ខេត្តតាកែវ ៖ ជនសង្ស័យចំនួន៤នាក់ត្រូវបានកម្លាំងនគរបាលស្រុកគិរីវង់ បង្ក្រាបបានជាបន្តបន្ទាប់ពាក់
ពន្ធ័ករណីជួញដូរគ្រឿងញៀនដោយខុសច្បាប់ចំនួន២ករណីផ្សេងគ្នា កាលពីថ្ងៃទី៦និងទី៧ មករា ឆ្នាំ២០២០ នៅចំណុច ភូមិពោធិ៍ខ្វិត ឃុំព្រះបាទជាន់ជុំ ស្រុកគិរីវង់ ខេត្តតាកែវ ក្រោមការចង្អុលបង្ហាញនិងបញ្ជាពីសំណាក់លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ ។
លោកវរសេនីយឯក យ៉ុគ សារ៉ាត់ អធិការនគរបាលស្រុកគិរីវង់បានអោយដឹងថា ជនសង្ស័យទាំង៤នាក់ រួមមាន ១-ឈ្មោះ ជីម សីហា ភេទប្រុស អាយុ១៧ឆ្នាំ ២-ឈ្មោះ ឯក សុគុយ ភេទប្រុស អាយុ២៦ឆ្នាំ ៣-ឈ្មោះ ប៉ែន ឌីនេ ភេទប្រុស អាយុ២៦ឆ្នាំ ជាមុខសញ្ញាជួញដូរយ៉ាងសកម្ម និង៤-ឈ្មោះង៉ែត មាន់ ភេទប្រុស អាយុ២៨ឆ្នាំ ជាមុខសញ្ញាជួញដូរគ្រឿងញៀន ។ ជនសង្ស័យទាំង៤នាក់ រស់នៅក្នុងឃុំព្រះបាទជាន់ជុំ ស្រុកគិរីវង់ ខេត្តតាកែវ ។
ក្រោយឃាត់ខ្លួនជនសង្ស័យទាំង៤នាក់ខាងលើ សមត្ថកិច្ចដកហូតវត្ថុតាងរួមមានម្សៅក្រាម ពណ៌សថ្លា ចំនួន១០កញ្ចប់តូច ទូរស័ព្ទដៃ២គ្រឿង និងសម្ភារមួយចំនួនទៀតផងដែរ។ នៅចំពោះមុខនគរបាលស្រុក ជនសង្ស័យបានឆ្លើយសារភាពថា ពួកខ្លួនពិតជាបានប្រើប្រាស់ និងចែកចាយគ្រឿងញៀនពិតប្រាកដមែន។
បច្ចុប្បន្ន ជនសង្ស័យរួមនឹងវត្ថុតាងត្រូវបានកម្លាំងជំនាញកសាងសំណុំរឿង ដើម្បីបញ្ជូនទៅសាលាដំបូងខេត្តកាត់ទោសទៅតាមច្បាប់ និងបន្តស្រាវជ្រាវបក្ខពួកដែលនៅសេសសល់ផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ