រាជធានីភ្នំពេញ ៖ សត្វឥន្ទ្រីមួយក្បាលបានហើរចេញពីទ្រនំ(ទ្រុង)ក្នុងអធិការដ្ឋានខណ្ឌសែនសុខ ទៅទុំលើដំបូល ធ្វើអោយលោកអធិការមានការអាលោះអាល័យនិងនឹកស្តាយជាទីបំផុត ហើយបានឱ្យកូនចៅតាមរកនិងចាប់ដែរ តែមិនទាន់ចាប់បាននៅឡើយទេ ។ ឥន្ទ្រីមួយក្បាលខាងលើនោះជាឥន្ទ្រីឈ្មោលក្នុងចំណោមឥន្ទ្រីញីឈ្មោលចំនួន២ក្បាល ដែលលោកវរសេនីយ៍ឯក…
រាជធានីភ្នំពេញ ៖ សត្វឥន្ទ្រីមួយក្បាលបានហើរចេញពីទ្រនំ(ទ្រុង)ក្នុងអធិការដ្ឋានខណ្ឌសែនសុខ ទៅទុំលើដំបូល ធ្វើអោយលោកអធិការមានការអាលោះអាល័យនិងនឹកស្តាយជាទីបំផុត ហើយបានឱ្យកូនចៅតាមរកនិងចាប់ដែរ តែមិនទាន់ចាប់បាននៅឡើយទេ ។
ឥន្ទ្រីមួយក្បាលខាងលើនោះជាឥន្ទ្រីឈ្មោលក្នុងចំណោមឥន្ទ្រីញីឈ្មោលចំនួន២ក្បាល ដែលលោកវរសេនីយ៍ឯក ហួរ ម៉េងវ៉ាង អធិការខណ្ឌសែនសុខបានចិញ្ចឹមតាំងពីតូចអស់រយៈពេលជាច្រើនខែមកហើយ។
តាមប្រភពព័ត៌មានបានអោយដឹងថា ឥន្ទ្រីមួយក្បាលខាងលើនោះបានហើរចេញទៅបាត់ បន្ទាប់ពីលោកហួរ ម៉េងវ៉ាង អធិការខណ្ឌសែនសុខ បានលែងចេញពីទ្រុងឱ្យដើរនិងហើរលេងជិតៗនៅក្នុងអធិការដ្ឋាន កាលពីវេលាល្ងាចថ្ងៃទី១០ ខែកុម្ភៈ ឆ្នាំ២០២០។ បន្ទាប់ពីឥន្ទ្រីឈ្មោលមួយក្បាលបានហើរទៅបាត់ ធ្វើអោយលោកអធិការមានការស្តាយស្រណោះ និងអាលោះអាល័យចំពោះសត្វដ៏កម្រ និងជាទីស្រលាញ់នេះ ហើយលោកក៏បានអោយមន្ត្រីនគរបាលនាំគ្នាតាមរកស្ទើរតែមួយយប់ទៅហើយ ។
តាមប្រភពព័ត៌មានដដែលបានបន្តថា ដោយសារតែសត្វឥន្ទ្រីមួយក្បាលខាងលើនោះស៊ាំធ្លាប់អោយចំណីស៊ីលុះនៅព្រឹកថ្ងៃទី១១ ខែកុម្ភៈនេះ គេឃើញសត្វឥន្ទ្រីមួយក្បាលនោះបានហើរមកទុំលើដំបូលមូលដ្ឋានកងរាជអាវុធហត្ថខណ្ឌសែនសុខ ក្រោយមកក៏បានហើរមកទុំលើដំបូលអធិការដ្ឋានវិញ ។ ខណៈនោះគេឃើញ លោកវរសេនីយ៍ឯកហួរ ម៉េងវ៉ាង អធិការខណ្ឌសែនសុខ បានឈរមើលទាំងនឹកស្តាយស្រណោះ។
ដោយឡែកចំពោះមន្ត្រីនគរបាលមួយចំនួនក៏បានប្រើវិធីផ្សេងៗដើម្បីអោយសត្វឥន្ត្រីនោះចុះមកស៊ីចំណីដើម្បីចាប់វិញ តែហាក់ដូចជាគ្មានសង្ឃឹម ព្រោះឥន្ទ្រីនេះជាសត្វសមុទ្រហើយធំធាត់ដុះស្លាបអាចហើរបានហើយ។
តាមប្រភពពីលោកវរសេនីយ៍ឯកហួរ ម៉េងវ៉ាង អធិការខណ្ឌសែនសុខ បានអោយដឹងថា សត្វឥន្ទ្រីនោះជាឥន្ទ្រីសមុទ្រដែលចាប់ត្រីស៊ីជាអាហារ ហើយត្រូវបានបងប្អូនឱ្យយកមកចិញ្ចឹមអស់រយៈពេលប្រមាណជាង១ខែមកហើយតាំងពីតូចៗមកម្ល៉េះ ។ ទោះបីជាយ៉ាងណា មន្ត្រីនគរបាលខ្លះចិញ្ចឹមប្រមាណ២ទៅ៣ខែមកហើយ។
លោកអធិការបានអោយដឹងទៀតថា សត្វឥន្ទ្រីមួយក្បាលខាងលើនោះបានហើរចេញ ខណៈពេលដែលលោកលែងចេញពីទ្រុងអោយហើរលេងក្នុងអធិការដ្ឋាន។
តាមប្រភពព័ត៌មានអោយដឹងថា សត្វឥន្ទ្រីដ៏កម្រនោះក្នុងមួយក្បាលមានតម្លៃប្រមាណ៥០០ដុល្លារ។ បន្ទាប់ពីចិញ្ចឹមអោយស៊ីសុទ្ធតែគោធំធាត់ដុំស្លាបរឹងជើង ក៏បានហើរចេញពីទ្រនំ តែឥន្ទ្រីនោះនៅអាល័យម្ចាស់និងឥន្ត្រីញីមួយក្បាលក៏បានហើរឆ្វែលចុះឡើងៗ ។ ទោះបីជាយ៉ាងណា លោកអធិការខណ្ឌសែនសុខមានសុទិដ្ឋិនិយមថា សត្វឥន្ទ្រីមួយក្បាលនោះនឹងហើរចុះមក ហើយចាប់បានវិញនៅពេលណាមួយជាក់ជាមិនខាន ៕ (កែសម្រួលដោយ ៖ ធីតា)
ចែករំលែកព័តមាននេះ