អូស្ត្រាលី ៖ សម្តេចពញាចក្រី ហេង សំរិន ប្រធានរដ្ឋសភាកម្ពុជា បានស្នើដល់ប្រធានសភាអូស្ត្រាលី ជួយកៀរគរអ្នកវិនិយោគទុននិងអ្នកទេសចរមកកម្ពុជាឲ្យបានច្រើន ។ សម្តេចពញាចក្រី បានស្នើបែបនេះក្នុងកំឡុងពេលដឹកនាំគណៈប្រតិភូសភាកម្ពុជា ចូលរួមកិច្ចប្រជុំប្រចាំឆ្នាំនៃវេទិកាសភាអាស៊ី-ប៉ាស៊ីហ្វិក (APPF) នៅប្រទេសអូស្ត្រាលី ។
នាព្រឹកថ្ងៃទី១៤ ខែមករា ឆ្នាំ២០២០ សម្តេចពញាចក្រី ហេង សំរិន ប្រធានរដ្ឋសភា បានជួបពិភាក្សាការងារជាមួយលោក តូនី ស្ម៊ីត (Tony Smith) ប្រធានរដ្ឋសភាអូស្ត្រាលី និងជាប្រធានAPPF លើកទី២៨ នៅវិមានរដ្ឋសភាអូស្ត្រាលី ដើម្បីពង្រឹងកិច្ចសហប្រតិការសភារវាងប្រទេសទាំងពីរកម្ពុជា-អូស្ត្រាលី ឲ្យកាន់តែរឹងមាំឡើង ។
ក្នុងជំនួបនេះ លោកប្រធានរដ្ឋសភាអូស្ត្រាលី បានថ្លែងអំណរគុណយ៉ាងជ្រាលជ្រៅសម្តេចពញាចក្រី ហេង សំរិន ដែលបានដឹកនាំគណៈប្រតិភូសភាកម្ពុជា មកចូលរួមកិច្ចប្រជុំAPPF នៅប្រទេសអូស្ត្រាលីនាពេលនេះ។ លោកថ្លែងថាអូស្ត្រាលីបានសិក្សានិងដកស្រង់ពិសោធន៍ជាច្រើនពីសភាកម្ពុជា ដែលរៀបចំកិច្ចប្រជុំAPPFលើកទី២៧ កាលពីឆ្នាំ២០១៩ មុនសភាអូស្ត្រាលរៀបចំកិច្ខប្រជុំនេះ។ សម្តេចពញាចក្រី ហេង សំរិន បានលើកឡើងពីសារៈសំខាន់របស់សភាអូស្ត្រាលី នៅក្នុងវេទិកាអន្តរសភាក្នុងតំបន់ និងសកលលោក។
សម្តេចពញាចក្រី បានកោតសរសើរនិងវាយតម្លៃខ្ពស់ចំពោះការៀបចំកិច្ចប្រជុំ APPF លើកទី២៨នេះ ប្របកដោយខ្លឹមសារបង្ហាញពីសារៈសំខាន់ និងកិច្ចសហប្រតិបត្តិការល្អនៃសមាជិកAPPF ដើម្បីវិបុលភាពរបស់ប្រជាពលរដ្ឋ ។ សម្តេចប្រធានរដ្ឋសភា បានថ្លែងអំណរគុណរដ្ឋាភិបាលនិងប្រជាជនអូស្ត្រាលី ដែលបានរួមវិភាគទានយ៉ាងធំធេង ក្នុងដំណាក់កាលស្វែងរកសន្តិភាព ក៏ដូចជាការអភិវឌ្ឍនៅកម្ពុជា ។
បច្ចុប្បន្ន អូស្ត្រាលីជាដៃគូអភិវឌ្ឍន៍ដ៏សំខាន់របស់កម្ពុជាស្ទើរគ្រប់វិស័យ ។ ឆ្លៀតក្នុងឱកាសនោះ សម្តេចពញាចក្រី បានស្នើដល់សភានិងរដ្ឋាភិបាលអូស្ត្រាលី បន្តគាំទ្រកម្ពុជាជាបន្តទៀត ជាពិសេសជួយជំរុញវិនិយោគិននិងទេសចរពីអូស្ត្រាលីមកកម្ពុជា និងជួយបណ្តុះបណ្តាលធនធានមនុស្សដល់កម្ពុជា និងបង្កើនចំនួនអាហារូបករណ៍ដល់និស្សិតកម្ពុជាមកសិក្សានៅអូស្ត្រាលី ពីព្រោះការអភិវឌ្ឍនៅកម្ពុជាសព្វថ្ងៃ ត្រូវការធនធានមនុស្សជាចាំបាច់។
សម្តេចពញាចក្រី បានអញ្ជើញលោក តូនីស្ម៊ីត មកបំពេញទស្សនកិច្ចផ្លូវការនិងជាមិត្តភាពនៅកម្ពុជា និងចូលរួមកិច្ចប្រជុំភាពជាដៃគូសភាអាស៊ី-អឺរ៉ុបលើកទី១១ ដែលសភាកម្ពុជាធ្វើជាម្ចាស់ផ្ទះ នៅចុងឆ្នាំ២០២០ខាងមុខនេះ ។ ជាការឆ្លើយតប លោក តូនី ស្ម៊ីត ប្រធានរដ្ឋសភាអូស្ត្រាលី បានទទួលយកសំណើនិងការលើកឡើងរបស់សម្តេចប្រធានរដ្ឋសភា ។ លោកមានក្តីរីករាយ ចំពោះចំណងមិត្តភាពនិងកិច្ចសហប្រតិ
បត្តិការរវាងសភាប្រទេសទាំងពីរដែលមានការរីកចម្រើនជាលំដាប់ ។
សូមជម្រាបថា នៅក្នុងកំឡុងពេលចូលរួមកិច្ចប្រជុំ APPF នាទីក្រុងកង់បេរ៉ា នេះ សម្តេចពញាចក្រី ប្រធានរដ្ឋសភា បានទទួលជួបពិភាក្សាការងារផ្លូវការនិងក្រៅផ្លូវការជាមួយប្រតិភូសភា ដែលជាសមាជិក APPF និងអន្តរសភាអាស៊ាន មួយចំនួនទៀតផងដែរ ក្នុងការពង្រឹងពង្រីកកិច្ចសហប្រតិបត្តិការរវាងសភាកម្ពុជានិងបណ្តាប្រទេសជាមិត្ត ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ