ខេត្តព្រះសីហនុ ៖ សាងសង់ស្ពានមួយខ្សែធ្វើពីបេតុងប្រវែង7,8ម៉ែត្រ ទទឹង5ម៉ែត្រ និងកម្ពស់4,25ម៉ែត្រចំណាយថវិកាអស់ចំនួន3ម៉ឺន5ពាន់ដុល្លារដែលជាថវិការបស់ឃុំ-សង្កាត់ជូនប្រជាពលរដ្ឋ នៅក្នុងភូមិស្វាយជាភូមិដាច់ត្រយ៉ាល ស្ថិតក្នុងឃុំតានៃ ស្រុកព្រៃនប់ ខេត្តព្រះសីហនុ ។…
ខេត្តព្រះសីហនុ ៖ សាងសង់ស្ពានមួយខ្សែធ្វើពីបេតុងប្រវែង7,8ម៉ែត្រ ទទឹង5ម៉ែត្រ និងកម្ពស់4,25ម៉ែត្រចំណាយថវិកាអស់ចំនួន3ម៉ឺន5ពាន់ដុល្លារដែលជាថវិការបស់ឃុំ-សង្កាត់ជូនប្រជាពលរដ្ឋ នៅក្នុងភូមិស្វាយជាភូមិដាច់ត្រយ៉ាល ស្ថិតក្នុងឃុំតានៃ ស្រុកព្រៃនប់ ខេត្តព្រះសីហនុ ។
ក្នុងឱកាសនោះ លោកអ៊ុកសាវឿនមេឃុំតានៃបានថ្លែងថា នេះជាសមិទ្ធផលថ្មីមួយទៀតសម្រាប់ជូនប្រជាពលរដ្ឋនៅក្នុងភូមិស្វាយប្រើប្រាស់ បន្ទាប់ពីសមិទ្ធផលចំនួន2 ក្នុងឆ្នាំនេះត្រូវបានសាងសង់ជូនប្រជាពលរដ្ឋរួចរាល់ជាស្ថាពរ ក្នុងនោះមួយគឺស្ពានបេតុងក្រៅឈើមានប្រវែងជាង30 ម៉ែត្រទទឹង 5 ម៉ែត្រនិងជីកស្រះទឹកសម្រាប់ផ្គត់ផ្គង់ទឹកមានទំហំបណ្តោយ50 ម៉ែត្រ ទទឹង40ម៉ែត្រ ។
លោកមេឃុំបានបន្តថា ភូមិស្វាយជាភូមិនៅតំបន់ដាច់ស្រយាលជាយឃុំជាយស្រុកយាយខេត្តភូមិនេះមានប្រជាពលរដ្ឋរស់នៅចំនួន300គ្រួសារនិងមានចំនួនប្រជាពលរដ្ឋជាង1ពាន់នាក់ ហើយស្ពានដែលកំពុងសាងសង់ជូនប្រជាពលរដ្ឋនៅថ្ងៃនេះគឺជាផ្លូវយ៉ាងសំខាន់ក្នុងប្រជាពលរដ្ឋដែលលោកដឹកជញ្ជូនកសិផលទៅមកឆ្លងកាត់ទៅកាន់ទីផ្សារផ្សេងៗ ជាពិសេសសំរាប់សិស្សានុសិស្សឆ្លងទៅមកក្នុងការសិក្សា ។
លោកមេឃុំបានបន្ថែមថាស្ពាននេះ បើតាមក្រុមហ៊ុនម៉ៅការសាងសង់បានបញ្ជាក់ថា រយៈពេលប្រមាណជា 2 ខែនឹងសាងសង់រួចជាស្ថាពរដោយមិនឲ្យចូលដល់រដូវវស្សានៅឡើយ។ ជាចុងបញ្ចប់ លោកមេឃុំក៏បានផ្ដាំផ្ញើដល់ប្រជាពលរដ្ឋអោយចេះរួមគ្នាថែរក្សាសមិទ្ធផលទាំងនេះដោយក្នុងនោះដឹកកុំឲ្យលើសទម្ងន់ដែលបានកំណត់ដើម្បីរក្សាស្ពានឲ្យមានគុណភាពប្រើប្រាស់បានយូរអង្វែង។
ក្រៅពីការផ្ដាំផ្ញើថែរក្សាសមិទ្ធផលមួយចំនួនដែលមាន លោកមេឃុំក៏បានផ្ដាំផ្ញើបន្ថែមផងដែរដល់ពលរដ្ឋទាំងអស់នៅក្នុងឃុំស្វាយក៏ដូចជាក្នុងភូមិដទៃទៀតសូមកុំកាប់ទន្ទ្រានដីព្រៃយកធ្វើជាកម្មសិទ្ធិហើយក្នុងនោះក៏បានផ្ដាំផ្ញើរដល់លោកមេភូមិពីការចុះហត្ថលេខាលើបញ្ហាដីធ្លីមិនគួរអនុវត្តបន្តទៀតឡើយព្រោះវាផ្ទុយទៅនឹងច្បាប់។
លោក ជុំ មៀនជាពលរដ្ឋក្នុងភូមិស្វាយបានសម្ដែងការត្រេកអរនិងអរគុណដល់ថ្នាក់ដឹកនាំពីលើដល់ក្រោមឃុំសង្កាត់ដែលបានសាងសង់ស្ពានថ្មីជំនួសស្ពានឈើចាស់ដែលមានសភាពទ្រុឌទ្រោមនេះជូនពលរដ្ឋនៅក្នុងភូមិស្វាយទាំងអស់ប្រើប្រាស់ក្នុងការឆ្លងទៅមកដឹកកសិផលផ្សេងៗទៅផ្សារនិងកូនប្អូនៗក្មួយៗបានឆ្លងទៅមកក្នុងការសិក្សាផងដែរ។
ចែករំលែកព័តមាននេះ