រាជធានីភ្នំពេញ ៖ កីឡាករជើងខ្លាំងទម្ងន់ធ្ងន់ធឿន ធារ៉ា មកពីសមាគមកីឡាប្រដាល់ក្រសួងកសិកម្ម និងកីឡាករសុខ សាវិន មកពីក្លិបប៉ែនកាក់គុនខ្មែរ ត្រូវបានគេរៀបចំឱ្យជួបប្រកួតជាមួយកីឡាករថៃដណ្ដើមប្រាក់លានពីក្រុមហ៊ុនខារ៉ាបាវ នៅលើសង្វៀនទូរទស្សន៍ស៊ីអិនស៊ីនាថ្ងៃសៅរ៍នេះ…
រាជធានីភ្នំពេញ ៖ កីឡាករជើងខ្លាំងទម្ងន់ធ្ងន់ធឿន ធារ៉ា មកពីសមាគមកីឡាប្រដាល់ក្រសួងកសិកម្ម និងកីឡាករសុខ សាវិន មកពីក្លិបប៉ែនកាក់គុនខ្មែរ ត្រូវបានគេរៀបចំឱ្យជួបប្រកួតជាមួយកីឡាករថៃដណ្ដើមប្រាក់លានពីក្រុមហ៊ុនខារ៉ាបាវ នៅលើសង្វៀនទូរទស្សន៍ស៊ីអិនស៊ីនាថ្ងៃសៅរ៍នេះ ។
អ្នកនិយមទស្សនាកីឡាប្រដាល់ភាគច្រើនកំពុងតែទន្ទឹងរង់ចាំមើលថាតើកីឡាករកម្ពុជាទាំង២រូបនេះមានសមត្ថភាពអាចយកឈ្នះគូប្រកួតដណ្ដើម ប្រាក់លានបានឬអត់ ខណៈកីឡាករថៃដែលពួកគេត្រូវជួបនាពេលនេះហាក់មានសមត្ថភាពខ្លាំងពិបាកផ្ដួលអ៊ីចឹងនោះ។
ការប្រកួតនៅថ្ងៃនេះកីឡាករធឿន ធារ៉ា ត្រូវជួបប្រកួតជាមួយកីឡាករថៃ កងមឿងឆាង ក្នុងប្រភេទទម្ងន់៦៩គីឡូក្រាម ។ ធឿន ធារ៉ា ជាអ្នកប្រដាល់ជើងចាស់មួយរូបដែលមាន បទពិសោធន៍ប្រកួតនៅលើសង្វៀនជាយូរឆ្នាំមកហើយ ។ មួយរយៈមកនេះគេឃើញធឿន ធារ៉ា
ឡើងសង្វៀនប្រកួតជាញឹកញាប់ទៀតផងជាពិសេសការប្រកួតជាលក្ខណៈអន្តរជាតិ ។ លើក
នេះទទួលបានឱកាសឡើងប្រកួតដណ្ដើមប្រាក់ លានជាមួយកីឡាករថៃដែលមានថ្វីដៃប្រកួតមិនធម្មតា ។ ដូច្នេះបើសិនជាធឿន ធារ៉ា មិនបានត្រៀមខ្លួនទុកមុនទេ ប្រាក់លានអាចនឹងធ្លាក់ក្នុងកណ្ដាប់ដៃកីឡាករថៃជាក់ជាមិនខាន។
មួយគូទៀតកីឡាករ សុខ សាវិន មកពីក្លិបប៉ែនកាក់គុនខ្មែរ ត្រូវជួបប្រកួតជាមួយកីឡាករថៃលីងលំ ប៉.យុទ្ធភូមិ ក្នុងប្រភេទទម្ងន់៦០គីឡូក្រាម ។ កីឡាករថៃម្នាក់នេះធ្លាប់មកប្រកួតនៅសង្វៀនស្រុកខ្មែរជាច្រើនលើកនិងធ្លាប់ផ្ដួលអ្នកប្រដាល់ជើងខ្លាំងកម្ពុជាយើងឱ្យចាញ់នៅក្រោមកណ្ដាប់ដៃរបស់គេមិនតិចនាក់ទេ ។ ទោះបីយ៉ាងណា សុខ សាវិន ដែលជាអ្នកប្រដាល់ជើងចាស់មួយរូបមានស្នៀតកែងនិងជង្គង់ល្អច្បាស់ជាមិនធ្វើឱ្យអ្នកគាំទ្រខកចិត្តនោះទេ ។ ចាំមើលគូនេះប្រកួតចប់ នរណានឹងក្លាយជាអធិរាជនៅលើសង្វៀនប្រដាល់។
ដោយឡែកគូប្រកួតមិត្តភាពវិញ កីឡាករ ថុល ថេង មកពីសមាគមកីឡាប្រដាល់ក្រសួង កសិកម្ម ត្រូវជួបប្រកួតជាមួយកីឡាករ ធន់ ស៊ី ហុង មកពីសមាគមកីឡាប្រដាល់ក្រសួង ការពារជាតិ ។ កីឡាករ អេលីត សុខចិន មកពីក្លិបប៉ែនកាក់គុនខ្មែរ ប្រកួតជាមួយកីឡាករ វ៉ាន់ វឿន មកពីក្លិបមកុដរាជសីហ៍ និងគូបើកឆាកចុងក្រោយកីឡាករ ញ៉ន សម្បត្តិ មកពីក្លិបតាព្រហ្មមានជ័យ ប្រកួតជាមួយកីឡាករ សុះ គាត មកពីក្លិបឃ្លាំងមឿងកីឡា៕ (កែសម្រួលដោយ ៖ បុប្ផា)
ចែករំលែកព័តមាននេះ