ុនណាមានហិរញ្ញវត្ថុរឹងមាំ ពួកគេអាចនឹងមានឱកាសពង្រីកខ្លួនកាន់តែខ្លាំងថែមទៀត នៅពេលដែលជំងឺ នេះស្ងប់ស្ងាត់ទៅវិញភ្លាម ។
លោកកន សុខគា អ្នកអភិវឌ្ឍន៍លំនៅឋានមួយកន្លែង បាននិយាយថា ទោះបីជាបច្ចុប្បន្ននេះ ពិភពលោកកំពុងផ្អើលនិងខ្លាចរអារនូវការឆ្លងជំងឺកូវីដ១៩នេះក្ដី ក៏ប៉ុន្តែ វាមិនមែនជាការរាំងដល់ការអភិវឌ្ឍន៍គម្រោងៗរបស់រូបលោកក៏ដូចជាវិនិយោគិនផ្សេងដែរ ។ នេះគឺជាឱកាសសម្រាប់អ្នកអភិវឌ្ឍន៍ ក៏ដូចជាអ្នកទិញផងដែរ ជាក់ស្ដែងបច្ចុប្បន្នសម្រាប់លំនៅឋានដែលមានតម្លៃ ក្រោម៧ម៉ឺនដុល្លារត្រូវបានរដ្ឋាភិបាលលើកលែងលើពន្ធប្រថាប់ត្រាផងដែរ ដូច្នេះ អ្នកដែលមានបំណងទិញលំនៅឋានសម្រាប់ស្នាក់នៅ គឺជាឱកាសចំណេញមួយចំនួនសម្រាប់យកប្រាក់នោះទៅធ្វើអ្វីផ្សេងបានផងដែរ ។
គួរបញ្ជាក់ថា ក្នុងពេលពិភពលោកជួបវិបត្តិជំងឺកូវី១៩នេះ សេដ្ឋកិច្ចពិភពលោក រួមនឹងកម្ពុជាប្រឈមនឹងការថមថយ ជាក់ស្ដែងកម្ពុជា បានទំលាក់ការព្យាករណ៍របស់ខ្លួនមកនៅត្រឹមតែរង្វង់៦ភាគរយប៉ុណ្ណោះ ក្នុងឆ្នាំ ២០២០នេះ ក្នុងនោះវិស័យកាត់ដេរ និងទេសចរណ៍មានផលប៉ះពាល់ធ្ងន់ធ្ងរជាង ហើយរដ្ឋាភិបាលកម្ពុជាក៏បាននិងកំពុងស្ដារសង្គ្រោះវិស័យនេះឡើងវិញដើម្បីទប់ទល់នឹងការធ្លាក់ចុះកាន់តែខ្លាំង ៕ កែសម្រួលដោយ ៖ សុឃាក់
ចែករំលែកព័តមាននេះ