ខេត្តបន្ទាយមានជ័យ ៖ ស្ត្រីតែងខ្លួនជាបុរសម្នាក់ខឹងរឿងសុំលុយ ១,០០០បាត ពីស្រីស្នេហ៍មិនបាន ហើយស្រីស្នេហ៍មិនព្រមជក់ថ្នាំញៀនជាមួយ ធ្វើឲ្យខ្លួនខឹង និងប្រើហិង្សាវាយទៅលើស្រីស្នេហ៍ដែលមានភេទដូចគ្នាលើផ្ទៃមុខ និងភ្នែក បណ្ដាលឲ្យរងរបួសយ៉ាងដំណំតែម្តង នៅព្រឹកថ្ងៃទី០៧ ខែធ្នូ ឆ្នាំ២០១៧ ត្រូវបាននគរបាលក្រុងប៉ោយប៉ែត ចាប់ខ្លួនក្រោយពីទទួលបានពាក្យបណ្តឹងនារីរងគ្រោះ ។
លោកវរសេនីយ៍ឯក ធិន ស៊ិនដេត អធិការ នៃអធិការដ្ឋាននគរបាលក្រុងប៉ោយប៉ែតបានឲ្យដឹងថា ដោយយោងតាមពាក្យបណ្តឹងរបស់ស្ត្រីម្នាក់ឈ្មោះ វ៉ា វិចិត្រ អាយុ៣១ឆ្នាំ ស្នាក់នៅភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មុខរបរជាកម្មករ បានអះអាងនៅចំពោះមុខសមត្ថកិច្ចថា នៅវេលាម៉ោងប្រមាណ១២យប់ ថ្ងៃទី០៦ ខែធ្នូ ឆ្នាំ២០១៧ ខ្លួនត្រូវបានស្ត្រីម្នាក់ ដែលតែងខ្លួនជាប្រុសឈ្មោះ ហ៊ុម លក្ខណា ហៅល័ក្ខ អាយុ២៧ឆ្នាំ ស្នាក់ជាមួយគ្នា វាយមកលើផ្ទៃមុខ នឹងដាល់ បណ្ដាលឲ្យជាំភ្នែក គ្រាដែលសុំលុយ ១,០០០បាត មិនបាននឹងមិនព្រមជក់ថ្នាំញៀនជាមួយ ។
លោកអធិការបន្តថា ក្រោយទទួលបានពាក្យបណ្តឹង កម្លាំងជំនាញបានចុះទៅធ្វើការឆែកឆេរក្នុងបន្ទប់ស្នាក់នៅខាងលើ បានរកឃើញឧបករណ៍ជក់ថ្នាំញៀនមួយចំនួន និងបានឃាត់ខ្លួនស្ត្រីដែលតែងខ្លួនជាបុរសជាជនដៃដល់នោះ យកមកសួរនាំតែម្ដង ។
នៅចំពោះមុខសមត្ថកិច្ច ស្ត្រីដែលតែងខ្លួនជាប្រុសបានសារភាពថា ខ្លួនពិតជាបានប្រើប្រាស់ថ្នាំញៀនជាច្រើនខែមកហើយ ។ ជនដៃដល់បន្តថា អ្វីដែលខ្លួនឈានដល់ការវាយលើស្ត្រីរងគ្រោះនោះ គឺមកពីសុំលុយ ១,០០០បាត ទិញថ្នាំញៀនថែមមិនបានហើយ ស្រីស្នេហ៍របស់គេមិនព្រមជក់ថ្នាំញៀនជាមួយ ក៏ធ្វើឲ្យរូបគេខឹងទើបកើតជាបញ្ហាបែបនេះតែម្តងទៅ ។
លោកអធិការក្រុងប៉ោយប៉ែត ធិន ស៊ិនដេត បានបញ្ជាក់ថា បន្ទាប់ពីបានទទួលបានចម្លើយសារភាពពីជនដៃដល់រួចមក រួមទាំងវត្ថុតាង ត្រូវបានកម្លាំងជំនាញរបស់លោកកសាងសំណុំរឿងបញ្ជូនទៅសាលាដំបូងខេត្ត ចាត់ការតាមនីតិវិធីតែម្តង ៕
ចែករំលែកព័តមាននេះ