ខេត្តមណ្ឌលគិរី ៖ បើតាមសេចក្តីរាយការណ៍បឋមបានឱ្យដឹងថា ខណៈនៅប្រទេសវៀតណាម កំពុងតែផ្ទុះជំងឺផ្ដាសាយបក្សី ដែលបង្កឡើងដោយវីរុសប្រភេទ A/H5N1 ហើយអាជ្ញាធរប្រទេសនេះ បានកម្ទេចសត្វមាន់ប្រមាណជាង៥ម៉ឺនក្បាលចោល ។…
ខេត្តមណ្ឌលគិរី ៖ បើតាមសេចក្តីរាយការណ៍បឋមបានឱ្យដឹងថា ខណៈនៅប្រទេសវៀតណាម កំពុងតែផ្ទុះជំងឺផ្ដាសាយបក្សី ដែលបង្កឡើងដោយវីរុសប្រភេទ A/H5N1 ហើយអាជ្ញាធរប្រទេសនេះ បានកម្ទេចសត្វមាន់ប្រមាណជាង៥ម៉ឺនក្បាលចោល ។
ជុំវិញបញ្ហាខាងលើនេះ អាជ្ញាធរខេត្តមណ្ឌលគិរី ជាពិសេសមន្ត្រីជំនាញពេទ្យសត្វកំពុងតែមានការព្រួយបារម្ភ និងមានវិធាការទប់ស្កាត់ ព្រោះតែខេត្តមណ្ឌលគិរី មានព្រំប្រទល់ជាប់ជាមួយនឹងប្រទេសវៀតណាម ។
ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្មរុក្ខប្រមាញ់ និងនេសាទខេត្តមណ្ឌលគិរី លោក ប៉ែន ប្រុស បានប្រាប់ថា មន្ត្រីជំនាញកំពុងមានការព្រួយបារម្ភក្នុងចំណុចនេះ ប៉ុន្តែជាទោះយ៉ាងណា នៅខេត្តមណ្ឌលគិរី មិនទាន់កើតមានភាពមិនប្រក្រតីណាមួយរបស់សត្វបក្សី ជាពិសេសគឺសត្វមាន់ទានោះទេ ។
លោកបន្តថា ទោះជាខេត្តមណ្ឌលគិរីនាពេលកន្លងមក ពុំធ្លាប់នាំសត្វមាន់ទាចូលពីប្រទេសវៀតណាម ប៉ុន្តែរយៈពេលប៉ុន្មានថ្ងៃមកនេះ ជំនាញពេទ្យសត្វបានចុះទៅដល់តាមច្រកទ្វារព្រំដែន ស្នើឲ្យមានការទប់ស្កាត់មិនឲ្យមានការនាំចូលសត្វមាន់ទាមកកាន់ខេត្តមណ្ឌលគិរី ។
លោកប្រធានការិយាល័យផលិតកម្ម និងបសុព្យាបាលបានបញ្ជាក់ថា ខេត្តមណ្ឌលគិរីមានប្រភពនាំសត្វមាន់ទាចូលមកចែកចាយពីក្រុមហ៊ុនស្របច្បាប់មួយ ហើយមុនចូលមកទឹកដីខេត្តមណ្ឌលគិរី មន្ត្រីជំនាញក៏បានត្រួតពិនិត្យលើឯកសារដឹកជញ្ជូន និងបានបាញ់ថ្នាំសម្លាប់មេរោគតាមលក្ខណៈបច្ចេកទេស មុនអនុញ្ញាតឲ្យចែកចាយ ។
លោកបញ្ជាក់ទៀតថា មន្ត្រីជំនាញក៏បាននិងកំពុងចុះផ្សព្វផ្សាយ អប់រំណែនាំអំពីផលបង្ក និងវិធានការទប់ស្កាត់ជូនដល់កសិករនៅតាមមូលដ្ឋានផងដែរ ដោយជំហ៊ានដំបូងនេះ គឺកំពុងអនុវត្តនៅស្រុកកែវសីមា ៕ (កែសម្រួលដោយ ៖ បុប្ផា)
ចែករំលែកព័តមាននេះ