ខេត្តបន្ទាយមានជ័យ ៖ ជនសង្ស័យ២នាក់ត្រូវបានកម្លាំងកងរាជអាវុធហត្ថឃាត់ខ្លួនចោទប្រកាន់ពីបទលួចកាច់សោរ.កម៉ូតូ២ករណីដោយឡែកគ្នាត្រូវបានកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់នៅថ្ងៃទី១២ ខែសីហា ឆ្នាំ២០១៩ ។
លោកវរសេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែតបានប្រាប់ឱ្យដឹងថា កាលពីថ្ងៃទី០៧ ខែសីហា ឆ្នាំ២០១៩ កម្លាំងកងរាជអាវុធហត្ថក្រុងប៉ោយប៉ែតឃាត់ខ្លួនជនសង្ស័យឈ្មោះ នាម សុផាត ភេទប្រុស អាយុ២៦ឆ្នាំ ស្នាក់នៅភូមិក្បាលស្ពានមួយសង្កាត់-ក្រុងប៉ោយប៉ែត តាមបណ្តឹងពីជនរងគ្រោះឈ្មោះ ជន សៀវថៃ ភេទស្រី អាយុ១៨ឆ្នាំ រស់នៅភូមិក្បាលស្ពានសង្កាត់-ក្រុងប៉ោយប៉ែត ដែលធ្វើសកម្មភាពលួចកាចសោរ.កម៉ូតូម៉ាក់ហុងដាZoomer-X ស៊េរីឆ្នាំ២០១៦ ចំនួន១គ្រឿង កាលពីថ្ងៃទី០៤ ខែសីហា ឆ្នាំ២០១៩ នៅចំណុចភូមិក្បាលស្ពានមួយ សង្កាត់-ក្រុងប៉ោយប៉ែត ។
ក្រោយពេលទទួលបណ្តឹងកម្លាំងធ្វើការស្រាវជ្រាវ និងកំណត់មុខសញ្ញាឃាត់ខ្លួន និងម៉ូតូ១គ្រឿងម៉ាក់ហុងដា Click ពណ៌ស ស៊េរីឆ្នាំ២០១២ ហើយនាំយកទៅសាកសួរម៉ូតូដែលលួចកាច់សោរ.កទៅលក់តំលៃ២៣៥០០បាតហើយកម្លាំងនាំទៅយកប្រគល់ជូនម្ចាស់ដើមវិញ ។
លោកវរសេនីយ៍ត្រី ជា សីហា មេបញ្ជាការកងរាជអាវុធហត្ថស្រុកអូរជ្រៅបានបញ្ជាក់ថា កាលពីថ្ងៃទៅ០៨ ខែសីហា ឆ្នាំ២០១៩ កម្លាំងកងរាជអាវុធហត្ថស្រុកអូរជ្រៅបានឃាត់ខ្លួនជនសង្ស័យឈ្មោះ ហៃ ប្រុសពៅ ភេទប្រុស អាយុ២០ឆ្នាំ រស់នៅភូមិទំនប់ក៥ សង្កាត់-ក្រុងប៉ោយប៉ែត ដែលឃាត់ខ្លួនតាមបណ្តឹងជនគ្រោះឈ្មោះ ហោ សុធា ភេទប្រុស អាយុ៥២ឆ្នាំ ដែលរស់នៅភូមិប៉ាលិលេយ្យមួយ សង្កាត់-ក្រុងប៉ោយប៉ែត ។ ដែលជនសង្ស័យបានធ្វើសកម្មភាពលួចកាត់ច្រវ៉ាក់ហើយកាច់សោរ.កម៉ូតូម៉ាក់ Yamaha ១គ្រឿងកាលពីយប់ថ្ងៃទី០៧ ខែសីហា ឆ្នាំ២០១៩ នៅភូមិប៉ាលិលេយ្យសង្កាត់-ក្រុងប៉ោយប៉ែត ។
ក្រោយពេលទទួលបណ្តឹងហើយកម្លាំងកងរាជអាវុធហត្ថស្រុកអូរជ្រៅបានធ្វើការស្រាវជ្រាវកំណត់មុខសញ្ញាឃាត់ខ្លួនជនសង្ស័យ និងម៉ូតូ១គ្រឿងដែលជនសង្ស័យលួចហើយដោះដូរដើម្បីបំភណ្ឌភ្នែកត្រូវបានកម្លាំងចាប់យកម៉ូតូប្រគល់ជូនម្ចាស់វិញ ។
លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យបានបញ្ជាក់ថា កម្លាំងកងរាជអាវុធហត្ថបានបង្ក្រាបឃាត់ខ្លួនជនសង្ស័យ២នាក់ដែលធ្វើសកម្មភាពលួចកាច់សោរ.កម៉ូតូ២ករណីដោយឡែកគ្នាត្រូវបានកសាងសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធី ៕
កែសម្រួលដោយ ៖ សំណាង
ចែករំលែកព័តមាននេះ