រាជធានីភ្នំពេញ ៖ បង្ហាញកង្វះវត្ថុធាតុសម្រាប់បម្រើនៅក្នុងវិស័យកាត់ដេរឈានមកដល់ ចំណុចមួយបង្ហាញថា កម្មកររោងចក្រជិត ២ម៉ឹននាក់ត្រូវព្យួរការងារមួយរយៈពេលខណៈ ក្រុមហ៊ុនចំនួន ៣៣ បានដាក់ពាក្យស្នើសុំមកដល់ក្រសួងរួចរាល់គិតត្រឹមថ្ងៃទី៣ ខែមីនា ឆ្នាំ ២០២០នេះ ។
លោក ហេង សួរ មន្ត្រីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈមានប្រសាស ន៍ឱ្យដឹងថា «គិតមកដល់ថ្ងៃទី ៣ខែមីនា មានរោងចក្រប្រមាណ ៣៣ បានដាក់ពាក្យសុំ ព្យួរការងាររយៈពេល ២សប្តាហ៍ដែលស្មើនឹងកម្មករប្រមាណ ១៧.០៩៦នាក់ ។ ការដាក់ ពាក្យព្យួរទាំង ៣៣ រោងចក្រនេះបើគិតជាកម្មករសរុបមានប្រហែល ៦,២ម៉ឺននាក់ ប៉ុន្តែសុំ ព្យួរតែ ១៧.០៩៦នាក់ទេ អុីចឹងមានន័យថាព្យួរ ១ភាគ ៤នៃចំនួនកម្មករ និយោជិក សរុប ហើយព្យួរនៅចំពោះមុខនេះមានរយៈពេល ២សប្តាហ៍សិន» ។
លោកបន្តថា «ក្រុមហ៊ុន ឬរោងចក្រដែលបានដាក់ព្យួរនេះ គឺសុំព្យួរដោយផ្នែក ។ ឧទាហរ ណ៍បើមាន ៦សង្វាក់ផលិតកម្ម សុំព្យួរមួយខ្សែរសង្វាក់ផលិតកម្ម ។ ខាងរោងចក្ររំពឹងថា វត្ថុធាតុដើមនឹងមកដល់នៅសប្តាហ៍ទី ៤ខែមីនាខាងមុខនេះ ។ យើងមានសុទិដ្ឋិនិយម ដោយសារតែយើងបានគិតថា ចំនួនព្យួរប្រហែល១០០% តែជាក់ស្តែងរោងចក្រទាំងអស់ បានគណនាមើលទៅមិនមានតម្រូវការចាំបាច់ត្រូវព្យួរ ១០០% នោះទេ។ ព្យួរ ១ភាគ ៤នៃ សង្វាក់ផលិតកម្មនៃកម្មករសរុប ហើយព្យួរតែពីរសប្តាហ៍ ដោយរំពឹងថាវត្ថុធាតុដើមនេះ នឹងមកដល់ចុងខែមីនានេះ» ។
តាមមន្ត្រីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ឱ្យដឹងទៀតថា អ្វីដែល ក្រសួងខិតខំជួយសម្របសម្រួលជាមួយរដ្ឋាភិបាលចិនក៏ដូចជាអ្នកបញ្ជាទិញ ការសម្របសម្រួលត្រៀមលក្ខណៈនៃវត្ថុធាតុដើមនេះហាក់បីដូចជាមានប្រសិទ្ធភាពដោយសារតែម្ចាស់រោងចក្រមានទំនុកចិត្តជាងមុនថានឹងមានវត្ថុធាតុដើមសម្រាប់ដំណើរការនៅសប្តាហ៍ទី ៤ចុងខែមីនានេះ ។ បើទោះបីការរំពឹងថា វត្ថុធាតុដើមនឹងមកដល់តាមការគ្រោងទុក តែនៅ ចុងខែមីនានេះក្តី តែប្រហែលនឹងរោងចក្រមួយចំនួននៅតែដាក់ពាក្យសុំព្យួរ ។
លោកបន្តទៀតថា «គិតត្រឹមល្ងាចថ្ងៃទី ២ខែមីនា ការដែលក្រុមហ៊ុនដាក់ពាក្យសុំព្យួរនេះ វាមិនទាន់ដល់កម្រិតគួរឱ្យបារម្ភនោះទេដោយសារម្ចាស់រោងចក្រនីមួយៗមានលទ្ធភាពចរចាជាមួយកម្មករនិយោជិករបស់ពួកគាត់ ហើយការព្យួរនេះវាមានរយៈតែពីរសប្តាហ៍ វាមិន មែនពីរខែដូចដែលយើងគិតពីមុន» ។
លោកបណ្ឌិត ជួន មុំថុល ប្រធានសហព័ន្ធសហជីពខ្មែរបានឱ្យដឹងថា «ក្នុងចំណោមរោង ចក្រដែលខ្ញុំគ្រប់គ្រងប្រាប់មកខ្ញុំព្រឹកមិញថាមានរោងចក្រមួយនៅស្គន់មានកម្មករពី ១.០០០ ទៅ ១.៥០០នាក់ស្មើ ៥០% (ព្យួរតាមផ្នែក) ដោយសារវត្ថុធាតុដើមមកយឺត ។ ក្រៅពីនោះគេមានផលិតកម្មធម្មតា ហើយអ្វីដែលក្រសួងប្រកាសពេលមុននេះ គឺជាការទស្សទាយក្រែងលោនៅចិននេះផលិតកម្មមិនដើរស្រួល ឬកម្មករមិនមកធ្វើការជាដើម» ។
លោកបណ្ឌិត ជួន មុំថុល «បើតាមខ្ញុំតាមដានព័ត៌មានចិន គឺថាកម្មករនៅទីនោះបានត្រ ឡប់ចូលធ្វើការវិញបាន ៨០% ហើយ ។ ដូចនេះយើងសង្ឃឹមថានៅដំណាច់ខែមីនាខាង មុខនេះវត្ថុធាតុដើមអាចនឹងមកបានពី ៨០ ទៅ ៩០%» ។
ទន្ទឹមនឹងប្រធានសម្ព័ន្ធសហជីពខាងលើបង្ហាញក្តីរំពឹងកម្រិតខ្ពស់ថា នៅចុងខែមីនាអាច នឹងមានវត្ថុធាតុដើមចូលដល់ប្រទេសកម្ពុជា តែសម្រាប់លោក អាត់ ធន់ យល់ឃើញថា បើបញ្ហាជំងឺដែលកើតនៅប្រទេសចិនមិនអាចដោះស្រាយបានទេ នោះរោងចក្រនៅកម្ពុជា អាចនឹងដាក់ពាក្យព្យួរថែមច្រើនទៀត ។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរ កម្ពុជាមានប្រសាសន៍ថា «មកដល់ពេលនេះខ្ញុំសង្កេតឃើញមានរោងចក្រច្រើនគួរសមហើយដែលបានព្យួរការងារ ។ តាមខ្ញុំដឹងក្នុងចំណោម១០០ ក្រុមហ៊ុនមានព្យួរ៧ ឬ៨ ក្រុមហ៊ុនហើយ អុីចឹង ដំណើរការនេះអាចនឹងដល់ជាង ២០០ ក្រុមហ៊ុនបើតាមយើងមើលឃើញ» ។
លោកបញ្ជាក់ថា «ក្រុមហ៊ុន ៥ បានព្យួរជាផ្លូវការ និងមានរោងចក្រ ២ ផ្សេងទៀតកំពុង ចរចាហើយដាក់ពាក្យស្នើមកខាងក្រសួង ។ បើសិនជាបញ្ហា វីរុស កូរ៉ូណា នៅស្រុកចិននេះ មិនអាចដោះស្រាយបានទេ ខ្ញុំគិតថាប្រហែលមានរោងចក្រនៅកម្ពុជាព្យួរច្រើនថែមទៀត» ។
ពាក់ព័ន្ធនឹងការព្យួរការងាររបស់ក្រុមហ៊ុន ឬរោងចក្រស្នើសុំមកក្រសួងនេះបើតាមប្រធាន សហជីពមួយផ្សេងទៀតយល់ថា វាមិនពាក់ព័ន្ធនឹងកង្វះវត្ថុធាតុដើមនោះទេ គឺមកពីបញ្ហា EBA ទៅវិញ ។
លោកស្រី យ៉ាង សុភ័ណ្ឌ ប្រធានសហព័ន្ធសហជីពកម្ពុជាប្រសាសន៍ «ខ្ញុំឃើញមានរោងចក្រមួយចំនួនមិនមានការងារធ្វើគ្រប់គ្រាន់តាមផ្នែក ។ ប៉ុន្តែដោយឡែកការថែមម៉ោង របស់កម្មករអត់មានទេ ចេញធ្វើការនៅម៉ោង ៤ល្ងាច។ រោចក្រមួយចំនួនទៀតឃើញថា មានការព្យួរការងារដែរ ប៉ុន្តែមិនបានផ្តល់អត្ថប្រយោជន៍ជូនកម្មករទេ ដោយដោះដូរទៅ និងការឈប់សម្រាកប្រចាំឆ្នាំជូនកម្មករទៅវិញ» ។
អ្នកស្រីលើកឡើងថា «ពាក់ព័ន្ធការព្យួរការងារនេះ ខ្ញុំគិតថាវាមិនមែនដោយសារកង្វះវត្ថុ ធាតុដើមនោះទេ ខ្ញុំគិតថា បញ្ហាចម្បងធំបំផុតនោះ គឺពាក់ព័ន្ធនឹងបញ្ហា EBA» ។
តាមប្រធានសហព័ន្ធសហជីពកម្ពុជា«ការ ព្យួរការងារនេះយើងឃើញថាពួកគាត់មានការ ខ្វាយខ្វល់ខ្លាំងមែនទែន ។ មិនត្រឹមតែខ្វាយខ្វល់ទេសូម្បីតែគ្រួសារបងប្អូនកម្មករក៏កាត់ ខ្វាយខ្វល់ចំពោះបញ្ហាទាំងអស់នេះដែរ ។ អ៊ីចឹងហើយបានគាត់ស្នើសុំទទួចទៅដល់រាជ រដ្ឋាភិបាលត្រូវធ្វើយ៉ាងណា គួរមានវិធានការជាក់លាក់មួយឆ្លើយតបទៅនិងសំណើរ របស់សហគមន៍អឺរ៉ុបដែលបានលើកឡើងមកកាន់រាជរដ្ឋាភិបាលយើង ។
បើសិនគាត់ទទួលរងបញ្ហាប្រឈម និងការបាត់បង់ការងារធ្វើ កម្មករនឹងបាត់បង់ប្រាក់ចំណូលសម្រាប់ផ្គង់ផ្គង់គ្រួសារ គាត់អាចមានបញ្ហាទៅលើការបង់ប្រាក់ទៅខាងធនាគារ ព្រោះកម្មករភាគច្រើនគាត់ខ្ចីលុយពីធនាគារមកប្រើប្រាស់ផ្សេងៗ ។ អីុចឹងខ្ញុំគិតថាគាត់នឹងទទួលរងបញ្ហាប្រឈមទាំងនេះ» ៕ (កែសម្រួលដោយ ៖ ធីតា)
ចែករំលែកព័តមាននេះ