នៅពេលដែលប្រជាជនកម្ពុជាសឹងគ្រប់ផ្ទះ បាននាំគ្នាប្រារព្វបុណ្យចូលឆ្នាំចិន វាមិនត្រឹមតែជាឱកាស សម្រាប់ការជួបជុំគ្រួសារនិងការសប្បាយរីករាយនោះទេ វាថែមទាំងជាការឆ្លុះបញ្ចាំងអោយឃើញពី ទំនាក់ទំនងដ៏រឹងមាំខ្លាំងមួយរវាងចិន និងកម្ពុជា។
សាលារៀន ក្រុមហ៊ុន និងមុខរបរជាច្រើន បានបិទមិនដំណើរការដើម្បីប្រារព្វបុណ្យចូលឆ្នាំចិន បើទោះបីជាមិនមានច្បាប់តម្រូវក៏ដោយចុះ។
នៅថ្ងៃទីមួយនៃការចូលឆ្នាំចិន គេឃើញមានការស្លៀកបំពាក់សម្លៀកបំពាក់ពណ៌ក្រហមជាច្រើន។ ក្រហមសឹងគ្រប់ផ្ទះនៅកម្ពុជាមានន័យជ្រៅជាងពិធីបុណ្យប្រពៃណីចិនធម្មតា។ វាថែមទាំងបង្កប់ន័យថា ទង់ក្រហមរបស់ចិន បានចូលជ្រៅក្នុងបេះដូងប្រជាជន និងសង្គមកម្ពុជា។
ជាង៦០ឆ្នាំនៃទំនាក់ទំនងការទូតរវាងប្រទេសកម្ពុជានិងប្រទេសចិន ទំនាក់ទំនងរវាង ប្រទេសទាំងពីរ ត្រូវបានគេមើលឃើញថា បានរីកធំធាត់និងរឹងមាំជាងពេលណាៗទាំងអស់ ។
ប្រទេសចិនក្លាយជាប្រទេសដែលផ្តល់ជំនួយច្រើនជាង មានទំហំវិនិយោគច្រើនជាងគេ និងមានអ្នកទេសចរណ៍មកកម្ពុជាច្រើនជាងគេ។
នៅចន្លោះឆ្នាំ២០១៣ និងឆ្នាំ២០១៧ប្រទេស ចិនបានវិនិយោគចំនួន៥៣០០លានដុល្លារនៅ កម្ពុជាដែលតួលេខនេះអាចនិយាយបានថា ការវិនិយោគមានប្រមាណ១០០០លានដុល្លារ នៅក្នុងមួយឆ្នាំនៅកម្ពុជា។
ចំណែកការធ្វើពាណិជ្ជកម្មរវាងប្រទេសទាំងពីរមានតម្លៃជាទឹកប្រាក់ចំនួន៦០០០លានដុល្លារនៅក្នុងឆ្នាំ២០១៧។
កាលពីឆ្នាំ២០១៩ ប្រទេសចិនក៏បានសន្យាផ្តល់ជំនួយប្រមាណជាជិត៦០០លានដុល្លារដល់កម្ពុជាសម្រាប់រយៈពេលបីឆ្នាំចាប់ពីឆ្នាំ២០១៩ ដល់ឆ្នាំ២០២១។ ខណៈដែលប្រទេសនេះជាប្រទេស ដែលផ្តល់ជំនួយច្រើនជាងបំផុតដល់កម្ពុជា។
រីឯទេសចរណ៍ចិនប្រមាណជា២លាននាក់បានធ្វើដំណើរមកកម្ពុជាកាលពីឆ្នាំ២០១៨។
តួលេខទាំងនេះ បានបង្ហាញថាដង្ហើមសេដ្ឋកិច្ចកម្ពុជាពឹងផ្អែកខ្លាំងទៅលើប្រទេសចិនហើយជំនួយនិងការវិនិយោគរបស់ចិន បានចូលរួមចំណែកយ៉ាងធំធេងដល់ការរីកចម្រើនសេដ្ឋកិច្ចរបស់កម្ពុជាដែលមានកំណើនប្រមាណជា៧ភាគរយនៅក្នុងមួយឆ្នាំ។
ដូច្នេះ ប្រទេសកម្ពុជាបានទទួលផលប្រយោជន៍ជាច្រើនពីទំនាក់ទំនងដ៏រឹងមាំរវាងកម្ពុជានិងចិន ។ ហេតុដូច្នេះ ហើយបានជាមេដឹកនាំប្រទេសកម្ពុជា គឺសម្តេចតេជោហ៊ុន សែន តែងតែលើកឡើងហើយលើកឡើងទៀត អំពីសារសំខាន់ខ្លាំងនៃទំនាក់ទំនងរវាងចិននិងកម្ពុជា។
ប៉ុន្តែសម្លឹងមើលចេញពីជ្រុងអវិជ្ជមានវិញនោះ លំហូរចូលដ៏ច្រើននៃជនជាតិចិនមកកម្ពុជាក៏បាន បង្កជា បញ្ហាសង្គមមួយចំនួនផងដែរជា ដូចជាករណីគ្រឿងញៀន ការប្លន់ ការចាប់ជម្រិត និងអំពើអសកម្មក្នុង សង្គមមួយចំនួនទៀត ពិេសសនៅក្នុងខេត្តព្រះសីហនុ មុនពេលដែលកម្ពុជាបានបញ្ឈប់ការ រកស៊ីកាស៊ីណូអនឡាញនៅក្នុងប្រទេសកម្ពុជា។
ខណៈដែលកម្ពុជាស្វាគមន៍ជំនួយរបស់ចិននោះ វាទាមទារអោយកម្ពុជាមាន ការគ្រប់គ្រងដ៏មានប្រសិទ្ធភាពមួយចំពោះជនជាតិចិននៅកម្ពុជាដើម្បីធ្វើយ៉ាងណា អោយកម្ពុជាអាចទទួលបានផលប្រយោជន៍កាន់តែច្រើនពីទំនាក់ទំនងរវាងចិន និងកម្ពុជា។
ការទប់ស្កាត់សមភាពអាក្រក់មកពីប្រទេសចិនមិនត្រឹមតែជួយលប់បំបាត់បញ្ហាសង្គមដែលបង្កឡើងដោយជនជាតិចិននៅប្រទេសកម្ពុជានោះទេ ប៉ុន្តែវាថែមទាំងជួយជ្រោមជ្រែងដល់ទំនាក់ទំនង ល្អរវាងចិននិងកម្ពុជាផងដែរ។
ខណៈដែលរដ្ឋាភិបាលនៃប្រទេសទាំងពីរសរសើរពីទំនាក់ទំនងដ៏ផូរផង់នេះ ប្រជាជនកម្ពុជាមួយចំនួន មិនសប្បាយចិត្តនឹងបញ្ហាសង្គមដែលបង្កឡើងដោយជនជាតិចិន ។ ដូច្នេះ វាបានធ្វើអោយមាន ការយល់ច្រឡំដល់ទំនាក់ទំនងរវាងចិននិងកម្ពុជា។
ដើម្បីបំបាត់ការយល់ច្រឡំនេះ វាទាមទារអោយមានការមានវិធានការដ៏មានប្រសិទ្ឋភាពដើម្បីទប់ស្កាត់ ចិនសមាសភាពអាក្រក់មិនអោយមកបង្កបញ្ហានៅកម្ពុជា ខណៈដែលកម្ពុជាងត្រូវស្វាគមន៍ អោយបានកក់ក្តៅដល់ជនជាតិដែលត្រឹមត្រូវ និងរកស៊ីស្របច្បាប់នៅកម្ពុជា។
ចូលឆ្នាំចិននៅឆ្នាំនេះ គេឃើញទាំងចិននិងកម្ពុជាបានសប្បាយរួមគ្នា។ វាជាការចាំបាច់ដែលស្នាមញញឹម រវាងប្រជាជននៃប្រទេសទាំងពីរ ត្រូវថែរក្សាអោយបានគ្រប់ពេលវេលា ៕
ចែករំលែកព័តមាននេះ