រាជធានីភ្នំពេញ៖ ការនាំចេញអង្កររបស់កម្ពុជានៅប៉ុន្មានឆ្នាំចុងក្រោយនេះហាក់ដូចពិបាកក្នុងការទទួលបានកំណើនខ្ពស់ណាស់ក្នុងមួយខែៗ ។ ជាក់ស្តែងចូលដល់ខែមករាដើមឆ្នាំ២០២០ នេះ ការនាំចេញអង្កររបស់កម្ពុជាទៅទីផ្សារក្រៅប្រទេសបានធ្លាក់ចុះប្រមាណ១៥% បើប្រៀបធៀបនឹងការនាំចេញក្នុងរយៈពេលដូចគ្នាក្នុងឆ្នាំ២០១៩ កន្លងទៅ។ បរិមាណនៃការនាំចេញអង្ករខ្មែរមានការធ្លាក់ចុះនេះ ត្រូវបានអ្នកជំនាញមើលឃើញថាដោយសារតែពាក់ព័ន្ធនឹងកត្តាបញ្ហាធំៗពីរនៅកើតនៅក្នុងប្រទេសចិនដែលជាមហាមិត្តដែកថែបរបស់ខ្មែរ ។
យោងតាមរបាយការណ៍ស្តីពី សភាពការកសិកម្ម រុក្ខាប្រមាញ់និងនេសាទប្រចាំខែមករា ឆ្នាំ ២០២០ និងទិសដៅអនុវត្តបន្តរបស់ក្រសួងកសិកម្មចេញផ្សាយកាលពីថ្ងៃទី២៨ ខែកុម្ភៈ ម្សិលមិញថា «កម្ពុជានាំចេញអង្ករទៅបរទេសសរុបមានចំនួនចំនួន៥០.៤៥០តោន មានថយចុះចំនួន៨.១៧៥តោន ស្មើប្រមាណ១៥,៣% តិចជាងបរិមាននាំចេញក្នុងខែមករាឆ្នាំ២០១៩មានចំនួន៥៩.៦២៥តោន» ។
របាយការណ៍ដដែលបានបញ្ជាក់ថា កម្ពុជានាំចេញអង្ករទៅកាន់ទិសដៅចំនួន៤០ប្រទេសក្នុងនោះចិនឈរលំដាប់ទី១ (១,៥ម៉ឺនតោន) ប្រទេសហ្គាបុង(៦.១១៨តោន)ប្រទេសបារាំង(៥.៦១៧តោន) ប្រទេសម៉ាឡេស៊ី(៤.៤០០តោន) ប្រទេសអង់គ្លេស(៣.០៥៥តោន) ប្រទេសឆែក(២.១៨៩តោន) ប្រទេសណេដឺឡែន(២.១២៧តោន) ប្រទេសអូស្ត្រាលី(២.០៧១តោន) ប្រទេសអាល្លឺម៉ង់(១.៦០៥តោន)និងប្រទេសប្រ៊ុយណេ(១.០៥០តោន ហើយបច្ចុប្បន្នក្រុមហ៊ុនបាននាំចេញអង្ករមានចំនួន៤៣ក្រុមហ៊ុន»។
ពាក់ព័ន្ធនឹងការនាំចេញអង្ករថយចុះនៅខែមករាដើមឆ្នាំ២០២០នេះ បើតាមអ្នកជំនាញវិស័យស្រូវអង្ករដោយសារបញ្ហាពីរកើតឡើងនៅប្រទេសចិន ពោលគឺការឈប់សម្រាប់រដូវចូលឆ្នាំចិននិងការផ្ទុះឡើងនូវវិរុសកូរ៉ូណា ឬហៅថា COVID-19 និងបានសម្លាប់មនុស្សអស់ជាច្រើនស្ថិតក្នុងរយៈពេលខ្លីនេះ។
លោកឧកញ៉ា ចាន់ សុខឃាំង តំណាងសហព័ន្ធស្រូវអង្ករកម្ពុជាបានមានប្រសាសន៍ថា «ជាទូទៅនៅពេលចូលឆ្នាំចិន គឺពួកគាត់ឈប់សម្រាកមុនពីរអាទិត្យ និងក្រោយពីរអាទិត្យ ឬគាត់ឈប់មុនពីរអាទិត្យ ឬឈប់ក្រោយ១០ថ្ងៃ ។ នេះជាទម្លាប់របស់គាត់ អីចឹងវាធ្វើឱ្យប៉ះពាល់រាល់ការកម្ម៉ង់អ្វីផ្សេងៗ ។ ដូចនេះនៅក្នុងខែមករានេះឃើញថាការកម្ម៉ង់មានការធ្លាក់ចុះបន្តិចដោយសារវាចំពាក់កណ្តាលខែមករា។ បញ្ហាទី២ វាប៉ះពាល់ដោសារវីរុសកូរ៉ូណានេះ ដែរ ។នៅពេលគាត់ចូលពីឆ្នាំចិនមកវិញចង់ធ្វើការបន្តទៀតគាត់ធ្វើមិនទាន់បាន មានក្រុមហ៊ុនមួយចំនួននៅស្រុកចិនគាត់ធ្វើការពីផ្ទះមក (ធ្វើតាមអនឡាញ)»។ បើទោះបីការនាំចេញនៅខែដំបូងធ្លាក់ចុះដោយសារបញ្ហាខាងលើ ប៉ុន្តែនៅខែបន្ទាប់ការនាំចេញអង្កររបស់កម្ពុជាបង្ហាញសញ្ញាហាក់ងើបឡើងបន្តិចវិញទាំងទីផ្សារនៅចិន ក៏ដូចជាសហគមន៍អឺរ៉ុប។
លោកឧកញ៉ាបន្តថាការនាំចេញអង្ករនៅដំបូងធ្លាក់ ប៉ុន្តែនៅក្នុងខែកុម្ភះវាហាក់មានសញ្ញាកំណើនឡើងមកវិញបន្តិច ដោយសារទីផ្សារវាចាប់ផ្តើមងើបឡើងវិញទាំងនៅទីផ្សារចិននិងខាងសហគមន៍អឺរ៉ុបឃើញថាមានការកើនឡើងវិញ ហើយមកដល់ម៉ោងនេះស្តុកស្រូវវាមិនមានបញ្ហាទេគឺនៅមានស្រូវសម្រាប់កែច្នៃនាំចេញ តែគ្រាន់ថាវាមានប្រភេទអង្ករខ្លះវាតិច ប្រភេទអង្ករខ្លះនៅមានច្រើន។
បើតាមលោកឧកញ៉ា តំណាងសហព័ន្ធស្រូវអង្ករកម្ពុជា ការនាំចេញអង្កររបស់កម្ពុជាមកដល់បច្ចុប្បន្ននេះ បើនាំចេញទៅទីផ្សារប្រទេសចិននិងទៅប្រទេសផ្សេងៗហាក់មិនមានការប្រែប្រួលនោះទេ(អង្ករធម្មតានិងអង្កប្រណិត) តែបើនាំទៅខាងសហគមន៍អឺរ៉ុបវិញការនាំចេញអង្ករប្រណិតពីកម្ពុជាឃើញមានរហូតដល់៧០ទៅ៧៥%៕ កែសម្រួលដោយ ៖ សុឃាក់
ចែករំលែកព័តមាននេះ