រាជធានីភ្នំពេញ ៖ ស្របពេលដែលជំងឺមួយនេះរាតត្បាតយ៉ាងខ្លាំងពេញប្រទេសអាចនឹងធ្វើឲ្យភ្ញៀវទេសចរធ្លាក់ចុះនៅកម្ពុជាផងដែរ ។ ដោយក្រសួងទេសចរណ៍នឹងបើកកិច្ចប្រជុំបន្ទាន់មួយថ្ងៃនៅស្អែកនេះ ជាមួយភាគីពាក់ពាក់ព័ន្ធទាំងវិស័យរដ្ឋ និងឯកជន ដើម្បីដោះស្រាយវិបត្តិនៃការធ្លាក់ចុះភ្ញៀវទេសចរមកលេងកម្សាន្តកម្ពុជា ដោយសារការព្រួយបារម្ភលើការរាលដាលពីជំងីផ្លូវដង្ហើមប្រភេទថ្មី «កូរ៉ូណាវីរុស» ។
លោកថោង ខុន រដ្ឋមន្ត្រីក្រសួងទេសចរណ៍បានឱ្យដឹង ក្រោយពីចុះត្រួតពិនិត្យដោយផ្ទាល់នៅអាកាសយានដ្ឋានអន្តរជាតិសៀមរាប និងច្រកទ្វារព្រំដែនអន្តរជាតិប៉ោយប៉ែត កាលពីពេលថ្មីៗនេះថា នៅថ្ងៃទី២៩ ខែមករា ស្អែកនេះលោកនឹងដឹកនាំកិច្ចប្រជុំការងារធំមួយជាមួយផ្នែកពាក់ព័ន្ធលើការងារនេះ ។ លោកថា «ការកោះប្រជុំគ្រប់ផ្នែកពាក់ព័ន្ធ រួមទាំងផ្នែកឯកជនបន្ទាន់នេះ ដើម្បីបន្តជំរុញចលនាទេសចរណ៍ក្នុងស្រុកឱ្យបានកាន់តែខ្លាំងថែមទៀត ខណៈកម្ពុជាកំពុងរងផលប៉ះពាល់ដោយសារជំងឺផ្លូវដង្ហើមប្រភេទថ្មីនេះ ដើម្បីកាត់បន្ថយផលប៉ះពាល់ធ្ងន់ធ្ងរដល់ផ្នែកអាជីវកម្ម និងឧស្សាហកម្មទេសចរណ៍ដូចដែលកម្ពុជាធ្លាប់ជួបប្រទះ និងបានរួមគ្នាទប់ស្កាត់នៅពេលមានការផ្ទុះឡើងនូវជំងឺ SARS ក្នុងពិភពលោក កាលពីឆ្នាំ២០០៣» ។
លោករដ្ឋមន្ត្រីក្រសួងទេសចរណ៍បានបន្តថា ការជំរុញចលនាទេសចរណ៍ក្នុងប្រទេសនេះ គឺជាវិធានការមួយដ៏សំខាន់ ដែលអង្គការទេសចរណ៍ពិភពលោកទទួលស្គាល់ក្នុងពេលដែលវិស័យទេសចរណ៍ត្រូវទទួលរងនូវផលប៉ះពាល់ពីជំងឺឆ្លង ឬវិបត្តិសេដ្ឋកិច្ចសកល ។ ការធ្វើដំណើរបស់ទេសចរក្នុងស្រុកនឹងចូលរួមចំណែកទ្រទ្រង់យ៉ាងសំខាន់ដល់មូលដ្ឋានអាជីវកម្មទេសចរណ៍នៅពេលដែលការធ្វើដំណើររបស់ទេសចរអន្តរជាតិមានការធ្លាក់ចុះ ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានសម្តែងការព្រួយបារម្ភ នៅពេលមានបញ្ហាកើតឡើងនូវជំងឺផ្លូវដង្ហើមប្រភេទថ្មី «កូរ៉ូណាវីរុស» កើតឡើងដែលធ្វើឱ្យវិស័យទេសចរណ៍បង្កឱ្យមានបញ្ហានិងផលប៉ះពាល់ច្រើនទូទាំងតំបន់អាស៊ី មិនថា ប្រទេសកម្ពុជានោះទេ ដែលទាមទារឱ្យមានការដោះស្រាយស្រមស្របណាមួយ និងទាន់ពេលវេលា ។ លោកស្រីបន្តថា «វីរុសថ្មីនេះ បើនៅតែបន្តកើតឡើង នឹងបានធ្វើឱ្យប៉ះដល់អ្នករកស៊ីក្នុងវិស័យទេសចរណ៍ដោយផ្ទាល់ និងប្រយោល ខណៈកម្ពុជាពឹងផ្អែកលើភ្ញៀវទេសចរណ៍ចិន ហើយកិច្ចប្រជុំនេះដែលធ្វើនៅថ្ងៃស្អែននេះ និងរិះរកគ្រប់វិធី ដើម្បីដោះស្រាយបញ្ហាដែលកើតឡើងអន្តរកាលនេះ» ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានលើកឡើងនៅក្នុងសន្និសីទកាសែត កាលពីយប់មិញនេះឱ្យដឹងថា មកដល់ពេលនេះ កម្ពុជាគ្មានការបិទជើងហោះហើរពីប្រទេសចិនមកកម្ពុជានោះទេ បើទោះបីករណីមេរោគមេរុសថ្មីកូរ៉ូណាកើតចំពោះជនជាតិចិនដែលបានធ្វើដំណើរពីប្រទេសចិនមកកាន់ខេត្តព្រះសីហនុ ។ ក្រៅពីប្រទេសចិន មិនទាន់មានប្រទេសណាផ្សេងទៀតបានរាយការណ៍អំពីករណីស្លាប់ដោយសារវីរុសកូរ៉ូណានោះឡើយ ខណៈប្រទេសមួយចំនួនបានព្យាយាមព្យាបាលអ្នកឆ្លងឱ្យបានធូរស្រាលឡើងវិញផងដែរ ៕
ចែករំលែកព័តមាននេះ