រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ដែលតុបតែងខ្លួនធ្វើជាស្រី ហើយបានឡាយរូបភាពបង្ហោះលក់ខ្លួនតាមសង្គមហ្វេសប៊ុក ( Bigo Live) មានតម្លៃចាប់ពី៣០ ទៅ៦០ដុល្លារ…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ដែលតុបតែងខ្លួនធ្វើជាស្រី ហើយបានឡាយរូបភាពបង្ហោះលក់ខ្លួនតាមសង្គមហ្វេសប៊ុក ( Bigo Live) មានតម្លៃចាប់ពី៣០ ទៅ៦០ដុល្លារ រហូតដល់១០០ដុល្លារក្នុង១យប់ ត្រូវបានកម្លាំងសមត្ថកិច្ចនគរបាលខណ្ឌទួលគោក ចាប់ខ្លួនបញ្ជូនទៅកាន់សាលាដំបូងរាជធានីភ្នំពេញ កាលពីរសៀលថ្ងៃទី២២ ខែកុម្ភៈ ដើម្បីចាត់ការតាមផ្លូវច្បាប់ ។
សេចក្តីរាយការណ៍បន្តថា បុរសខាងលើនោះ ឈ្មោះ ម៉ន អ៊ីវ៉ា អាយុ២៦ឆ្នាំ មុខរបរជាប្រុសលក់ខ្លួនពេលរាត្រី ស្នាក់នៅផ្ទះជួលខណ្ឌទួលគោក រាជធានីភ្នំពេញ ។
ទាក់ទិននឹងករណីខាងលើនេះ លោកវរសេនីយ៍ទោ សុខ ហេង អធិការនគរបាលខណ្ឌទួលគោក បានឲ្យអ្នកសារព័ត៌មានដឹងថា កាលពីរសៀលថ្ងៃទី២០ កុម្ភ: កម្លាំងសមត្ថកិច្ច នៃអធិការដ្ឋាននគរបាលខណ្ឌទួលគោក ដោយបានឯកភាពពីគណៈបញ្ជាការឯកភាពខណ្ឌ និងសម្របសម្រួលពីស្ថាប័នអយ្យការអមសាលាដំបូងរាជធានីភ្នំពេញ បានចុះធ្វើការឃាត់ខ្លួនបុរសម្នាក់តែងខ្លួនធ្វើជាស្រី (ភេទទី៣) ពាក់ព័ន្ធនឹងករណីថតឡាយវីដេអូលក់ខ្លួនលើ Bigo Live ដើម្បីយកទៅសាកសួរពីបទ.ផុសរូបភាព និងសម្ភារ:អាសអាភាស យោងតាមមាត្រា ៣៨.៣៩ ច្បាប់ប្រឆាំងការជួញដូរមនុស្ស និងការពារអនីតិជន ដែលបទល្មើសនេះ តម្រូវឲ្យជនជាប់ចោទមានទោសចាប់ពី១ខែទៅ១ឆ្នាំ ។
លោកអធិការបន្តថា ទង្វើដែលឈ្មោះ ម៉ន អ៊ីវ៉ា បានធ្វើនេះពិតជាធ្វើឲ្យប៉ះពាល់ដល់ទំនៀមទម្លាប់ប្រពៃណី ជាពិសេសប៉ះពាល់យ៉ាងធ្ងន់ធ្ងរដល់កិត្តិយស និងតម្លៃរបស់ស្ត្រីខ្មែរថែមទៀតផង។
ហើយសំណុំរឿងនេះ តំណាងអយ្យការបានធ្វើការចោទប្រកាន់ជាផ្លូវហើយ ហើយក៏បានចាត់បញ្ជូនទៅចៅក្រមស៊ើបសួរ ដើម្បីសម្រេចធ្វើការឃុំខ្លួនជនសង្ស័យដាក់ពន្ធនាគារជាបណ្តោះអាសន្ន ៕ (កែសម្រួលដោយ ៖ បុប្ផា)
ចែករំលែកព័តមាននេះ