រាជធានីភ្នំពេញ ៖ ក្រសួងធនធានទឹក និងឧតុនិយមបានឲ្យដឹងថា កម្ពុជា និងចុះត្រជាក់ដល់២២អង្សាសេចាប់ពីថ្ងៃទី៣ ដល់ថ្ងៃទី៩ ខែមីនា ហើយមានភ្លៀង និងផ្គររន្ទះ ។ យោងតាមការចេញផ្សាយរបស់ក្រសួងធនធានទឹក នៅថ្ងៃទី៣ មីនា ស្តីពីស្ថានភាពធាតុអាកាសបានឲ្យដឹងថា តាមរយៈការតាមដានស្ថានភាពអាកាសធាតុជាប់ជាបន្តបន្ទាប់សង្កេតឃើញថា កម្រិតសម្ពាធទាបនៅលើផ្ទៃដីគ្របដណ្តប់លើភាគពាយ័ព្យ ។
ស្ថានភាពបែបនេះ បានធ្វើឲ្យតំបន់ជួរភ្នំដងរែក និងខ្ពង់រាបឦសានសីតុណ្ហភាពអប្បរមាមានពី២២-២៤°C និងសីតុណ្ហភាពអតិបរមាមានពី៣៣C-៣៥C ។ តំបន់វាលទំនាបកណ្តាល មានសីតុណ្ហភាពអប្បរមាពី២៤អង្សាសេដល់២៦អង្សាសេ សីតុណ្ហភាពអតិបរមាមានពី៣៦អង្សាសេ ដល់៣៨អង្សាសេ ។
ក្រសួងបន្តថានៅថ្ងៃទី៤ដល់៦ខែមីនា បណ្តាខេត្តនៅភាគពាយ័ព្យនឹងអាចមានភ្លៀងពីតិចទៅមធ្យម ។ ចំណែកតំបន់មានសមុទ្រមានសីតុណ្ហភាពអប្បរមាពី២៤អង្សាសេ ដល់២៦អង្សាសេ និងសីតុណ្ហភាពអតិបរមាពី៣៤អង្សាសេ ដល់៣៦អង្សាសេ។ ផ្នែកកខ្វះនៃបណ្តាខេត្តនៅតំបន់មាត់សមុទ្រនឹងអាចមានភ្លៀងខ្សោយ ។
ជាមួយគ្នាក្រសួងបានឲ្យដឹងថា ស្ថានភាពអាកាសធាតុបែបនេះ សូមប្រជាពលរដ្ឋមានការប្រុងប្រយ័ត្នចំពោះបាតុភូតផ្គរ រន្ទះ និងខ្យលកន្ត្រាក់ដែលនឹងអាចកើតមាននៅបណ្តាខេត្តភាគពាយ័ព្យមានជាអាទិ៍ ខេត្តបន្ទាយមានជ័យ ឧត្តរមានជ័យ សៀមរាប បាត់ដំបង និងខេត្តប៉ៃលិន ចាប់ពីថ្ងៃទី៤ ដល់៦ខែមីនា ឆ្នាំ២០២០ ៕
ចែករំលែកព័តមាននេះ