ខេត្តរតនគិរី ៖ សមត្ថកិច្ចមូលដ្ឋាននិយាយថា មិនទាន់កំណត់ឱ្យដឹងច្បាស់លាស់ពីការខូចខាតគិតជាទឹកប្រាក់ប៉ុន្មាននោះទេ គ្រាន់តែដឹងថា ក្នុងផ្ទះសុទ្ធតែមានទំនិញគ្រឿងទេសដាក់លក់ពេញៗ ផ្ទះជាផ្ទះផ្សារលក់ទំនិញ ។ ចាត់ទុកថា ជាគ្រោះល្អផងដែរ…
ខេត្តរតនគិរី ៖ សមត្ថកិច្ចមូលដ្ឋាននិយាយថា មិនទាន់កំណត់ឱ្យដឹងច្បាស់លាស់ពីការខូចខាតគិតជាទឹកប្រាក់ប៉ុន្មាននោះទេ គ្រាន់តែដឹងថា ក្នុងផ្ទះសុទ្ធតែមានទំនិញគ្រឿងទេសដាក់លក់ពេញៗ ផ្ទះជាផ្ទះផ្សារលក់ទំនិញ ។ ចាត់ទុកថា ជាគ្រោះល្អផងដែរ ដែលផ្ទះត្រូវភ្លើងឆេះមុនគេនោះ នៅជិតស្ថានីយប្រេងចម្ងាយតែប្រមាណ២០ម៉ែត្រប៉ុណ្ណោះ តែមិនបានរាលដាលដល់ឡើយ ។
គួររំលឹកថា ផ្ទះ៦ខ្នងក្នុងផ្សារស្រុកអណ្ដូងមាស បានត្រូវព្រះអគ្គីឆាបឆេះអស់ទាំងស្រុង រួមជាមួយទំនិញគ្រឿងទេសផង កាលពីថ្ងៃទី១៨ ខែឧសភាកន្លងទៅ វេលាម៉ោង៤និង៣០នាទីរសៀល ស្ថិតនៅផ្សារស្រុកអណ្ដូងមាស ស្ថិតនៅក្នុងភូមិឡោម ឃុំម៉ាលិច ហើយបើតាមសមត្ថកិច្ចមូលដ្ឋានបានឱ្យដឹងថា ដើមចមគឺបណ្ដាលមកពីទុស្សេខ្សែភ្លើងក្នុងបន្ទប់ដេក ដោយម្ចាស់ផ្ទះមិនបានដឹង ព្រោះជាប់រវល់នៅខាងមុខផ្ទះលក់ដូរ លុះដល់ភ្លើងឆេះពេញបន្ទប់ដេកទៅ ហើយទើបដឹង និងមានការឆោឡោឡើង ។ សមត្ថកិច្ចឲ្យដឹងថា ភ្លើងបានឆេះរាលដាលដល់ផ្ទះទី២ ទើបរថយន្តពន្លត់អគ្គិភ័យ១គ្រឿង របស់អធិការដ្ឋាននគរបាលស្រុកអណ្តូងមាសមកដល់ធ្វើអន្តរាគមន៍បាញ់ទឹកពន្លត់ ។
ចំណែក១គ្រឿងទៀតរបស់ស្រុកបកែវក៏មកជួយអន្តរាគមន៍ដែរ ទើបជួយទប់ស្កាត់ទាន់ពេលវេលា មិនឱ្យភ្លើងឆេះរាលដាលដល់ផ្ទះក្នុងផ្សារតទៅទៀត ។ ផ្ទះទាំង៦ខ្នងដែលឆេះនេះ សុទ្ធតែធ្វើអំពីឈើប្រក់ស័ង្កសី ទើបភ្លើងឆេះមានល្បឿងលឿន គឺក្នុងរយៈពេលតែ១ម៉ោងកន្លះ ភ្លើងឆេះផ្ទះអស់៦ខ្នងទាំងស្រុង ។
ផ្ទះផ្សារស្រុកអណ្ដូងមាស គឺសាងសង់ជាប់ៗគ្នារហូតដល់ជាង១០០ខ្នង ហើយនៅក្នុងគ្រោះអគ្គិភ័យនេះ កុំតែបានរថយន្តពន្លត់អគ្គិភ័យរបស់អធិការដ្ឋាននគរបាលស្រុកអណ្ដូងមាស និងស្រុកបកែវ មកជួយអន្តរាគមន៍ទាន់ពេលវេលា មិនដឹងថានឹងបង្កមហន្តរាយធំធេងដល់កម្រិតណានោះទេ ។
ហេតុការណ៍ភ្លើងឆេះផ្ទះក្នុងផ្សារស្រុកអណ្តូងមាសនេះដែរ មិនមានគ្រោះថ្នាក់ដល់អាយុជីវិតមនុស្សទេ គ្រាន់តែផ្ទះទាំង៦ខ្នងរួមនឹងសម្ភារនៅក្នុងនោះត្រូវភ្លើងឆេះអស់គ្មានសល់ គឺម្ចាស់ផ្ទះសល់តែខោអាវម្នាក់១សម្រាប់នៅជាប់នឹង ខ្លួនប៉ុណ្ណោះ ។ ពាក្យចាស់ថា ស៊ូលិចទូកកណ្ដាលទន្លេកុំឱ្យភ្លើងឆេះផ្ទះ ។ (សម្រួលដោយ ៖ ស្រីណា)
ចែករំលែកព័តមាននេះ