វាគ្មានអ្វីគួរឱ្យភ្ញាក់ផ្អើលទេ ដែលថារថយន្ត Lamborghini Urus មានការលក់ជោគជ័យបំផុតក្នុងចំណោមត្រកូល Lamborghini។ កាលពីឆ្នាំមុន Lamborghini លក់បានចំនួន៨២០៥គ្រឿងដែលជាការកើនឡើង៤៣% បើប្រៀបធៀបទៅនឹងឆ្នាំមុនមួយទៀត។ នេះគឺដោយសារតែការលក់របស់រថយន្ត Urus ដែលជាប្រភេទរថយន្ត SUV ប្រណាំង។ វាត្រូវបានគេទិញដល់ទៅ៤៩៦២គ្រឿង នៅឆ្នាំ២០១៩ ដែលលើសឆ្នាំ២០១៨ ដល់ទៅ១៨២%។ តែអ្នកគួរតែដឹងថា Urus មិនមែនជារថយន្ត SUV ទីមួយរបស់ Lamborghini នោះទេ។ SUV ដំបូងគេរបស់ Lamborghini គឺជារថយន្ត LM002 ដែលគេស្គាល់ថាជារថយន្ត «Rambo Lambo»។
Lamborghini LM002 ត្រូវបានផលិតនៅចន្លោះឆ្នាំ១៩៨៦ និង១៩៩២។ វាជារថយន្តរបស់ Lamborghini ដំបូងគេ ដែលចង់ធ្វើម៉ូដបែបយោធា។ កាលនោះមានត្រឹមតែ៣០០គ្រឿងប៉ុណ្ណោះ ដែលបានផលិតចេញមក។ នេះគឺធ្វើឱ្យវាមានភាពកម្រយ៉ាងខ្លាំង។ ប្រសិនបើអ្នកចង់រកទិញវាមែននោះ វាពិតជាថ្លៃខ្លាំងមែនទែន ដល់ថ្នាក់ថាថ្លៃជាងរថយន្ត Lamborghini Urus នាពេលបច្ចុប្បន្នទៅទៀត។
គេបានដាក់លក់ Lamborghini LM002 ស៊េរីឆ្នាំ ១៩៨៩ ពណ៌ស លើ DuPont Registry ដែលម្ចាស់ពីមុនជិះបានចម្ងាយ១៨៧៦៣ម៉ាយល៍។ វាមានផ្នែកខាងក្នុងពាសដោយ ស្បែកខ្មៅពេញលេញជាមួយនឹងការតុបតែងឈើលើតាបឡូ ម៉ាស៊ីនត្រជាក់ និងប្រព័ន្ធសម្លេង Alpine Stereo ជាប់នឹងដំបូល។ តម្លៃវាវិញ គឺដល់ទៅ៣៤៩៩០០ដុល្លារ។ នេះគឺធ្វើឱ្យរថយន្តអាយុកាល៤០ឆ្នាំនេះ ថ្លៃជាង Lamborghini Urus ដល់ទៅ១៤៩៩០០ដុល្លារ។ Urus នាពេលនេះ ថ្មីតម្លៃចាប់ពី ២០០០០០ដុល្លារ។
LM002 ត្រូវបានបំពាក់ដោយម៉ាស៊ីន V12 ៥.២ លីត្រ ដែលផលិតបានថាមពល៤២៦សេស។ វាមានប្រអប់លេខចំនួន៨លេខអូតូ និង អាចជាន់ពី០ទៅ១០០ ដោយចំណាយពេល៩.៣វិនាទី ជាមួយនឹងល្បឿនអតិបរមា ២០០គីឡូម៉ែត្រក្នុងមួយម៉ោង៕ (កែសម្រួលដោយ ៖ ធីតា)
ចែករំលែកព័តមាននេះ