ភាគច្រើននៃពួកយើងប្រហែលជាធ្លាប់បានលឺអំពីជាតិកូឡេស្តេរ៉ូលល្អ និងមិនល្អរួចមកហើយ។ ជាធម្មតាកូឡេស្តេរ៉ូលមិនល្អអាចបង្កផលប៉ះពាល់ដល់សសៃឈាម ដោយធ្វើឱ្យប្រែជាឡើងរឹង និងរួមតូច ខណៈដែលកូឡេស្តេរ៉ូលល្អប្រសើរសម្រាប់សុខភាព ដោយវាជួយកាត់បន្ថយកម្រិតនៃជាតិកូឡេស្តេរ៉ូលមិនល្អក្នុងឈាម។
ប៉ុន្តែថាតើអ្វីជាកូឡេស្តេរ៉ូលមិនល្អ? តាមពិតទៅវាត្រូវបានគេស្គាល់ផងដែរថាជា ជាតិខ្លាញ់មិនល្អទ្រីគ្លីសេរីដ (triglycerides) ប្រភេទនៃជាតិខ្លាញ់ក្នុងចរន្តឈាម។ កាលណាកម្រិតនៃជាតិខ្លាញ់ក្នុងឈាមឡើងខ្ពស់ វាក៏មិនខុសពីកម្រិតនៃជាតិកូឡេស្តេរ៉ូលមិនល្អដែរ គឺបង្កើនហានិភ័យនៃជំងឺបេះដូងគួរឱ្យព្រួយបារម្ភ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីប្រភេទនៃអាហារដែលអ្នកគួរចៀសវាងនៅពេលមានបញ្ហាលើសខ្លាញ់ទ្រីគ្លីសេរីដ ៖
១. បន្លែមានជាតិម្សៅ ៖ ការកម្រិតការទទួលទានបន្លែមានជាតិម្សៅដូចជាដំឡូង ពោត សណ្ដែកជាដើម គឺសំខាន់ខ្លាំងណាស់នៅពេលអ្នកកំពុងប្រឈមមុខនឹងបញ្ហាជាតិខ្លាញ់ក្នុងឈាមឡើងខ្ពស់។ នោះក៏ព្រោះតែបន្លែមានជាតិម្សៅផ្ទុកសម្បូរទៅដោយកាបូអ៊ីដ្រាតដែលរាងកាយបំលែងទៅជាខ្លាញ់ទ្រីគ្លីសេរីដ។
២. ផ្លែឈើ ៖ នោះក៏ព្រោះតែផ្លែឈើភាគច្រើនមានផ្ទុកជាតិស្ករធម្មជាតិ fructose ខ្ពស់។នៅពេលបរិមាណជាតិស្ករ fructose កើនឡើងហួសប្រមាណនោះរាងកាយនឹងបំលែងវាទៅជាខ្លាញ់ទ្រីគ្លីសេរីដ។ ដូច្នេះដើម្បីជាការប្រសើរអ្នកដែលមានបញ្ហាខ្លាញ់ក្នុងឈាមខ្ពស់គួរទទួលទានផ្លែឈើត្រឹមពី ២ ទៅ ៣ ចំណិតក្នុងមួយថ្ងៃបានហើយ។
៣. ត្រីកំប៉ុង ៖ ត្រីកំប៉ុងភាគច្រើនមានផ្ទុកជាតិខ្លាញ់ដែលមិនល្អសម្រាប់អ្នកមានបញ្ហាជាតិខ្លាញ់ក្នុងឈាមខ្ពស់ឡើយ។
៤. គ្រាប់ធញ្ញជាតិចម្រាញ់ ៖ គ្រាប់ធញ្ញជាតិធម្មតា គឺល្អសម្រាប់សុខភាពរាងកាយ ប៉ុន្តែចំពោះគ្រាប់ធញ្ញជាតិចម្រាញ់វិញច្រើនតែមានផ្ទុកជាតិខ្លាញ់មិនល្អនិងកាឡូរីខ្ពស់។
៥. គ្រឿងស្រវឹង ៖ ការទទួលទានគ្រឿងស្រវឹងហួសប្រមាណលើសពី ១ កែវក្នុងមួយថ្ងៃសម្រាប់នារី ឬ ២ កែវក្នុងមួយថ្ងៃសម្រាប់បុរស គឺមិនល្អសោះឡើយចំពោះសុខភាពរាងកាយទាំងមូលដែលវាអាចបង្កជាជំងឺផ្សេងៗគួរអោយព្រួយបារម្ភ រួមទាំងបញ្ហាខ្លាញ់ក្នុងឈាមឡើងខ្ពស់។
៦. ភេសជ្ជៈផ្អែម ៖ ភាគច្រើននៃពួកយើងសុទ្ធតែដឹងហើយថាភេសជ្ជៈមានផ្ទុកជាតិស្ករខ្ពស់អាចជះឥទ្ធិពលគួរឱ្យព្រួយបារម្ភចំពោះសុខភាព។ លើសពីនេះទៅទៀតជាតិស្ករមួយចំនួនក្នុងភេសជ្ជៈផ្អែមក៏អាចត្រូវបានបំលែងទៅជាជាតិខ្លាញ់ទ្រីគ្លីសេរីដផងដែរ។ ដូច្នេះដើម្បីជាការប្រសើរចូរកម្រិតការទទួលទានស្ករ។
៧. សាច់សម្បូរខ្លាញ់ ៖ ទោះជាយ៉ាងណាក៏មិនមែនមានន័យថាអ្នកត្រូវឈប់ទទួលទានសាច់តែម្ដងឡើយ! គ្រាន់តែជ្រើសរើសទទួលទានសាច់គ្មានខ្លាញ់ គឺប្រសើរហើយ។ ដើម្បីជាការប្រសើរអ្នកក៏គួរចៀសវាងសាច់កែច្នៃផងដែរ (ប្រភពពី៖ Health.com.kh)៕ (កែសម្រួលដោយ ៖ បុប្ផា)
ចែករំលែកព័តមាននេះ