អ្នកគិតថា ខ្លួនធ្វើការហត់នឿយអស់ជាច្រើនសប្តាហ៍ហើយ និងចង់សម្រាកលំហែកាយ ដើម្បីកាត់ស្ត្រេសដែរទេ ? វាប្រហែលជាគំនិតមួយដែលមនុស្សជាច្រើនមាន បន្ទាប់ពីមកពីធ្វើការហត់នឿយ ។ ប៉ុន្តែការពិតជាក់ស្តែង ការមើលថែលំហែកាយខ្លួនមិនតែងតែងាយស្រួលទេ ។ អ្នកប្រហែលជាមិនមានពេលវេលាគ្រប់គ្រាន់ ក្នុងការចាកចេញពីការងារ ឬអ្នកប្រហែលជាមិនចង់ចាយវាយលើសពីអ្វីដែលអ្នកបានកំណត់ពីដើមខែមក ។ យ៉ាងណាក្តី ការមើលថែខ្លួនមិនចាំបាច់ឲ្យអ្នកចំណាយច្រើនរាល់ដងឡើយ ។ ខាងក្រោមនេះគឺជាវិធីមួយចំនួនដែលអ្នកអាចសាកល្បង ដើម្បីកាត់សម្ពាធការងារ និងមើលថែខ្លួនឡើងវិញ៖
១. ការគេងសម្រាកកាយ
ថ្ងៃចុងសប្តាហ៍បានមកដល់ ប៉ុន្តែអ្នកបានចំណាយកម្លាំងលើការងារអស់ទៅហើយ ។ អ្នកប្រហែលជាមិនចង់ដើរផ្សារទំនើប ឬចេញទៅក្រៅក្រុងទៅស្រូបខ្យល់អាកាសឡើយ ។ កត្តាដែលសំខាន់សម្រាប់អ្នកនៅពេលនេះ គឺការគេងយកកម្លាំងមកវិញ ។
ការគេងសម្រាកមួយភ្លែតនៅពេលរសៀល ឬព្រឹកផ្តល់អត្ថប្រយោជន៍ដល់សុខភាពជាច្រើនដូចជា ជួយធ្វើឲ្យអ្នកមានអារម្មណ៍ស្រស់ស្រាយជាងមុន ជួយបង្កើនភាពចងចាំ បង្កើនប្រសិទ្ធិភាពការងារ កាត់បន្ថយស្ត្រេស និងពង្រឹងប្រព័ន្ធការពាររាងកាយថែមទៀត ។
២. ដកខ្លួនចេញពីគ្រឿងអេឡិចត្រូនិច
ទូរស័ព្ទ និងកុំព្យូទ័ររបស់អ្នកប្រហែលជាបានរោទិ៍អស់ពេញមួយសប្តាហ៍ទៅហើយ ដើម្បីរំលឹកអ្នកពីការងារដែលត្រូវសម្រេច ។ ប៉ុន្តែថ្ងៃចុងសប្តាហ៍មិនគួរមានសភាពដូច្នេះឡើយ វាគួរតែជាថ្ងៃដែលអ្នកអាចចាកចេញពីគ្រឿងអេឡិចត្រូនិចទាំងនេះ ។
អ្នកនៅតែអាចប្រើឧបករណ៍របស់អ្នកបាន ដើម្បីមើលហ្វេសប៊ុក ឬ YouTube ប៉ុន្តែអ្នកគួរតែបិទ Notification ឬសម្លេងរោទិ៍ដែលអាចរំខានថ្ងៃសម្រាករបស់អ្នកបាន ។ លើសពីនេះទៅទៀត អ្នកមិនគួរឆែកអ៊ីមែល នៅថ្ងៃសម្រាកទេ ប្រសិនបើអ្នកមិនមានការងារសំខាន់ត្រូវបញ្ចប់ ។
៣. សម្អាតបន្ទប់ និងផ្ទះ
អ្នកប្រហែលជាគិតថា វាជាអ្វីដែលអ្នកស្អប់បំផុតសម្រាប់ថ្ងៃចុងសប្តាហ៍ ប៉ុន្តែវាអាចជួយដល់អ្នកបាន ។ ការសម្អាតបន្ទប់ជួយឲ្យអ្នកកម្ចាត់រាល់ភាពអវិជ្ជមានដែលប៉ះពាល់ដល់អារម្មណ៍អ្នក និងជួយឲ្យអ្នកមានអារម្មណ៍ថា អ្នកបានសម្រេចកិច្ចការអ្វីមួយ ។
អ្នកមិនចាំបាច់សម្អាតផ្ទះទាំងមូលទេ ។ អ្នកអាចចាប់ផ្តើមពីចំណុចណាមួយដែលអ្នកចង់សម្អាត ។ ប្រសិនបើអ្នកមិនចូលចិត្តសម្អាតម្នាក់ឯងទេ អ្នកអាចហៅបងប្អូនឲ្យជួយបានដែរ ៕ កែសម្រួលដោយ ៖ សុឃាក់
ចែករំលែកព័តមាននេះ