ខេត្តតាកែវ ៖ ជនសង្ស័យម្នាក់ត្រូវបាននគរបាលស្រុកគីរីវង់ធ្វើការឃាត់ខ្លួន បន្ទាប់ពីជនសង្ស័យខឹងជនរងគ្រោះផឹកស៊ីរួចរករឿងចង់ដុតផ្ទះ ទើបធ្វើសកម្មភាពយកកាំបិតកាប់ទៅលើជនរងគ្រោះអោយរងរបួសយ៉ាងធ្ងន់ធ្ងរ ហើយត្រូវបានក្រុមគ្រួសារបញ្ជូនមកព្យាបាលនៅមន្ទីពេទ្យបង្អែកស្រុក ។
ហេតុការណ៍ខាងលើនេះបានកើតឡើងកាលពីវេលាម៉ោង១១និង៥៥នាទីថ្ងៃទី៧ ខែមីនា ឆ្នាំ២០២០ ស្ថិតនៅភូមិត្រពាំងពងទឹក ឃុំសោម ស្រុកគិរីវង់ ខេត្តតាកែវ ។
លោកវរសេនីយ៍ឯកយ៉ុគ សារ៉ាត់ អធិការនគរបាលស្រុកគីរីវង់បានអោយដឹងថា ជនសង្ស័យឈ្មោះ អ៊ូច ជឿន ភេទប្រុស អាយុ៤០ឆ្នាំ ។ ចំណែកជនរងគ្រោះឈ្មោះ ភឿ ភេន ភេទប្រុស អាយុ៣២ឆ្នាំ ។ អ្នកទាំង២រស់នៅក្នុងភូមិឃុំកើតហេតុខាងលើ ។
លោកអធិការនគរបាលស្រុកបានបន្តទៀតថា មុនពេលកើតហេតុ ជនរងគ្រោះបានផឹកស៊ីស្រវឹងរួចបានរករឿងចង់ដុតផ្ទះរបស់ជនសង្ស័យ ពេលនោះជនសង្ស័យខឹងសម្បាយ៉ាងខ្លាំងរួចក៏បានទាញកាំបិតកាប់ទៅលើជនរងគ្រោះត្រូវចំស្មាខាងឆ្វេង១កាំបិតបណ្តាលឱ្យរងរបួសយ៉ាងធ្ងន់ធ្ងតែម្តង។
នៅចំពោះមុខនគរបាលស្រុក ជនសង្ស័យបាននិយាយសារភាពថា ខ្លួនពិតជាបានយកកាំបិតកាប់ទៅលើជនរងគ្រោះប្រាកដមែន ដោយសារពេលជនរងគ្រោះផឹកស៊ីស្រវឹង រួចមករករឿងខ្លួន នឹងបានរកដុតផ្ទះរបស់ខ្លួនចោលថែមទៀតផង ទើបខ្លួនទ្រាំមិនបានក៏ទាញកាំបិតកាប់ទៅលើជនរងគ្រោះតែម្តង ។ ព្រោះជនរងគ្រោះបានរករឿង និងរកដុតផ្ទះរបស់ខ្លួនចោលជាច្រើនលើកច្រើនសារណាស់មកហើយ ទើបលើកនេះខ្លួនទ្រាំលែងបានក៏ទាញកាំបិតកាប់តែម្តង។
លោកវរសេនីយ៍ឯកយ៉ុង ញីវ នាយការិយាល័យព្រហ្មទណ្ទកំរិតស្រាលខេត្តបានអោយដឹងថា ពេលនេះជនសង្ស័យត្រូវបានកំលាំងជំនាញរបស់កំពុងតែសួរនាំ និងកសាងសំណុំរឿងដើម្បីបញ្ជូនទៅសាលាដំបូងខេត្តនៅព្រឹកថ្ងៃទី៨ មីនា ឆ្នាំ២០២០ ដើម្បីចាត់ការតាមច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ