រាជធានីភ្នំពេញ៖ បើទោះបីជាកម្ពុជាបានបណ្ដុះបណ្ដាលធនធានមនុស្សក្នុងវិស័យជាងសំណង់ជាច្រើនមកក្ដី ក៏កម្ពុជានៅតែខ្វះខាតជាងជំនាញក្នុងវិស័យសំណង់នេះ សម្រាប់បម្រើនៅតាមការដ្ឋានសំណង់នានាក្នុងប្រទេសកម្ពុជាដដែល ដោយសារតែវិស័យនេះ មានការរីកលូតលាស់កាន់តែខ្លាំងនិងមានការវិនិយោគគម្រោងថ្មីៗបន្តបន្ទាប់ ទើបនៅតែមានតម្រូវការខ្ពស់បែបនេះ ។
យោងតាមលោកប៊ុន ភារិន្ទ នាយកវិទ្យាស្ថានពហុបច្ចេកទេសកម្ពុជា ហៅកាត់ថា (NPIC) បានអោយដឹងថា បើនិយាយពីតម្រូវការជាងជំនាញក្នុងវិស័យសំណង់នាពេលបច្ចុប្បន្ននេះ គឺកំពុងខ្វះខាតខ្លាំងណាស់ និងត្រូវទាមទារអោយមានការបណ្ដុះបណ្ដាលបន្ថែមទៀត សម្រាប់បំពេញទៅតាមតម្រូវការ ។ តម្រូវការកើនឡើងបែបនេះដោយសារតែ គម្រោងសាងសង់សំណង់ត្រូវបានកើនឡើងជាបន្តបន្ទាប់ដូចគ្នា ក៏ប៉ុន្តែសម្រាប់សិស្សនិស្សិតដែលរៀនបន្តមិនសូវចាប់អារម្មណ៍លើជំនាញផ្នែកនេះ ដោយពួកគេគិតថា ជំនាញនេះ ត្រូវការធ្វើការនៅហាលក្ដៅ មិនមែនធ្វើការនៅម្លប់ ។ លោកបានបន្តថា «បើទោះបីជាសាលាបានបណ្ដុះបណ្ដាលជាច្រើនវគ្គមកហើយ ពាក់ព័ន្ធនឹងជាងជំនាញក្នុងវិស័យនេះក្ដី ក៏មិនទាន់អាចផ្គត់ផ្គង់គ្រប់គ្រាន់ទៅតាមកំណើននៃការសាងសង់សំណង់នៅឡើយ » ។
លោកបាននិយាយបន្ថែមទៀតថា បច្ចុប្បន្ននេះការបណ្ដុះបណ្ដាលទៅលើអ្នកជំនាញក៏ដូចជាធនធានក្នុងវិស័យសំណង់ ជាពិសេសទៅលើជាងសំណង់គឺត្រូវបានធ្វើឡើងជាវគ្គខ្លីៗ ដោយសហការជាមួយក្រុមហ៊ុនសំណង់ធំៗ ក្នុងប្រទេសកម្ពុជាប៉ុណ្ណោះ តែក៏មានអ្នកចូលរួមសិក្សាច្រើននិងបានកើនឡើងពីមួយវគ្គទៅមួយវគ្គ។
លោកប៊ុន ភារិន្ទ បានបញ្ជាក់បន្ថែមថា « ក្នុងពេលសិក្សាចប់ម្ដងៗ សិក្ខាកាមតែងតែទទួលបាននូវអត្ថប្រយោជន៍ខ្ពស់ពីជំនាញនេះ ព្រោះពួកគេត្រូវបានទទួលស្គាល់ពីស្ថាប័នអប់រំរបស់ជាតិ ក្រោមចំណុះរបស់ក្រសួងការងារនិងបណ្ដុះបណ្ដាលវិជ្ជាជីវៈដូច្នេះពួកគេអាចរកប្រាក់ចំណូលបានខ្ពស់ជាងមុន និងអាចជួយកសាងសេដ្ឋកិច្ចបានមួយកម្រិតផងដែរ » ។ លោកបានបន្តទៀតថា នៅពេលដែលកម្ពុជា មានអ្នកជំនាញនិងមេជាងសំណង់ដែលទទួលបានការបណ្ដុះបណ្ដាលត្រឹមត្រូវ នោះកម្ពុជានឹងលែងជួបហេតុការណ៍បាក់រលំអគារដូចនៅខេត្តព្រះសីហនុ និងខេត្តកែបទៀតហើយ ។
បើតាមលោក Nicolas George នាយកប្រតិបត្តិ ក្រុមហ៊ុន ជីបម៉ុង អ៊ិនស៊ី ផលិត
ស៊ីម៉ងត៍ អូដ្ឋនៅកម្ពុជា ដែលជាក្រុមហ៊ុនសហការជាមួយវិទ្យាស្ថានពហុបច្ចេកទេសកម្ពុជា ក្នុងការបណ្ដុះបណ្ដាលជាងជំនាញក្នុងវិស័យសំណង់បានអោយដឹងថា វិស័យសំណង់ក្នុងប្រទេសកម្ពុជា មានការរីកលូតលាស់គួរអោយកត់សម្គាល់ តែសម្រាប់ធនធាមនុស្សក្នុងវិស័យនេះ ហាក់នៅមានកម្រិតនៅឡើយ និងត្រូវការជាងជំនាញៗបន្ថែមទៀត ដើម្បីអោយការអភិវឌ្ឍវិស័យនេះ កាន់តែរីកលូតលាស់ ។
យោងតាមរបាយការណ៍របស់ក្រសួងរៀបចំដែនដីនគរូបនីយកម្មនិងសំណង់បានអោយដឹងផងដែរថា ក្នុងរយៈពេល១ឆ្នាំពេញ ឆ្នាំ ២០១៩កន្លងទៅនេះ កម្ពុជាទទួលបានទុនវិនិយោគក្នុងវិស័យនេះ ជាង៩,៣ពាន់លានដុល្លារអាមេរិក ។ តាមរយៈកំណើននៃវិស័យនេះដែរបានជួយផ្ដល់ការងារដល់ប្រជាពលរដ្ឋកម្ពុជាប្រមាណពី១៨ម៉ឺនទៅ២២ម៉ឺននាក់/ថ្ងៃ ដែលធ្វើអោយពួកគេអាចរកចំណូលបានពីវិស័យសំណង់ដើម្បីផ្គត់ផ្គង់ជីវភាពអោយកាន់តែប្រសើរឡើងផងដែរ។ យ៉ាងណាមិញសម្រាប់វិស័យសំណង់គឺនៅខ្វះខាតធនធានមនុស្សជាខ្លាំងជាពិសេសគឺនារីភេទ ។
លោក មួង ផាស៊ី នាយករងសិក្សានៃវិទ្យាស្ថានជាតិពហុបច្ចេកទេសកម្ពុជា បានអោយដឹងថា ជំនាញមេជាងសំណង់នេះ មិនមាននារីរៀននោះទេ តាមបទពិសោធន៍ដែលបានបណ្ដុះបណ្ដាលប៉ុន្មានវគ្គកន្លងមក ក៏ប៉ុន្តែជំនាញបច្ចេកទេសផ្សេងៗទៀត ក្នុងសាលាគឺមាននារីកំពុងសិក្សាប្រមាណ ១២,៥ភាគរយប៉ុណ្ណោះ ដូចជាជំនាញវិស្វករអគ្គិសនី វិស្វករ សំណង់អេឡិត្រូនិក និងព័ត៌មានវិទ្យាជាដើម ។ លោកបានបន្តថា «សម្រាប់នារីដែលបញ្ចប់ការសិក្សានៅសាលា គឺងាយស្រួលក្នុងការស្វែងរកការងារ ជាងបុរស ដោយសារតែស្ថាប័នខាងក្រៅជាច្រើនគេលើកកម្ពស់លើនារី និងផ្ដល់អាទិភាពអោយនារីជាងបុរស ដូច្នេះហើយទើបនារីងាយស្រួលរកការងារធ្វើ» ៕កែសម្រួលដោយ ៖ សុឃាក់
ចែករំលែកព័តមាននេះ