អស់រយៈពេលជាច្រើនទសវត្ស ប្រទេសចិនគឺជាទឹកដីល្អប្រពៃ សម្រាប់ក្រុមហ៊ុនផលិតរថយន្តអាមេរិក អឺរ៉ុប និងជប៉ុន។ ឥឡូវនេះការផ្ទុះឡើងនៃមេរោគនេះបានគំរាមកំហែងដល់ការធ្លាក់ចុះនៃការលក់យានយន្ត ដែលធ្វើឱ្យប៉ះពាល់ដល់ផលិតកម្មនៅក្នុងប្រទេសនិងបណ្តាញផ្គត់ផ្គង់រថយន្តទូទាំងពិភពលោក។
ក្រុមហ៊ុន Volkswagen (VLKAF) ក្រុមហ៊ុន Daimler (DDAIF) ក្រុមហ៊ុន General Motors (GM) ក្រុមហ៊ុន Renault (RNLSY) ក្រុមហ៊ុនហុងដា (HMC) និង ក្រុមហ៊ុនហ៊ីយ៉ាន់ដាយ (HYMTF) ស្ថិតក្នុងចំណោមក្រុមហ៊ុនផលិតរថយន្តសកល ដែលបានវិនិយោគយ៉ាងច្រើននៅក្នុងប្រទេសចិន និង បង្កើតភាពជាដៃគូជាមួយក្រុមហ៊ុនក្នុងស្រុក។ ប្រទេសចិនផលិតរថយន្តច្រើនជាងប្រទេសដទៃទៀត ហើយក៏ជាទីផ្សារធំបំផុតរបស់ពិភពលោកផងដែរ។
នៅពេលរោងចក្ររថយន្តនៅទូទាំងប្រទេសចិនបានបិទកាលពីខែមុនសម្រាប់ថ្ងៃឈប់សម្រាកបុណ្យចូលឆ្នាំប្រពៃណីជាតិ ឧស្សាហកម្មនេះបានរងសម្ពាធយ៉ាងខ្លាំងរួចទៅហើយ។ ការលក់បានធ្លាក់ចុះអស់រយៈពេលពីរឆ្នាំមកហើយ ដោយសារតែការបាត់បង់ការលើកទឹកចិត្តពន្ធចំពោះរថយន្តអគ្គិសនី និងសេដ្ឋកិច្ចដែលកំពុងធ្លាក់ចុះ ហើយមន្ត្រីបានរំពឹងថានឹងមាន ភាពជាប់គាំងនៅឆ្នាំទី៣ ដែលមិនធ្លាប់មាន។
ភាគច្រើននៃរោងចក្រទាំងនោះត្រូវបានគេបញ្ជាឱ្យបិទទ្វារ យ៉ាងហោចណាស់រហូតដល់សប្តាហ៍ក្រោយ។ ក្រុមហ៊ុនផលិតរថយន្តកំពុងត្រៀមសម្រាប់ការបិទកាន់តែយូរ និងការធ្លាក់ចុះនៃការលក់នៅលើពិភពលោក។
អ្នកវិភាគនៅ S&P Global Ratings បាននិយាយនៅក្នុងរបាយការណ៍ដែលបានចេញផ្សាយកាលពីថ្ងៃពុធថា៖ «យើងសន្មតថាអតិថិជននឹងមានទំនោរជៀសវាងទិញរថយន្តនៅក្នុងហាងចែកចាយ ដើម្បីកាត់បន្ថយហានិភ័យនៃការឆ្លងរាលដាល»។
គួរបញ្ជាក់ផងដែរថា វិបត្តិនៃការរីករាលដាលនៃជម្ងឺកូរ៉ូណាកាន់តែអូសបន្លាយកាន់តែយូរ នោះឱកាសកាន់តែច្រើនដែលខ្សែសង្វាក់ផ្គត់ផ្គង់រថយន្តសកលនឹងត្រូវខូចខាត៕
ចែករំលែកព័តមាននេះ