រាជធានីភ្នំពេញ ៖ ប៉ុន្មានឆ្នាំចុងក្រោយនេះ ទីផ្សាររថយន្តនៅប្រទេសកម្ពុជាយើងសង្កេតឃើញមានក្រុមហ៊ុនលក់រថយន្តម៉ាកល្បីៗជាច្រើនដូចជារថយន្ត BMW និងMecerdes ជាដើម ។ តែដោយឡែកសម្រាប់រថយន្តម៉ាក WULINGដែលជារថយន្តទំនើបមួយប្រភេទសម្រាប់ប្រើប្រាស់និងដឹកអ្នកដំណើររួមទាំងដឹកសម្ភារផ្សេងៗនៅប្រទេសចិនក៏បានមើលឃើញឱកាសទីផ្សារនៅកម្ពុជាផងដែរ ។
លោកចឹង ធានស៊ីង អគ្គនាយកក្រុមហ៊ុន WULING Motors បានឱ្យដឹងនៅក្នុងពិធីសម្ពោធរថយន្ត WULING ម៉ូដែលថ្មីនិងការចែករង្វាន់ជូនដល់អ្នកទស្សន៍ទាយត្រូវក្នុងប្រតិបត្តិការ World Cup 2014 កាលពីល្ងាចថ្ងៃទី ១៩ កក្កាដា កន្លងទៅនេះថា ទីផ្សាររថយន្តនៅប្រទេសកម្ពុជា នាពេលបច្ចុប្បន្ន កំពុងមានការវិវឌ្ឍច្រើនហើយចំពោះរថយន្តម៉ាក WULING គឺជាទីផ្សារថ្មី ។
លោករំពឹងថា ទៅថ្ងៃមុខចំពោះតម្រូវការប្រើប្រាស់និងដឹកទំនិញផ្សេងៗនៅកម្ពុជានឹងមានការកើនឡើងនៅពេលសេដ្ឋកិច្ចរបស់ប្រទេសនេះ បន្តការរីកចម្រើនឡើងទន្ទឹមនឹងរថយន្តម៉ាក WULING របស់ក្រុមហ៊ុនមានតម្លៃសមរម្យសម្រាប់អ្នកប្រើប្រាស់នៅកម្ពុជា ស្របពេលអ្នកប្រើប្រាស់រថយន្តធុនចាស់ ក៏នៅមានចំនួនច្រើន ។
លោកបន្ថែមថា បន្ទាប់ពីក្រុមហ៊ុនចាប់ផ្តើមដំណើរការលក់សាកល្បងនៅប៉ុន្មានខែដើមឆ្នាំ២០១៤នេះ មានអតិថិនជនមកទិញ និងកុម្ម៉ង់រថយន្ត WULING មានចំនួន៥០គ្រឿងហើយ ។ ចំពោះរថយន្តម៉ាក WULING នេះ ក្រុមហ៊ុនបាននាំចូលមកទីផ្សារកម្ពុជាមាន៤ម៉ូដែលដោយម៉ូដែលនីមួយៗមានតម្លៃចន្លោះជាង១ម៉ឺនដុល្លារឡើងទៅក្នុងមួយគ្រឿង៕
ចែករំលែកព័តមាននេះ