បន្ទាប់ពីការបាញ់ប្រហារដ៏រន្ធត់មួយ ដែលបណ្តាលឱ្យមនុស្ស៣០នាក់បានស្លាប់ រួមទាំងខ្មាន់កាំភ្លើង និង ៥៧នាក់ផ្សេងទៀតរងរបួស នាយករដ្ឋមន្ត្រីថៃ លោក ប្រាយុទ្ធ ចាន់អូចា កាលពីថ្ងៃអាទិត្យ…
បន្ទាប់ពីការបាញ់ប្រហារដ៏រន្ធត់មួយ ដែលបណ្តាលឱ្យមនុស្ស៣០នាក់បានស្លាប់ រួមទាំងខ្មាន់កាំភ្លើង និង ៥៧នាក់ផ្សេងទៀតរងរបួស នាយករដ្ឋមន្ត្រីថៃ លោក ប្រាយុទ្ធ ចាន់អូចា កាលពីថ្ងៃអាទិត្យ បានបញ្ជាឱ្យពិនិត្យឡើងវិញនូវវិធានការសន្តិសុខ នៅឯមូលដ្ឋានទ័ពរបស់យោធា ។
នេះបើតាមការចុះផ្សាយពី Bangkok Post បានឱ្យដឹងថា លោក ប្រាយុទ្ធ បានថ្លែង នៅក្រោយការធ្វើសន្និសិទសារព័ត៌មាន អំពីការបាញ់ប្រហារកាលពីចុងសប្តាហ៍ថា «អ្វីដែលខ្ញុំអាចនិយាយបាន គឺប្រសិនបើយើងបានអនុវត្តតាមនីតិវិធីសន្តិសុខស្តង់ដារ នោះយើងនឹងអាចកាត់បន្ថយកំរិតនៃអំពើហឹង្សាក្នុងឧប្បត្តិហេតុនេះ»។
លោកបានបន្តទៀតថា «ទោះបីយើងទទូចថា យើងបានអនុវត្តតាមនីតិវិធីសន្តិសុខត្រឹមត្រូវក៏ដោយ សំណួរនៅតែចោទសួរថា តើយើងអាចធ្វើអ្វីទៀតដើម្បីពង្រឹងប្រសិទ្ធភាពនៃវិធានការសន្តិសុខ?»។ លោកបានលើកជាឧទាហរណ៍មួយដោយបាននិយាយថា «អាវុធទាំងនោះត្រូវបានខ្មាន់កាំភ្លើងយកបាន បន្ទាប់ពីគេបានបាញ់សំលាប់មន្ត្រីយាមឃ្លាំងអាវុធ ដែលនោះជាមូលហេតុនៃការព្រួយបារម្ភ»។
សូមរំលឹកជូនថា ការបាញ់ប្រហារបានផ្ទុះឡើងនៅច្រកចូលនៃមជ្ឈមណ្ឌលពាណិជ្ជកម្ម Terminal 21 ក្នុងខេត្តណាខនរ៉ាត ចាស៊ីម៉ា ដោយខ្មាន់កាំភ្លើងមានឈ្មោះ Jakraphanth Thomma ហើយជននេះត្រូវបានបាញ់សម្លាប់ ដោយកងកុំម៉្មង់ដូពិសេសនៅកន្លែងកើតហេតុផ្ទាល់តែម្តង ។
ចែករំលែកព័តមាននេះ