ទីក្រុងគូឡាឡាំពួរ ៖ នៅលើបណ្ដាញសង្គមរបស់នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានប្រកាសនៅយប់ថ្ងៃទី១៣ ខែវិច្ឆិកា ឆ្នាំ២០២៥នេះថា ៖…
ទីក្រុងគូឡាឡាំពួរ ៖ នៅលើបណ្ដាញសង្គមរបស់នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានប្រកាសនៅយប់ថ្ងៃទី១៣ ខែវិច្ឆិកា ឆ្នាំ២០២៥នេះថា ៖ «លោកបានសន្ទនាជាមួយសម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក អនុទីន ឆានវីរៈគុល នាយករដ្ឋមន្ត្រីថៃ តាមទូរសព្ទ ដើម្បីពិភាក្សាអំពីការវិវឌ្ឍ នៃកិច្ចខិតខំប្រឹងប្រែងសន្តិភាព បន្ទាប់ពីឧប្បត្តិហេតុថ្មីៗ នៅតាមព្រំដែន នៃប្រទេសទាំងពីរ» ។
លោក អាន់វ៉ា អ៊ីប្រាហ៊ីម បានបន្តថា មេដឹកនាំទាំងពីរ បានឆ្លើយតបជាវិជ្ជមាន និងបានបញ្ជាក់ជាថ្មី នូវការប្តេជ្ញាចិត្តរបស់ពួកគេ ក្នុងការស្វែងរកដំណោះស្រាយដោយសន្តិវិធី ដោយស្របតាមកិច្ចព្រមព្រៀងសន្តិភាពទីក្រុងគូឡាឡាំពួរ ។
នាយករដ្ឋមន្ត្រីម៉ាឡេស៊ី ឲ្យដឹងទៀតថា ៖ «ខ្ញុំបញ្ជាក់ជាថ្មី នូវជំហររបស់ប្រទេសម៉ាឡេស៊ី ដើម្បីអោយឃើញពីមិត្តភាព និងបទឈប់បាញ់រវាងប្រទេសទាំងពីរ ត្រូវបានពង្រឹងស្របតាមកិច្ចព្រមព្រៀង ដែលបានចុះហត្ថលេខា នៅទីក្រុងគូឡាឡាំពួរ កាលពីចុងខែមុន។ ខ្ញុំក៏បង្ហាញពីការត្រៀមខ្លួនរបស់ប្រទេសម៉ាឡេស៊ី ដើម្បីបន្តដើរតួនាទីជាអ្នកសម្របសម្រួលក្នុងការត្រួសត្រាយផ្លូវសន្តិភាពនេះ» ។
លោក អាន់វ៉ា អ៊ីប្រាហ៊ីម បន្ថែមថា នាយករដ្ឋមន្ត្រីទាំង២ ក៏បានសម្តែងការកោតសរសើរចំពោះជំហរ និងតួនាទីរបស់ប្រទេសម៉ាឡេស៊ី មិនត្រឹមតែជាប្រធានអាស៊ានប៉ុណ្ណោះទេ ប៉ុន្តែក៏ជាមិត្ត និងជាអ្នកជិតខាង នៃតំបន់ ដែលប្រាថ្នាចង់បានសន្តិភាពផងដែរ ។
លោក អាន់វ៉ា អ៊ីប្រាហ៊ីម សូមឱ្យប្រទេសទាំង២ បន្តបង្ហាញការតាំងចិត្ត និងភាពក្លាហាន ដើម្បីស្តារស្ថិរភាពព្រំដែនឡើងវិញ ដើម្បីជាប្រយោជន៍ដល់សន្តិភាពយូរអង្វែងនៅក្នុងតំបន់ និងដើម្បីសុវត្ថិភាពរបស់ប្រជាជន នៃប្រទេសទាំងពីរ ៕
ចែករំលែកព័តមាននេះ