រាជធានីភ្នំពេញ ៖ ការដ្ឋានសំណង់អគារឃ្លាំង និងរបងថ្មមួយកន្លែង ត្រូវបានលោកឃឹម ស៊ុនសូដា អភិបាលខណ្ឌកំបូលបញ្ជាឲ្យកម្លាំងចុះទៅធ្វើការត្រួតពិនិត្យ និងវាស់វែងបន្ទាប់ពីមានការសង្ស័យថា ម្ចាស់ទីតាំងខាងលើសាងសង់លើសពីការសុំច្បាប់និងការអនុញ្ញាតឲ្យសាងសង់។
ក្រោយពីការវាស់វែងរួចបានរកឃើញថា សំណង់នេះពិតជាមិនមានភាពប្រក្រតីឡើយ ដោយសង់មិនត្រឹមត្រូវគឺសុំច្បាប់ប៉ុណ្ណេះ បែរជាសង់ប៉ុណ្ណោះលើសពីការអនុញ្ញាតរាប់រយម៉ែត្រការ៉េ ។ ដោយសារតែការសងខុសបទដ្ឋានបច្ចេកទេសបែបនេះ ធ្វើឲ្យមានការព្រួយបារម្ភខ្លាចមានហានិភ័យកើតឡើងជាយថាហេតុនៅថ្ងៃណាមួយនោះ ទើបលោកអភិបាលខណ្ឌបានឲ្យកម្លាំងដែលចុះទៅត្រួតពិនិត្យនោះផ្អាកសកម្មភាពសាងសង់ជាបន្ទាន់ រង់ចាំឲ្យម្ចាស់សុំច្បាប់ឲ្យបានត្រឹមត្រូវសិន។
ប្រតិបត្តិការនេះ បានធ្វើឡើងកាលពីវេលាម៉ោង៩ព្រឹកថ្ងៃទី២០ មករា ឆ្នាំ២០២០ នៅចំណុចការដ្ឋានសំណង់ឃ្លាំង និងរបងថ្មមួយកន្លែងដែលមានទីតាំងស្ថិតនៅក្នុងភូមិស្នោរខាងលិច សង្កាត់ស្នោរ ខណ្ឌកំបូល រាជធានីភ្នំពេញ ។ ក្រោមការដឹកនាំដោយដោយលោកគន់ ចាន់សុភារី នាយករងរដ្ឋបាលខណ្ឌ និងលោកវ៉ាន់ ដុល្លា ប្រធានការិយាល័យផែនការនិងអភិវឌ្ឍន៍ខណ្ឌកំបូល ។
នៅក្នុងឱកាសនោះដែរ លោកគន់ ចាន់សុភារី នាយករង រដ្ឋបាលខណ្ឌកំបូលបាននិយាយថា សំណង់ដែលកំពុងដំណើរការសាងសង់នេះជាប្រភេទសំណង់ឃ្លាំងដែលសាងសង់ពីដែករួមជាមួយរបងថ្មព័ទ្ធជុំវិញផងដែរ ដែលមានម្ចាស់ឈ្មោះសុខ ចន្ធូ ភេទស្រី ។គាត់បានសុំច្បាប់សាងសង់ពីអាជ្ញាធរខណ្ឌហើយដែរ ប៉ុន្តែអ្វីដែលលោកអភិបាលខណ្ឌបញ្ជាឲ្យលោកដឹកនាំកម្លាំងចុះទៅធ្វើការត្រួតពិនិត្យនិងវាស់វែងរហូតឈានដល់ការផ្អាកការសាងសង់ជាបណ្ដោះអាសន្ននេះគឺមានការសង្ស័យថាម្ចាស់សំណងនេះមិនគោរពតាមការអនុញ្ញាតនៅក្នុងច្បាប់ដែលបានស្នើរសុំនិងការអនុញ្ញាតឲ្យសាងសង់។
ប្រភពដដែលបានបន្តទៀតថា ក្រោយពេលធ្វើការវាស់វែងជាក់ស្ដែងនោះកម្លាំងបានរកឃើញថា សំណង់មួយនេះពិតជាល្មើសច្បាប់ដោយសង់ទំហំនិងប្រវែងលើសពីការស្នើរសុំនិងការអនុញ្ញាតមែន ដោយនៅក្នុងច្បាប់បានស្នើរសុំសង់ឃ្លាំងត្រឹមតែ៣០០ម៉ែត្រការ៉េប៉ុណ្ណោះ ប៉ុន្តែជាក់ស្ដែងម្ចាស់បានសង់រហូតដល់ទៅ៩០០ម៉ែត្រការ៉េ គឺលើសចំនួន៦០០ម៉ែត្រការ៉េ។
ចំណែករបងថ្មវិញការស្នើរសុំសាងសង់នៅក្នុងច្បាប់គឺត្រឹមតែប្រវែង១១០ម៉ែត្រប៉ុណ្ណោះទេ ប៉ុន្តែប្រវែងដែលវាស់ឃើញជាក់ស្ដែងគឺបានសង់រហូតដល់ទៅ២១៨ម៉ែត្រ ដែលបានសង់លើសប្រវែង១០៨ម៉ែត្រ។បន្ទាប់មកកម្លាំងក៏បានផ្អាកមិនឲ្យសាងសង់បន្តឡើយ និងបានណែនាំឲ្យម្ចាស់សុំច្បាប់ឡើងវិញឲ្យបានត្រឹមត្រូវសិន ទើបអនុញ្ញាតឲ្យសង់បន្តទៀតបាន៕
ចែករំលែកព័តមាននេះ