រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ដីវាលជាង១០ហិកតា មានស្មៅជញ្ជ្រាំងនិងព្រៃត្រូវបានអគ្គីភ័យឆាបឆេះរាលដាលជិតដល់ផ្ទះប្រជាពលរដ្ឋ ត្រូវបានរថយន្តពន្លត់អគ្គីភ័យជួយពន្លត់ទាន់ពេលវេលា បង្កឲ្យមានការភ្ញាក់ផ្អើល កាលពីវេលាម៉ោង៧យប់ថ្ងៃទី២២ ខែកុម្ភៈនេះ នៅចំណុចដីវាលខាងកើតភូមិ២ ជាប់ព្រំប្រទល់គ្នា មានភូមិចែងម៉ែង ភូមិសំរោង សង្កាត់សំរោងក្រោម ខណ្ឌពោធិ៍សែនជ័យ ។
តាមសំដីប្រជាពលរដ្ឋនៅភូមិទាំង២ បានអោយដឹងថា ករណីអគ្គីភ័យឆាបឆេះស្មៅ និងជញ្ជ្រាំងងខាងលើនេះឆេះតាំងពីថ្ងៃរសៀលមកម្ល៉េះដោយឆេះនៅឆ្ងាយពីភូមិទើបសមត្ថកិច្ច នឹងអាជ្ញាធរភូមិខាងលើមិនមានវិធានការពន្លត់ឡើយ ។
ប្រភពពត៌មានដដែលបានបន្តទៀតថា លុះនៅវេលាម៉ោងកើតហេតុភ្លើងបានឆាបឆេះយ៉ាងសន្ធោសន្ធៅរាលដាលជិតដល់ផ្ទះនាក់ភូមិត្រូវបានប្រជាពលរដ្ឋនាំគ្នាយកស្លឹកឈើវាយពន្លត់សមត្ថកិច្ច និងអាជ្ញាធរទើបភ័យទាក់ទងទៅរថយន្តពន្លត់អគ្គីភ័យមកជួយពន្លត់ ។ លុះបន្ទាប់មករថយន្តពន្លត់អគ្គីភ័យរបស់ស្នងការរាជធានីភ្នំពេញ ដែលប្រចាំការតាមបណ្តាខណ្ឌមានខណ្ឌពោធិ៍សែនជ័យ និងខណ្ឌសែនសុខបានសហការគ្នា ដើម្បីជួយពន្លត់ភ្លាមៗផងដែរ ។
បើតាមមន្ត្រីរបស់ខណ្ឌពោធិ៍សែនជ័យ បានបញ្ជាក់ថា ការជួយពន្លត់វាលស្មៅជញ្ជ្រាំងព្រមទាំងព្រៃជិតផ្ទះរបស់ប្រជាពលរដ្ឋខាងលើប្រើអស់រយៈពេលជាង២ម៉ោង ដោយសារតែផ្លូវនៅតំបន់ខាងលើ ពិបាកចូលទៅជួយពន្លត់ពេក ហើយរថយន្តបានមកជួយពន្លត់មានចំនួន៤គ្រឿង ខ្លាចរាលដាលដល់ផ្ទះប្រជាពលរដ្ឋមួយខ្នងដែលទុកចោលមិនមានមនុស្សនៅតែសំណាងល្អមិនបានឆ្លងរាលដាលទៅទេ ដោយសារប្រជាពលរដ្ឋជួយពន្លត់ទាន់ និងរថយន្តពន្លត់អគ្គីភ័យមកទាន់ពេលវេលា ៕
ចែករំលែកព័តមាននេះ