រាជធានីភ្នំពេញ ៖ ឧបកនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់បានបង្ហាញការធ្វើហេដ្ឋរចនាសម្ព័ន្ធនៅក្នុងខេត្តព្រះសីហនុ ម្តងនេះនឹងធ្វើឲ្យអ្នកបើកបររថយន្តខ្លាចម្តង ។ ការបង្ហាញពីភាពរីកចម្រើនផ្នែកហេដ្ឋារចនាសម្ព័ន្ធនៅក្នុងខេត្តដែលជាតំបន់ទាក់ទាញភ្ញៀវទេចរ ជាតិ និងអន្តរជាតិទៅទស្សនានេះ ខណៈដែលលោកបានបង្ហោះរូបភាពដែលបង្ហាញពីសកម្មភាពនៃការសាងសង់បណ្តាញហេដ្ឋារចនាសម្ព័ន្ធនៅទូទាំងខេត្តព្រះសីហនុ ដែលរួមមានការឈូសឆាយដីផ្លូវថ្នល់ ការកិនបង្ហាប់ ការចាក់កៅស៊ូ និងការដាក់បណ្តាញលូបង្ហូរទឹកដែលមានទំហំធំ កាលពីថ្ងៃទី១៦ ខែមករានេះ ។
ជាមួយគ្នានោះដែរ លោករដ្ឋមន្ត្រីក្រសួងដែនដីដែលគេធ្លាប់បានដាក់ងារថា «កណ្តាប់ដៃដែក» ក៏បានសរសេរនៅលើគណនីហ្វេសប៊ុកផ្ទាល់ខ្លួន របស់ដោយបានសរសេរសារដ៏ខ្លី ដែលបង្កប់ន័យគ្រប់គ្រាន់ថា «អរគុណដែលបានបារម្ភពីគុណភាពហេដ្ឋារចនាសម្ព័ន្ធនៅខេត្តព្រះសីហនុ ។ នេះជាសំណង់ និងតម្លៃ ។ ម្ដងនេះឱ្យរថយន្តខ្លាចផ្លូវម្ដង» ។
សូមជម្រាបថា សម្រាប់ការសាងសង់ហេដ្ឋារនាសម្ព័ន្ធនៅទូទាំងខេត្តព្រះសីហនុចំនួន៣៤ខ្សែ ត្រូវរាជរដ្ឋាភិបាលបានចំណាយថវិកាចំនួន ២៩៤លានដុល្លារសហរដ្ឋាអាមេរិក ដើម្បីធ្វើការសាងសង់ហេដ្ឋារដនាសម្ព័ន្ធ ។ នៅក្រោយពីបញ្ចប់ការសាងសង់ខេត្តព្រះសីហនុនឹងប្រែមុខមាត់ថ្មី ដែលកាន់តែមានភាពទាក់ទាញក្នុងការវិនិយោគក្នុងនាមជាមជ្ឈមណ្ឌលពាណិជ្ជកម្មទំនើបដែលស្របទៅនឹងគម្រោងរបស់រដ្ឋាភិបាលប្រែក្លាយខេត្តមួយនេះឱ្យក្លាយទៅជាមជ្ឈមណ្ឌលហិរញ្ញវត្ថុប្រចាំប្រទេសកម្ពុជា ។
តាមផែនការនៃការសាងសង់ផ្លូវទាំង៣៤ខ្សែ ដែលមានប្រវែងសរុបចំនួន៨៤គីឡូម៉ែត្រមានរង្វង់មូលចំនួន៣ ស្ពានចំនួន៦ ដែលមានប្រវែងសរុបចំនួន២៥២ម៉ែត្រ ដោយមានក្រុមហ៊ុនទទួលម៉ៅការសាងសង់ចំនួន៧ គ្រោងនឹងបញ្ចប់ទាំងស្រុងត្រឹមរយៈពេល៨ខែ ។
សូមបញ្ជាក់ថា បើតាមមន្ត្រីជាន់ខ្ពស់នៃអគ្គស្នងការនគបាលជាតិធ្លាប់បានឲ្យដឹងថា ផ្លូវនៅខេត្តព្រះសីហនុនឹងត្រូវបំពាក់កាមេរ៉ាសុវត្ថិភាព ដើម្បីត្រួតពិនិត្យការបើកបរមិនគោរពច្បាប់ចរាចរណ៍ ។ នាយឧត្តមសេនីយ៍ ហ៊ឹម យ៉ាន អគ្គស្នងការរង នៃអគ្គស្នងការនគរបាលជាតិ បានលើកឡើងក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក ចុងឆ្នាំ២០១៩ ថា នៅកំពង់សោមកំពុងតែអនុវត្តដាក់ឧបករណ៍កាមេរ៉ានៅតាមភ្លើងស្តុប ដើម្បីចាប់យករូបភាពអ្នកមិនគោរពច្បាប់់ចរាចរណ៍មកពិន័យតាមច្បាប់ ។ លោកបញ្ជាក់ថា៖«កំពង់សោម យើងបានរៀបចំហើយ ក្នុងការកាមេរ៉ាសុវត្ថិភាពតាមភ្លើងស្តុប ។ ខ្ញុំបាទផ្ទាល់បានចុះទៅពិនិត្យរៀបចំហើយ គឺមានកាមេរ៉ា រហូតដល់៦០០កាមេរ៉ា ក្នុងផ្លូវ៣៤ ខ្សែដែលធ្វើថ្មី និងផ្លូវមូយចំនួនទៀត។ អីញ្ចឹងយើងដាក់៦០០កាមេរ៉ានេះលើគោលដៅចំនួន៥០០កន្លែង» ៕
ចែករំលែកព័តមាននេះ