វាពិតជាងាយស្រួលណាស់ក្នុងការគិតពីការលាឈប់ពីការងារពេលដែលអ្នកជួបប្រទះនឹងបញ្ហាធំក្នុងការងារក្នុងកំឡុងពេលណាមួយ ប៉ុន្តែវាមិនងាយដូចការគិតទេក្នុងការធ្វើឲ្យវាក្លាយជាការពិតនោះ ។ លើសពីនេះទៅទៀត សូម្បីតែមនុស្សដែលស្រលាញ់ការងារខ្លួនក៏ធ្លាប់គិតពីការលាឈប់ពីការងារដែរពេលដែលចាប់ផ្តើមមានអារម្មណ៍ស្ត្រេស ។
ជាក់ស្តែងការសម្រេចចិត្តក្នុងការលាឈប់ក្នុងកំឡុងពេលមួយគ្រានេះអាចជាការសម្រេចចិត្តដែលខុសឆ្គងមួយ ។ ដូច្នេះមុនពេលអ្នកធ្លាក់ក្នុងអន្ទាក់នេះ ចូរបង្វែចំណាប់អារម្មណ៍របស់អ្នកមកធ្វើសកម្មភាពខាងក្រោមនេះជាមុនសិន៖
១. ស្គាល់មនុស្សដែលនៅក្រៅស្ថាប័នការងាររបស់អ្នក ៖
ពេលដែលជីវិតរបស់អ្នកពោរពេញទៅដោយការងារជារៀងរាល់ថ្ងៃពីម៉ោង ៩ព្រឹក ដល់ ៥ល្ងាច អ្នកប្រហែលជាគិតថាអ្នកមិនមានពេលក្នុងការដើរស្គាល់អ្នកដទៃទេ ។ ប៉ុន្តែវាអាចជាឱកាសមួយដែលជួយឲ្យអ្នកស្គាល់មនុស្សដែលមិនធ្វើការក្នុងវិស័យរបស់អ្នក ។ ការបង្កើតទំនាក់ទំនងជាមួយមនុស្សដែលនៅក្រៅស្ថាប័នរបស់អ្នកជាយុទ្ធសាស្ត្រដ៏ល្អក្នុងការជួយឲ្យអ្នកដើរទៅមុខក្នុងការងារ ឬអាជីវកម្មផងដែរ ។
២. រកកិច្ចការដែលអ្នកចូលចិត្តធ្វើពេលដែលទំនេរ៖
មិនថាជាការលេងកីឡា ចំណាយពេលវេលាជាមួយមនុស្សជាទីស្រលាញ់ ឬមើលថែសត្វចិញ្ចឹមទេ សកម្មភាពទាំងនេះនឹងជួយឲ្យអ្នកកាត់បន្ថយអារម្មណ៍ស្ត្រេសដែលប៉ះពាល់ដល់ការសម្រេចចិត្តរបស់អ្នកបាន ។ ប្រសិនបើអ្នកចូលចិត្តចំណាយពេលជាមួយមិត្តភក្តិ អ្នកអាចសាកល្បងនិយាយប្រាប់ពួកគេពីគោលដៅរបស់អ្នកបានព្រោះធ្វើដូច្នេះជួយជំរុញទឹកចិត្តឲ្យអ្នកកាន់តែចង់សម្រេចគោលដៅទាំងនោះ ។
៣. រកប្រភពចំណូលថ្មី ៖
តើអ្នកមានជំនាញណាមួយដែលអាចជួយឲ្យអ្នករកចំណូលបានទេ0x017d7 ពេលដែលអ្នកមានអារម្មណ៍ថាមិនពេញចិត្តនឹងការងារពេញម៉ោងរបស់អ្នក អ្នកអាចចំណាយពេលដែលទំនេរលើការងារ ឬអាជីវកម្មដែលអ្នកចូលចិត្តនិងអាចរកចំណូលឲ្យអ្នកបន្ថែមបានទៀត ។ លើសពីនេះ សកម្មភាពនេះជួយរំលឹកដល់អ្នកថាអ្នកមានជម្រើសច្រើនក្នុងការរកចំណូល ហើយអ្នកមិនទាន់ទាល់ច្រកដូចអ្នកកំពុងតែគិតទេ ៕ កែសម្រួលដោយ ៖ សុឃាក់
ចែករំលែកព័តមាននេះ