រាជធានីភ្នំពេញ ៖ ខណៈដែលបណ្តាប្រទេសមួយចំនួនលើសកលលោក បានកំពុងតែឆ្លងជំងឺកូវីដ ១៩ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ជាថ្មីថា មកដល់ពេលនេះ កម្ពុជាមិនទាន់មានករណីឆ្លងជំងឺនេះនោះទេ។
សម្តេចតេជោ បានសរសេរលើបណ្តាញសង្គមហ្វេសប៊ុកនៅថ្ងៃទី១ ខែមីនា ឆ្នាំ២០២០ យ៉ាងដូច្នេះថា ៖ «សុខសប្បាយជាទេ បងប្អូនជនរួមជាតិ? ក្នុងពេលវេលាដែលជំងឺឆ្លងកូវីដ១៩ (កូរ៉ូណា) កំពុងតែកើតមាននៅតាមបណ្តាប្រទេសមួយចំនួន សូមបងប្អូនប្រជាពលរដ្ឋចូលរួមថែរក្សាការពារអនាម័យសុខភាពផ្ទាល់ខ្លួន និងអនាម័យសុខភាពក្នុងក្រុមគ្រួសារឲ្យបានល្អ»។
ជាមួយគ្នានោះដែរ សម្តេចក៏បានសូមឲ្យប្រជាពលរដ្ឋឧស្សាហ៍ដុសលាងសម្អាតមុខមាត់ ដៃជើង ខ្លួនប្រាណជាមួយសាប៊ូ ឬសារធាតុសម្លាប់មេរោគ ដើម្បីទប់ស្កាត់ការឆ្លងរោគផ្សេងៗ។ ពិតណាស់ គឺការពារប្រសើរជាងការព្យាបាល។
សម្តេចបញ្ជាក់ថា ៖ «ចំពោះប្រទេសកម្ពុជាយើងមកទល់ពេលនេះ គឺមិនមានជំងឺឆ្លងកូវីដ១៩ ទេ។ ទន្ទឹមនឹងនេះដែរ ដើម្បីសុខភាពល្អ សូមបងប្អូនប្រជាពលរដ្ឋ និងក្មួយៗយុវជន ចូលរួមហាត់កីឡា និងទទួលទានទឹកឱ្យបានច្រើន»។
សម្តេចក៏បានសូមជូនពរបងប្អូនជនរួមជាតិបានសប្បាយរីករាយក្នុងថ្ងៃឈប់សម្រាកចុងសប្តាហ៍នាដើមខែថ្មីនេះផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ