រាជធានីភ្នំពេញ ៖ លោកខៀវ កាញារីទ្ធ រដ្ឋមន្ត្រីក្រសួងព័ត៌មាន អញ្ជើញជួបសំណេះសំណាលជាមួយគណៈប្រតិភូអ្នកសារព័ត៌មានថៃចំនួន២០នាក់ ដែលដឹកនាំដោយលោក Prasit Sangrungrueng អគ្គលេខាធិការ…
រាជធានីភ្នំពេញ ៖ លោកខៀវ កាញារីទ្ធ រដ្ឋមន្ត្រីក្រសួងព័ត៌មាន អញ្ជើញជួបសំណេះសំណាលជាមួយគណៈប្រតិភូអ្នកសារព័ត៌មានថៃចំនួន២០នាក់ ដែលដឹកនាំដោយលោក Prasit Sangrungrueng អគ្គលេខាធិការ សហព័ន្ធ បណ្ដាញផ្សព្វផ្សាយអាស៊ាន (UMA) ចូលជួបសម្តែងការគួរសម និងរាយការណ៍ពីការងាររបស់ UMA ដែលបានអនុវត្តកន្លងមកជូនលោករដ្ឋមន្ត្រីក្រសួងព័ត៌មានកាលពីវេលាថ្ងៃត្រង់ថ្ងៃទី១៥ ខែមករា ឆ្នាំ២០២០ នៅទីស្ដីការក្រសួងព័ត៌មាន ។
លោក ខៀវ កាញារីទ្ធ បានបញ្ជាក់ថា សម្តេចតេជោហ៊ុន សែន ក្នុងការផ្តល់ឱកាសជួបជាមួយអ្នកសារព័ត៌មានក្នុងប្រទេសកម្ពុជា គឺមានចំនួន៤លើករួចមកហើយជារៀងរាល់ឆ្នាំ ដោយក្នុងមួយឆ្នាំៗមានការកើនឡើងជាបន្តបន្ទាប់ ដែលឆ្នាំ២០២០នេះ ជាលើកទី៤ មានអ្នកសារព័ត៌មានចំនួនជិត៦ពាន់នាក់បានចូលរួម ហើយសម្តេចតេជោបានកំណត់យកថ្ងៃទី១៤ ខែមករា ជារៀងរាល់ឆ្នាំក្នុងការជួបជាមួយអ្នកសារព័ត៌មានជាបន្តទៅទៀត។ ដូច្នេះសូមខាងភាគីថៃជ្រាបហើយត្រៀមក្នុងឆ្នាំបន្ទាប់ដើម្បីមកចុះឈ្មោះឲ្យបានមុនរយៈពេលមុនយ៉ាងតិចកន្លះខែ ដោយធម្មតាអនុញ្ញាតឲ្យភាគីថៃចូលរួមតែ១០នាក់ តែលើកនេះក្នុងករណីពិសេសអាចឲ្យបន្ថែមរហូតដល់២០នាក់ពីប្រទេសថៃឲ្យមកចូលរួម ។
លោករដ្ឋមន្ត្រីក្រសួងព័ត៌មានបានបន្ថែមទៀតថា សម្តេចតេជោបានផ្តល់មេធាវីរបស់រដ្ឋមន្ត្រីសម្រាប់ជួយដល់អ្នកកាសែតមួយចំនួនដែលត្រឹមត្រូវតាមច្បាប់ ដោយសារនៅកម្ពុជាមានអ្នកកាសែតច្រើនបែប ដែលមានអង្គភាពខ្លះបានច្បាប់ ហើយមិនដែលបានចេញផ្សាយ ចំណែកមានបុគ្គលខ្លះបានចេញផ្សាយដោយខ្លួនឯងដែលមិនបានឆ្លងកាត់វគ្គបណ្តុះបណ្តាល និងយល់ដឹងពីវិជ្ជាជីវៈត្រឹមត្រូវ ដោយគ្រាន់តែប្រើទូរស័ព្ទធ្វើជាកាមេរ៉ាថតរូប និងសម្រេចចេញផ្សាយតែម្នាក់ឯង ដែលគ្មានគុណភាព ហើយការការពារដោយមេធាវីស្ម័គ្រចិត្តរបស់សម្តេចទៅតាមអង្គហេតុនិងអង្គច្បាប់ ។
លោក Prasit Sangrungrueng បានឆ្លើយតបវិញថា អ្នកកាសែតនៅក្នុងប្រទេសថៃដែលជាសមាជិករបស់UMA បានជួបប្រជុំគ្នាកន្លងរួចមកហើយកាលពីថ្ងៃទី២៥ ខែធ្នូ ឆ្នាំ២០១៩ នៅខេត្ត Phetchabun ដើម្បីស្វែងរកអ្នកច្បាប់មកជួយការពារអ្នកកាសែតផងដែរ ហើយសមាជិករបស់ UMA នៅក្នុងប្រទេសថៃមានការកើនឡើង ដោយមានការចាប់អារម្មណ៍មកលើអ្នកកាសែតនៅកម្ពុជាដែលមានសម្តេចតេជោនាយករដ្ឋមន្ត្រីបានផ្តល់ឱកាសលើកទឹកចិត្តដល់អ្នកកាសែត ក្នុងការរួមចំណែករួបរួមកសាងពង្រឹងសេដ្ឋកិច្ច និងរក្សាសុខសន្តិភាពបន្ថែមនៅក្នុងប្រទេស ហើយបន្តរួមគ្នាពង្រឹងវិស័យព័ត៌មានឲ្យរឹងមាំបន្ថែមទៀតនៅក្នុងអាស៊ានយើងទាំងមូលដើម្បីលុបបំបាត់រាល់ព័ត៌មានដែលកើតឡើងក្លែងក្លាយមិនពិតប្រាកដនោះឲ្យសាបរលាបអស់ ៕ (កែសម្រួលដោយ ៖ ធីតា)
ចែករំលែកព័តមាននេះ