ភ្លើងឆេះ​ព្រៃ​ក្នុង​តំបន់អង្គរ សមត្ថកិច្ច​ថាមានគេលួចដុត​


ខេត្តសៀមរាប ៖ មាន​អគ្គិភ័យ​ឆាបឆេះ​ព្រៃ​ក្នុង​តំបន់​រមណីយដ្ឋាន​អង្គរ ហើយ​ករណីនេះ​ត្រូវ​បាន​សមត្ថកិច្ច​អះអាង​​ថា​មាន​គេ​លួច​ដុត ដែល​ហេតុការណ៍​នេះ​បង្ក​ការ​ភ្ញាក់ផ្អើល​ដល់​ប្រជាពលរដ្ឋ និង​សមត្ថកិច្ច​កាលពី​វេលា​ម៉ោង​៤​និង​៣៥​នាទី​រសៀល​ថ្ងៃ​ទី​៣ ខែកុម្ភៈ ឆ្នាំ​២០២០​នេះ ស្ថិត​នៅ​ក្នុងភូមិ​សាស្ត្រ​ភូមិ​អញ្ចាញ សង្កាត់​នគរធំ ក្រុង​សៀមរាប​។

បើ​តាម​ប្រភព​ពី​សមត្ថកិច្ច​មូលដ្ឋាន​បាន​ប្រាប់​ថា ភ្លើង​ឆេះ​ព្រៃ​នៅ​ក្នុង​តំបន់​រមណីយដ្ឋាន​អង្គរ​ខាងលើ​នេះ​ពិតជា​កើត​មាន​មែន ដោយ​ជន​មិន​ស្គាល់​មុខ​បាន​លួច​ដុត ទើប​បណ្តាល​ឱ្យ​ការ​ភ្ញាក់ផ្អើល​ដល់​កម្លាំង​សមត្ថ​កិច្ច និង​អាជ្ញាធរ​អប្សរា ព្រមទាំង​រថយន្ត​ពន្លត់អគ្គីភ័យ ចុះ​មក​ជួយ​អន្តរាគមន៍​ទាន់​ពេលវេលា មិន​ឱ្យភ្លើង​​ឆេះ​រាលដាល​ដល់​ផ្ទះ​ប្រជាពលរដ្ឋ​នៅ​ក្នុង​តំបន់​នោះ​ឡើយ ។

តាម​ប្រភព​ដដែល​បាន​បន្ត​ថា ក្នុង​ការ​ចុះ​ជួយ​អន្តរាគមន៍​ពន្លត់ភ្លើង​ឆេះ​ព្រៃ​ក្នុង​តំបន់​រមណីយដ្ឋាន​អង្គរ​ខាងលើ​នេះ ក៏​មាន​រថយន្ត​ពន្លត់​អគ្គិភ័យ​ចំនួន​៣​គ្រឿង​បាន​ចុះ​មក​ដល់​កន្លែង​កើតហេតុ ក្នុង​នោះ​មាន​រថយន្ត​ពន្លត់អគ្គីភ័យ​របស់​អាជ្ញាធរ​អប្សរា​ចំនួន​២​គ្រឿង និង​រថយន្ត​ពន្លត់​អគ្គិភ័យ​របស់​ស្នងការដ្ឋាន​នគរបាល​ខេត្ត​១​គ្រឿង ។ ក្នុង​ហេតុការណ៍​នោះ​ដែរ​ក៏​មានការ​ចូលរួម​ពី​បងប្អូន​ប្រជាពលរដ្ឋ​បាន​នាំ​គ្នា​យក​មែកឈើ​វាយ​ពន្លត់​កាត់មុខ​ភ្លើង​កុំឱ្យ​ឆេះ​រាលដាល​បន្ត​ទៅ​ដល់​ផ្ទះ​ប្រជាពលរដ្ឋ និង​ឆេះ​បំផ្លាញ​ព្រៃ​បន្ត​ទៅ​ទៀត ហើយ​ភ្លើង​បាន​រលត់​ទាំងស្រុង​នៅ​វេលា​ម៉ោង​៥​ល្ងាច​ថ្ងៃ​ដដែល ដោយ​បាន​ប្រើប្រាស់​ទឹក​បាញ់​ពន្លត់​អស់​មួយ​រថយន្ត ។

បើ​តាម​ការ​បញ្ជាក់​របស់​លោក​មេ​ភូមិ​អញ្ចាញ​បានឱ្យ​ដឹង​ថា ជា​រៀង​រាល់​ឆ្នាំ​ការ​លប​លួច​ដុត​ព្រៃ​នៅ​ក្នុង​តំបន់​រមណីយដ្ឋាន​អង្គរ​នេះ គឺ​កើត​មាន​ជា​រឿយ​ៗ ដោយសារ​រដូវ​នេះ​ជា​រដូវ ក្តៅ​ហើយ​ស្ងួត បង្ក​ភាព​ងាយស្រួល​ដល់​ជនល្មើស​ធ្វើ​សកម្មភាព​ដុត​បំផ្លាញ​ផង​ដែរ ។

តាម​ការ​វាយតម្លៃ​របស់​មន្ត្រី​អប្សរា​បានឱ្យ​ដឹង​ថា ការ​ឆេះ​ព្រៃ​ក្នុង​តំបន់​រមណីយដ្ឋាន​អង្គរ​ខាងលើ​នេះ គឺ​ឆេះ​ព្រៃ និង​ស្មៅ ហើយ​បាន​រាលដាល​ទៅ​ឆេះ​ព្រៃ​ក្រាស់​ៗ ដែល​ត្រូវ​បាន​ធ្វើការ​អភិរក្ស ។ ម្យ៉ាងទៀត​តំបន់​ដែល​ត្រូវ​ភ្លើង​ឆេះ​ខាងលើ​នេះ គឺជា​ដី​ដែល​អាជ្ញាធរ​អប្សរា​ធ្វើការ​អភិរក្ស​ព្រៃឈើ ដោយ​បាន​ដាំ​ដុះ​ដើម​ឈើ​ឡើង​វិញ​នៅ​តាម​តំបន់​ព្រៃ​រេច​រិល ដែល​ក្រុម​ជនល្មើស​បាន​កាប់​ទន្ទ្រានព្រៃ​យក​ដី​ធ្វើ​ជា​កម្មសិទ្ធិ​ផ្ទាល់ខ្លួន ៕ (​កែសម្រួល​ដោយ ៖ ធីតា​)

ព្រឹត្តិការណ៍សង្គម

អត្រាប្តូរប្រាក់

អត្រាប្តូរប្រាក់ផ្សេងទៀត

Sponsored News

១០:១៩ | ក្នុងស្រុក

មិត្ត​ហ្វូ​ន​មាន​មោទនភាព​ដែល​បាន​ក្លាយ​ជា​ដៃគូ​យុទ្ធសាស្ត្រ​យូរអង្វែង​របស់​​ក្រសួង​អប់រំ យុវជន និង​កីឡា សហ​ការ​លើ «​បច្ចេកវិទ្យា​ព័ត៌មាន​ក្នុង​វិស័យ​​អប់រំ​»

ការស្ទង់មតិគេហទំព័រថ្មី




សូម​អរគុណ