​លោក កឹ​ម សុខា ទាមទារ​លុប​ចោល​ឃ្លី​ប​វី​ដេ​អូ​បាន​មក​ពី​ប្រភព​អនាមិក


រាជធានី​ភ្នំពេញ ៖ លោក កឹ​ម សុខា អតីត​ប្រធាន​គណបក្ស​សង្គ្រោះ​ជាតិ បាន​បង្ហាញ​ក្តី​សង្ឃឹមថា តុលាការ​នឹង​ផ្តល់​យុត្តិធម៌​ចំពោះ​រូប​លោក​លើ​សំណុំរឿង​ដែល​កំពុង​ដំណើរការ​នេះ ។ មុន​ចូល​សវនាការ​ជំនុំ​ជម្រះក្ដី​ក្នុង​ស​ប្តា​ហ៍​ទី​៤ នា​ព្រឹក​ថ្ងៃ​ទី​៦ ខែកុម្ភៈ ឆ្នាំ​២០២០ លោក កឹ​ម សុខា បាន​ផ្តល់​សម្ភាសន៍​នៅ​មុខ​ផ្ទះ​របស់​លោក ដោយ​បង្ហាញ​ការ​ជឿជាក់​ថា តុលាការ​នឹង​ផ្ដល់​យុត្តិធម៌​ឲ្យ​លោក​ទៅ​តាម​នីតិវិធី​ច្បាប់ ទោះបី​មាន​អ្នកខ្លះ​រិះគន់​តុលាការ​នៅ​ស្រុក​ខ្មែរ​ថា​គ្មាន​ប្រសិទ្ធភាព​យ៉ាងណា​ក៏​ដោយ ។

ក្នុង​កិច្ច​សម្ភាសន៍​រយៈពេល​ប៉ុន្មាន​នាទី ទោះបី​លោក កឹ​ម សុខា លើក​ឡើង​មិន​ចំ​ឈ្មោះ​បុគ្គល​មួយ​ណា​ថា តុលាការ​ស្រុក​ខ្មែរ​គ្មាន​ប្រសិទ្ធភាព​ក៏​ពិតមែន តែ​ក្នុង​ន័យ​នេះ​គឺ​លោក​សំដៅ​ទៅ​លើ លោក សម រ​ង្ស៊ី ពីព្រោះ​លោក សម រ​ង្ស៊ី តែងតែ​រិះគន់​តុលាការ​ស្រុក​ខ្មែរ​ថា ជា​អា​យ៉ង​របស់​គណបក្ស​ប្រជាជន​កម្ពុជា ក៏​ដូច​ជាស​ម្តេច​តេ​ជោ ហ៊ុន សែន ។

លោក កឹ​ម សុខា បាន​ផ្ដល់​កិច្ច​សម្ភាសន៍​ជាមួយ​ក្រុម​អ្នក​សារព័ត៌មាន មុន​ទៅ​កាន់​តុលាការ​ថា ចំពោះ​រឿង​ក្ដី​របស់​លោក​ជាមួយ​តុលាការ​នា​ពេល​កន្លង​មកនេះ មិន​មាន​ភ័ស្ដុតាង មាន​ត្រឹមតែ​ពាក្យ​សម្ដី ហើយ​កាលពី​ថ្ងៃ​ទី​៥ ខែកុម្ភៈ ក្នុង​ពេល​ជំនុំជម្រះ​រឿង​ក្ដី ព្រះរាជអាជ្ញា​លើក​ឡើង​ថា «​សម្តី​ហ្នឹងហើយ​យក​មក​ចាប់​» ។ សម្តី​របស់​លោក​ដែល​មានការ​ចោទប្រកាន់​ពី​ទោស​ក្បត់ជាតិ ។

លោក កឹ​ម សុខា ដែល​អះអាង​ថា​លោក​ប្រកាន់​យក​អហិង្សា បាន​បញ្ជាក់​ថា «​ខ្ញុំ​ជឿជាក់​ថា តុលាការ​នឹង​ផ្ដល់​យុត្តិធម៌​ឲ្យ​ខ្ញុំ ទោះបី​បច្ចុប្បន្ន​នេះ​មាន​អ្នកខ្លះ​រិះគន់​ខ្ញុំ​ថា​ម៉េច​ក៏​ដោយ បើ​ខ្ញុំ​ទៅ​តុលាការ​ធ្វើ​អី បើ​ដឹង​ថា​តុលាការ​អុ​ី​ចឹ​ង​ហើយ ។ ខ្ញុំ​រស់នៅ​ក្រោម​ដំបូល​ព្រះរាជាណាចក្រ​កម្ពុជា ខ្ញុំ​ត្រូវ​ទៅ​បង្ហាញ​ការ​ពិត​នៅ​ទីនោះ​(​នៅ​តុលាការ​) អាហ្នឹង​វា​ត្រូវ​តែ​ទៅ បើ​គេ​សម្រេច​យ៉ាងម៉េច? ជា​រឿង​របស់​ពួក​គេ​» ។

លោក​បន្ដ​ថា នា​ពេល​កន្លង​មក​លោក​មិន​បាន​ធ្វើ​អ្វី​ខុស​ឡើយ ហើយ​ធ្វើ​អ្វី​ទៅ​តាម​ច្បាប់ កម្ពុជា​ទៀត ដូច​ជា​បោះ​ឆ្នោត ដើរ​តាម​លទ្ធិ​ប្រជា​ធិ​តេ​យ្យ ការ​ផ្លាស់​ប្ដូរ​ដោយ​អហិង្សា មិន​បង្ហូរឈាម​ជាដើម ។ លោក​សង្ឃឹម​ទៀត​ថា តុលាការ​នឹង​យក​ភ័ស្ដុតាង​ទាំងនេះ​ដើម្បី​ផ្ដល់​យុត្តិធម៌​ឲ្យ​លោក ។

ជាមួយ​គ្នា​នេះ លោក​ថា​តុលាការ​នឹង​មិន​ធ្វើ​អ្វី​ដូច​គេ​ចោទ​ថា ធ្វើ​តាម​បញ្ជា​របស់​គណបក្ស​មាន​ឥទ្ធិពល និង​អ្នកមាន​អំណាច​ឡើយ ។ការ​លើក​ឡើង​នេះ គឺ​ក្រោយ​ពី​មាន​អ្នក​រិះគន់​ថា លោក កឹ​ម សុខា ត្រូវរ៉ូវ​ជាមួយ​គណបក្សកាន់​អំណាច និង​បែកបាក់​ជាមួយ​លោក សម រ​ង្ស៊ី ដើម្បី​លើកលែងទោស ។ លោក កឹ​ម សុខា បាន​ឆ្លើយ​យ៉ាង​ខ្លី​ថា អាហ្នឹង​ជា​ការ​យល់​របស់​មនុស្ស​ម្នាក់​ៗ ខ្ញុំ​មិន​អាច​ហាមឃាត់​គេ​ទេ អ្នក​ណា​គេ​យល់​ម៉េច​យល់​ទៅ? គេ​គិត​ម៉េច​គេ​គិត​ទៅ?។

លោក​បញ្ជាក់​ថា ខ្លួន​ខ្ញុំ​នៅ​តែ​ប្រកាន់​គោលការណ៍​អហិង្សា អត់​យក​ខ្មែរ​ណា​ជាស​ត្រូវធ្វើ​ដំណើរ​ទៅ​បោះ​ឆ្នោត អត់​ទៅ​ធ្វើ​បដិវត្តន៍​ពណ៌ អត់​ទៅ​បង្ហូរឈាម​ខ្មែរ ហើយ​អ្នក​ណា​ទៅ​បង្ហូរ ឈាម​ខ្មែរ ធ្វើ​បដិវត្តន៍​ពណ៌ អំពើ​ហិង្សា ជា​រឿង​របស់​ពួក​គេ លោក​មិន​ទៅ​ជាមួយ​ឡើយ ។ សូម​ជម្រាប​ថា តុលាការ​ដំណើរការ​លើ​សំណុំរឿង​លោក កឹ​ម សុខា អស់​រយៈពេល​៤ ស​ប្តា​ហ៍​មក​ហើយ ។ ករណី​នេះ​ធ្លាប់​ត្រូវ​បានប្រធាន​សាលា​ដំបូង​រាជធានី​អះអាង​ថា​ដំណើរការ​រឿង​ក្តី​នេះ​អាច​អូស​បន្លាយ​រយៈពេល​៣​ខែ ។

គួរ​រំឭក​ថា លោក កឹ​ម សុខា ត្រូវ​បាន​សមត្ថកិច្ច​ចាប់ខ្លួន​កាលពី​វេ​រំលង​អធ្រាត្រ​ឈាន​ចូល​ថ្ងៃទី​៣ ខែកញ្ញា ឆ្នាំ​២០១៧ ពី​បទ​ស​ន្ទិ​ដ្ឋិ​ភាពជាមួយ​បរទេស ប្រព្រឹត្ត​នៅ​ប្រទេស​កម្ពុជា និង​ទីកន្លែង​ផ្សេង​ទៀត កាលពី​អំឡុង​ឆ្នាំ​១៩៩៣ រហូត​ដល់​ថ្ងៃ​ទី​៣ ខែកញ្ញា ឆ្នាំ​២០១៧ ជា​បទល្មើស​ព្រហ្មទណ្ឌ និង​ផ្តន្ទាទោស​តាម​បញ្ញត្តិ​មាត្រា​៤៤៣​នៃ​ក្រមព្រហ្មទណ្ឌ ។

ក្រោយ​ពី​ជាប់​ឃុំ​អស់​រយៈពេល​ជាង​១​ឆ្នាំ​នៅពន្ធនាគារ​ត្រពាំង​ផ្លុ​ង ខេត្ត​ត្បូងឃ្មុំ​នោះ នៅ​ថ្ងៃទី​១០ ខែវិច្ឆិកា ឆ្នាំ​២០១៩ សាលាដំបូង​រាជ​ធានី​ភ្នំពេញ សម្រេច​ឲ្យ​លោក កឹ​ម សុខា នៅ​គេហដ្ឋាន​របស់​លោក​វិញ ប៉ុន្តែ​មិន​ឲ្យ​ធ្វើ​សកម្មភាព​ទាក់ទង​នឹង​នយោបាយ ។នៅ​ក្នុង​សវនាការ មេធាវី​ការពារ​សិទ្ធិ​លោក កឹ​ម សុខា បាន​បាន​ទាមទារ​ឲ្យ​តុលាការ​បដិសេធ​កុំ​ទទួលយក​ភ័ស្តុតាង​ដែល​បាន​ដកស្រង់​ពី​ហ្វេ​សប៊ុ​ក​អនាមិក​មួយ ដាក់បន្ទុក​ចោទប្រកាន់​មក​លើ​ជនជាប់ចោទ ។

លោក ចាន់ ចេ​ន មេធាវី​ការពារ​សិទ្ធិ​ឲ្យ​លោក កឹ​ម សុខា បាន​បដិសេធ​និង​ស្នើ​សុំ​ដល់​ក្រុមប្រឹក្សា​ជំនុំជម្រះ ច្រានចោល​ខ្សែ​វី​ដេ​អូ ដែល​បាន​ផ្សាយ​ដោយ​ហ្វេ​ស​ប៊ុ​ក​ឈ្មោះ​«​កូន​ខ្មែរ​» ដែលជា​ប្រភព​អនាមិក​យក​មក​ដាក់បន្ទុក​លើ​លោក កឹ​ម សុខា ។ ក្នុង​នាម​ក្រុម​មេធាវី​ការពារ​សិទ្ធិ​ជនជាប់ចោទ មិន​អាច​ទទួល​បាន​ទេ ។
លោក​មេធាវី ចាន់ ចេ​ន និយាយ​ក្នុង​សវ​នាការ​នា​ព្រឹក​ថ្ងៃ​ទី​៦ ខែកុម្ភៈ​ថា តាម​ខ្សែ​វី​ដេ​អូ​ដែលបាន​បញ្ចាំង​នោះ គឺ​បាន​យកសម្តី​លោក កឹ​មសុខា ដែល​និយាយ​នៅ​អូស្ត្រាលី​ក្នុង​កំឡុង​ឆ្នាំ​២០១៣ ។

ចំណែក​មេធាវី​តំណាង​រាជរដ្ឋាភិបាល លោក គី តិច មិន​បាន​ផ្តល់​ព័ត៌មាន​ដល់​អ្នក​សារព័ត៌មាន​ទេ ។ លោក​បាន​បញ្ជាក់​ថា ចាំ​ស​ប្តា​ហ៍​ក្រោយ​ទើប​មេធាវី​តំណាង​រាជរដ្ឋាភិបាល​ផ្តល់​ព័ត៌មាន​ជូន​អ្នក​សារព័ត៌មាន ។
គួរ​បញ្ជាក់​ថា ចូល​ដល់​ស​ប្តា​ហ៍​ទី​៤ ថ្ងៃ​ទី​៦ ខែកុម្ភ​នេះ លោក កឹ​ម សុខា នៅ​តែ​បន្ត​ចូល​មក​កាន់​បន្ទប់​សវ​នាការ​ជំនុំជម្រះ​ទោស​របស់លោក ៕

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Sponsored News

១០:១៩ | ក្នុងស្រុក

មិត្ត​ហ្វូ​ន​មាន​មោទនភាព​ដែល​បាន​ក្លាយ​ជា​ដៃគូ​យុទ្ធសាស្ត្រ​យូរអង្វែង​របស់​​ក្រសួង​អប់រំ យុវជន និង​កីឡា សហ​ការ​លើ «​បច្ចេកវិទ្យា​ព័ត៌មាន​ក្នុង​វិស័យ​​អប់រំ​»

ការស្ទង់មតិគេហទំព័រថ្មី




សូម​អរគុណ