រាជធានីភ្នំពេញ ៖ ស្ត្រី២នាក់ ម្ដាយ និងកូនស្រីបានទំនាក់ទំនងទៅខាងក្រុមហ៊ុនប្រព័ន្ធ GPS មួយដែលពួកគាត់ធ្លាប់ហៅឲ្យជួយតភ្ជាប់ប្រព័ន្ធនេះ ដើម្បីឲ្យមកជួយពិនិត្យមើលប្រព័ន្ធ GPS ដែលបំពាក់ក្នុងរថយន្តថ្មីមួយគ្រឿងទៀត ។ លុះក្រោយពីការទំនាក់ទំនងរួច ខាងក្រុមហ៊ុនខាងលើបានចាត់បញ្ជូនជាងម្នាក់មកត្រួតពិនិត្យរថយន្តនោះដល់ផ្ទះរបស់គាត់ ប៉ុន្តែអ្វីដែលមិននឹកស្មានដល់នោះ គឺដូចជាបញ្ជូនចោរឲ្យទៅលួចរថយន្តទៅវិញ ។ ហេតុការណ៍នេះបានកើតឡើង កាលពីវេលាម៉ោង១០និង៣០នាទីព្រឹក ថ្ងៃទី១៨ ខែមករានេះ នៅក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យខាងលើឈ្មោះ ខន ពន្លក អាយុ២៧ឆ្នាំ មានស្រុកកំណើត នៅខេត្តកំពង់ចាម ជននេះបានលួចយករថយន្ដ១គ្រឿង ម៉ាកឡិចស៊ីស NX200T ពណ៌ស ពាក់ស្លាកលេខ ភ្នំពេញ 2AY-6695 ដែលជាកម្មសិទ្ធិរបស់ស្ត្រីឈ្មោះ សាញ់ ចិន្តា អាយុ៤៨ឆ្នាំ មុខរបរលក់ដូរ និងកូនស្រីឈ្មោះ សន ស៊ីវហុង អាយុ២៥ឆ្នាំ មុខរបរលក់ដូរ ហើយមានទីលំនៅក្នុងភូមិកើតហេតុខាងលើ ។
ប៉ុន្តែទោះជាបែបណាជាងដែលមានគំនិតជាចោរនេះ ក៏ត្រូវបានស្គាល់អត្តសញ្ញាណអស់ហើយ មិនតែប៉ុណ្ណោះជនសង្ស័យជាអតីតបុគ្គលិកក្រុមហ៊ុនប្រព័ន្ធ GPS មួយផ្សេងទៀត ហើយធ្លាប់លួចយករថយន្តម៉ាកឡិចស៊ីស RX300 ១គ្រឿងរបស់អតិថិជនបានសម្រេចម្តងរួចហើយដែរ ។ បន្ទាប់មកបានចេញពីក្រុមហ៊ុនចាស់នោះមកចូលបម្រើការងារនៅក្នុងក្រុមហ៊ុនថ្មីនេះ រួចក៏បានធ្វើសកម្មភាពលួចយករថយន្តម៉ាកឡិចស៊ីស NX200T នេះទៀត ។ ក្រោយពេលកើតរឿងបែបនេះស្ត្រីរងគ្រោះទាំង២នាក់ម្តាយកូនក៏បានធ្វើដំណើរទៅកាន់ផ្នែកព្រហ្មទណ្ឌនគរបាលខណ្ឌពោធិ៍សែនជ័យ ដើម្បីដាក់ពាក្យបណ្ដឹង និងបង្កឲ្យមានការភ្ញាក់ផ្អើលដល់សមត្ថកិច្ចពេញ១រាជធានីភ្នំពេញទាំងព្រឹក ។
មន្ត្រីនគរបាលម្នាក់បានឲ្យដឹងថា ក្រុមហ៊ុន GPS មួយនេះ គឺជាម៉ូយរបស់ស្ត្រីរងគ្រោះដែលកន្លងមកពួកគាត់ធ្លាប់ហៅឲ្យទៅភ្ជាប់ប្រព័ន្ធតាមដានសុវត្ថិភាពនេះ នៅក្នុងរថយន្តរបស់ពួកគាត់ចំនួន៤គ្រឿងរួចមកហើយ ។ ដោយឡែកកាលពីជាង១ខែមុន ពួកគាត់បានឲ្យដាក់រថយន្តទី៥ម៉ាកឡិចស៊ីស NX200T ទៀត ប៉ុន្តែក្នុងពេលថ្មីៗនេះរថយន្តមានបញ្ហាផ្នែកប្រព័ន្ធភ្លើង ហើយពួកគាត់មានការសង្ស័យថា ក្រែងបណ្ដាលមកពីការភ្ជាប់ប្រព័ន្ធតាមដាន GPS នេះមិនល្អមិនត្រឹមត្រូវតាមបច្ចេកទេស ទើបធ្វើការទំនាក់ទំនងទៅកាន់ខាងក្រុមហ៊ុនឲ្យជួយពិនិត្យមើលឡើងវិញ ។
ក្រោយមកនៅវេលាព្រឹកថ្ងៃទី១៨ ខែមករានេះ ខាងក្រុមហ៊ុនបានចាត់បញ្ជូនជនសង្ស័យឈ្មោះ ខន ពន្លក ទៅធ្វើការត្រួតពិនិត្យនិងកែសម្រួលឡើងវិញ ហើយមុនដំបូងជនរងគ្រោះទាំង២នាក់ម្ដាយ និងកូនស្រីបាននៅមើលជនសង្ស័យត្រួតពិនិត្យ ប៉ុន្តែក្រោយមកដោយយូរពេកហើយមានការរវល់ផង កូនស្រីបានប្រាប់ឲ្យម្ដាយនៅមើលជាងបន្ទាប់មកនាងបានចាកចេញទៅលក់ដូរនៅឯសន្ធរម៉ុកបាត់ទៅ ។
ប្រភពដដែលបានបន្តទៀតថា ខណៈពេលដែលស្ត្រីជាម្ដាយជាប់រវល់តែមើលកម្មករលើកដាក់ឥវ៉ាន់ភ្លេចខ្លួន ម្យ៉ាងអាងថា ក្រុមហ៊ុនប្រព័ន្ធ GPSនេះ គឺជាម៉ូយស្រាប់កន្លងមកហៅដាក់រថយន្ត៤គ្រឿងហើយមិនដែលមានបញ្ហាផងនោះ ទើបមិនមានការសង្ស័យអ្វីឡើយ ។ មិនតែប៉ុណ្ណោះ ខណៈនោះក៏បានឃើញជនសង្ស័យបើករថយន្តរយ៊ែទៅមុខ ថយក្រោយចុះឡើងៗដែរ តែនឹកស្មានថា បើកសាកលុះបន្តិចក្រោយមកស្រាប់តែបើកចេញទៅបាត់មិនត្រឡប់ក្រោយទើបឲ្យប្រើឲ្យកម្មករជិះម៉ូតូតាមមើលដែរតែតាមមិនទាន់ឡើយ ។ បន្ទាប់មកបាននាំគ្នាឆែកមើលរូបភាពក្នុងកាមេរ៉ាសុវត្ថិភាព ដើម្បីយករូបភាពទៅប្តឹងនគរបាល ហើយរហូតមកដល់វេលារសៀលថ្ងៃដដែល កម្លាំងនគរបាលព្រហ្មទណ្ឌខណ្ឌពោធិសែនជ័យ និងស្ត្រីរងគ្រោះទាំង២នាក់ម្ដាយ និងកូនបានធ្វើដំណើរទៅកាន់ក្រុមហ៊ុន GPS ដែលស្ថិតនៅក្បែរសាលាទិចណូ ដើម្បីសុំឲ្យសហការណ៍ស្វែងរកជនសង្ស័យខាងលើផ្ដន្ទាទោសតាមច្បាប់ ៕ កែសម្រួលដោយ ៖ សុឃាក់
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ