ខេត្តពោធិ៍សាត់ ៖ សម្តេចតេជោនាយករដ្ឋមន្ត្រី ហ៊ុន សែន បានព្រមានចាប់បុរសម្នាក់ដោយបង្ហាញពីអាសយដ្ឋានថា រស់នៅក្នុងស្រុកកំពង់ត្របែក ខេត្តព្រៃវែង យកមកឃុំ ដោយសារបុរសរូបនោះនិយាយថា សម្តេចត្រូវបានបញ្ជូនទៅប្រទេសសិង្ហបុរីដោយសម្ងាត់បំផុត ដើម្បីព្យាបាលជំងឺរលាកសួតដែលបង្កឡើងដោយមេរោគ Covid-19 ។
ការព្រមានរបស់សម្តេចតេជោ ហ៊ុន សែន នេះ គឺកាលពីព្រឹកថ្ងៃទី៩ ខែមីនា ឆ្នាំ២០២០ ក្នុងឱកាសសម្តេចអញ្ជើញសម្ពោធដាក់ឱ្យប្រើប្រាស់ផ្លូវជាតិលេខ៥៥ និងបើកការដ្ឋានស្ថាបនាផ្លូវជាតិលេខ១០ នៅខេត្តពោធិ៍សាត់ ។ សម្តេច តេជោបានអះអាងថា សម្តេចមិនមានផ្ទុកមេរោគ Covid-19 នោះទេ ហើយក៏មិនត្រូវបានបញ្ជូនទៅព្យាបាលនៅប្រទេសសិង្ហបុរីដែរ ។
សម្តេចតេជោនាយករដ្ឋមន្ត្រី មានប្រសាសន៍បញ្ជាក់យ៉ាងដូច្នេះថា ៖ «អាមួយនោះផ្តាំឯងឯងនៅកំពង់ត្របែក ។ អាហ្នឹងថា ខ្ញុំត្រូវបានគេបញ្ជូនដោយស្ងាត់បំផុតទៅពេទ្យសិង្ហបុរី ។ ប្រយ័ត្នណា ! ឲ្យប៉ូលិសទៅយកដល់ផ្ទះ ឯងត្រូវដឹងថា ឯងនិយាយអីខ្លះ ។ កុំគិតស្មានតែគេមិនដឹង! គ្រាន់តែព្រមានទេ លើកក្រោយបើឯងនៅតែដដែលហ្នឹង គឺចាប់ឯងយកមកឃុំហើយ» ។
សម្តេចតេជោមានប្រសាសន៍ថា បើសិនជាសម្តេចមានមេរោគ Covid-19 ពិតមែននោះ រដ្ឋាភិបាលសិង្ហបុរីក៏គេមិនអនុញ្ញាតឲ្យសម្តេចទៅព្យាបាលនៅទីនោះដែរ ព្រោះគេខ្លាចចម្លងដល់ប្រជាជនគេ ។ បើតាមគោលការណ៍អង្គការសុខភាពពិភពលោក(WHO) បើគេរកឃើញនរណាផ្ទុកមេរោគCovid-19 នៅកន្លែងណា ត្រូវព្យាបាលអ្នកជំងឺនៅទីនោះ ដោយធ្វើកិច្ចសហប្រតិបត្តិការជាមួយភាគីពាក់ព័ន្ធក្នុងការព្យាបាល ។
សម្តេចតេជោ បានលើកឡើងពីករណីដែលប្រទេសយើងធ្លាប់បានរកឃើញ Covid-19 លើជនជាតិចិនម្នាក់នៅខេត្តព្រះសីហនុ ហើយព្យាបាលបុរសរូបនោះទាល់តែជា ។ សម្រាប់បុរសជនជាតិជប៉ុនដែលផ្ទុកមេរោគ Covid-19 និងបានចាកចេញពីកម្ពុជា ប្រសិនបើរកឃើញថាលេចចេញរោគសញ្ញានៅប្រទេសកម្ពុជា ក៏យើងមិនឲ្យគាត់ចេញទៅដែរ គឺត្រូវតែទុកព្យាបាលសិន។សូមបញ្ជាក់ថា កម្ពុជាបានរកឃើញអ្នកផ្ទុកមេរោគ Covid-19 ចំនួន២ករណីហើយ។
ករណីទី១-ត្រូវបានប្រកាសថារកឃើញលើបុរសជនជាតិចិនម្នាក់ នៅខេត្តព្រះសីហនុ កាលពីថ្ងៃទី២៧ ខែមករា ឆ្នាំ២០២០ និងបានព្យាបាលរហូតដល់ជាសះស្បើយ ទើបអនុញ្ញាតឲ្យត្រឡប់ទៅប្រទេសកំណើតវិញ ។ករណីទី២-ត្រូវបានរកឃើញកាលពីថ្ងៃទី៧ ខែមីនា ឆ្នាំ២០២០ លើបុរសជនជាតិខ្មែរម្នាក់ ។
បុរសរូបនោះ គឺជាមនុស្សម្នាក់ក្នុងចំណោម៤នាក់ ដែលធ្វើការស្និទ្ធជាមួយជនជាតិជប៉ុន ដែលឆ្លងមេ
រោគ Covid-19 ហើយបានចាកចេញពីខេត្តសៀមរាប ទៅកាន់ប្រទេសជប៉ុន កាលពីថ្ងៃទី៣ ខែមីនា ឆ្នាំ២០២០ ដោយឆ្លងកាត់ប្រទេសវៀតណាម ។
ការរកឃើញជំងឺ Covid-19 នៅកម្ពុជានេះ បានធ្វើឡើងបន្ទាប់ពីក្រសួងសុខាភិបាល បានយកកំហាកមនុស្សសង្ស័យ៤នាក់នៅខេត្តសៀមរាប ដែលធ្វើការងារស្និទ្ធជាមួយជនជាតិជប៉ុនរូបនោះ ។ ប៉ុន្តែទោះជាយ៉ាងនេះក្តី មនុស្ស៣នាក់ក្នុងចំណោម៤នាក់នោះ ពុំមានការឆ្លងទេ ខណៈដែលក្រសួងសុខាភិបាលកំពុងតាមដានរយៈពេល១៤ថ្ងៃបន្តទៀត ដោយទុកពួកគេឲ្យស្ថិតនៅដាច់ដោយឡែក ៕
ចែករំលែកព័តមាននេះ